الماتىدا كوپبالالى انالار قوعامدىق كولىكتە تەگىن جۇرەدى، دەپ حابارلايدى «ادىرنا» ءتىلشىسى. بۇل تۋرالى قالا اكىمى باقىتجان ساعىنتاەۆ Facebook جەلىسىندەگى رەسمي پاراقشاسىندا جازدى.
«الماتىدا قوعامدىق كولىكتە تەگىن جۇرۋگە قۇقىلى ادامداردىڭ ساناتىن كەڭەيتپەكپىز.
الماتى ءماسليحاتىنىڭ دەپۋتاتتارى باسقا مەملەكەتتەردiڭ اۋماعىنداعى ۇرىس قيمىلدارىنىڭ ارداگەرلەرىنە، «التىن القا» مەن «كۇمىس القا» القاسىمەن ماراپاتتالعان كوپبالالى انالارعا، سونداي-اق 18 جاسقا دەيىنگى مۇگەدەك بالانى الىپ جۇرەتىن ادامدارعا قالاداعى قوعامدىق كولىكتە جەڭىلدىكپەن ءجۇرۋ تۋرالى شەشىمىمىزدى قولدادى.
بۇل شەشىم «ارداگەرلەر تۋرالى» 2020 جىلعى 6 مامىرداعى جاڭا زاڭعا سايكەس، سونداي-اق قالا تۇرعىندارىنىڭ الەۋمەتتىك-ەكونوميكالىق جاعدايىن جاقسارتۋ مەن ونى قورعاۋ ماقساتىندا قابىلداندى.
قالالىق الەۋمەتتىك ءال-اۋقات باسقارماسىنىڭ مالىمەتىنشە، شاھاردا 18 جاسقا دەيىنگى مۇگەدەك بالالاردى الىپ جۇرەتىن 1161 ادام بار. بۇل ساناتتاعى ادامدارعا 50% جەڭىلدىك بەرىلەدى. ال «التىن القا» مەن «كۇمىس القا» القاسىمەن ماراپاتتالعان 4663 كوپبالالى اناعا تەگىن جول ءجۇرۋ قۇقىعى بەرىلەدى»،-دەدى ول.
«ادىرنا» ۇلتتىق پورتالى
