YouTube balamyzdy shúldirletpesin desek...

4211
Adyrna.kz Telegram

Bir jyldan beri ıýtýberge aınalyp kettik. Sábıimiz dúnıege kelgen soń, You-Tube sııaqty negizgi jubatýshy baryna kózimiz jete tústi. Buryn sábıiniń qolyna gadjet ustata salyp, óz sharýasyna aınala beretin ata-anany jaqtyrmaıtyn edim. Óz basyma kelgende... áli de qarsylasyp jatyrmyn.

Qalaýbegime úıdegi bes telefondy bere salýǵa azamattyq hám ákelik, tipti bolmasa, otaǵasylyq quqymdy kóldeneń tarta otyryp, kádimgideı qarsylasamyn. Kózin, ózin saqtaǵym keledi. Tipti bolmaı bara jatsa, You-Tube-tiń qazaq tilindegi arnalarynan án tyńdatam, mýltfılm kórsetem. "Torǵaı-TV", "Qoshaqan-TV" sııaqty jaqsy arnalar bar. Árıne, jaqsy nıetpen ashylǵan dúnıeler ǵoı, tilderinde azdap akent te joq emes. Degenmen qala balalarynyń joqtyń ornyn toltyrýǵa tyrysqan eńbegin baǵalamaı bolmaıdy.

Endi bir oı keldi. Balalarymyzdyń tilin zaman jetistigi buza bermesin desek, qazaq tilindegi arnalardy meılinshe kóbeıtýimiz kerek eken. Ózim balyq aýlaýdy qatty unatam. Biraq qazaq tilinde "Vdalı ot goroda" jáne Abzal S. arnasynan basqa eshteńe joq. "Stepnoı ohotnık" pen "Always Alone" arnasynyń kórermeni bolyp júre beremiz be?

7 synypta oqıtyn ulym Oljas Oqastyń "Kolesa KZ" arnasyn qatty kóredi. Oljekeńe rahmet, naǵyz kásipqoı maman qazir! Biraq arpa ishinde - bir bıdaı...

Kóligimizden kiltıpan shyǵa qalsa, orys tilinde qaptaǵan keńesti shekesinen shertip júrip tańdaımyz. Qazaqsha - JOQ!.. Bizde máshıne motoryn túske deıin-aq shashyp jóndep alatyn jigitter bar ǵoı. Solarǵa bir jón siltep jiberse, arnany ózderi-aq dóńgeletip áketedi, sirá...

Sábılerge oralaıyq. Olardy qazir aldandyratyn, eń bastysy, tilin shyǵaratyn nárse - túrli gadjetter. Anasynyń qoly tımeı, áleýjelige pisirgen shujyǵy men satyp alǵan kóılegin salyp jatqanda, sábı basqa til arqyly aqparat alyp, sonyń tereńine enip barady. Sondyqtan FB betinde saıası sholýshy, áleýmettik qorǵaýshy bolýǵa asyqpaı, áleýetińizdi qazaqsha kontentke jumsasańyz, qanekı! 10 adam qarasa da, mıllıon adam qarasa da, báriniń túbinde aqsha tabý múddesi emes, sábı múddesi jatsa-shy, shirkin! Kontent kóbeıse, qaraýshy da kóbeıedi. Garantııa!

Otyz jyl erkin ómir súrgende, balalarymyzdyń tili basqasha shyǵatyn kúıge jetippiz. Kóp tanysymda solaı. Ózderi de ań-tań. Áıtpese, jetpis jeti atasynyń tili shúldirlep kórmegen ǵoı...

Eseı Jeńisulynyń  jazbasynan.

 

Pikirler