Almatyda kópbalaly analar qoǵamdyq kólikte tegin júredi, dep habarlaıdy «Adyrna» tilshisi. Bul týraly qala ákimi Baqytjan Saǵyntaev Facebook jelisindegi resmı paraqshasynda jazdy.
«Almatyda qoǵamdyq kólikte tegin júrýge quqyly adamdardyń sanatyn keńeıtpekpiz.
Almaty máslıhatynyń depýtattary basqa memleketterdiń aýmaǵyndaǵy urys qımyldarynyń ardagerlerine, «Altyn alqa» men «Kúmis alqa» alqasymen marapattalǵan kópbalaly analarǵa, sondaı-aq 18 jasqa deıingi múgedek balany alyp júretin adamdarǵa qaladaǵy qoǵamdyq kólikte jeńildikpen júrý týraly sheshimimizdi qoldady.
Bul sheshim «Ardagerler týraly» 2020 jylǵy 6 mamyrdaǵy jańa Zańǵa sáıkes, sondaı-aq qala turǵyndarynyń áleýmettik-ekonomıkalyq jaǵdaıyn jaqsartý men ony qorǵaý maqsatynda qabyldandy.
Qalalyq Áleýmettik ál-aýqat basqarmasynyń málimetinshe, shaharda 18 jasqa deıingi múgedek balalardy alyp júretin 1161 adam bar. Bul sanattaǵy adamdarǵa 50% jeńildik beriledi. Al «Altyn alqa» men «Kúmis alqa» alqasymen marapattalǵan 4663 kópbalaly anaǵa tegin jol júrý quqyǵy beriledi»,-dedi ol.
«Adyrna» ulttyq portaly
