قر ۇلتىق كىتاپحاناسىندا قازاقستاننىڭ حالىق جازۋشىسى ءازىلحان نۇرشايىقوۆتىڭ مەموريالدىق كابينەتى اشىلدى.
19 جاسىندا ۇلى وتان سوعىسىنا قاتىسقان ءازىلحان نۇرشايىقوۆ ەلگە كەلگەن سوڭ قازىرگى قازۇۋ-عا وقۋعا تۇسەدى. «ۇلان»، «ەگەمەن قازاقستان» گازەتتەرىندە تابىستى ەڭبەك ەتتى. 1953 جىلى پاۆلودار وبلىسىنىڭ «قىزىل تۋ» گازەتىنە رەداكتور بولىپ اۋىسادى. 1961 جىلى «قازاق ادەبيەتى» گازەتىنە باس رەداكتور بولىپ كەلگەننەن باستاپ، الماتىعا ءبىرجولا تۇراقتايدى. قالامگەر كەڭەس وداعىنىڭ 4 وردەنىمەن جانە وننان اسا جاۋىنگەرلىك مەدالدارمەن، قازاق كسر-ءنىڭ جوعارعى كەڭەسى پرەزيديۋمىنىڭ قۇرمەت گراموتالارىمەن ماراپاتتالعان. تاۋەلسىز قازاقستان رەسپۋبليكاسىنىڭ «ەرەن ەڭبەگى ءۇشىن» مەدالىمەن (1995) جانە «پاراسات» وردەنىمەن (2005) ماراپاتتالعان. قازاقستاننىڭ حالىق جازۋشىسى اتاعىن الدى(1990).
«قازاقستان كىتاپتارى» زالىنداعى مەموريالدىق كابينەتتىڭ اشىلۋىنان كەيىن، دوڭگەلەك ۇستەلگە جينالعان قالامگەرلەر، جازۋشى تۋرالى ەستەلىكتەر ايتتى.
سونىڭ ءبىرى دە بىرەگەيى، ءسابيت مۇقانوۆ پەن عابيت مۇسىرەپوۆ اتىنداعى قوس مۇراجايدىڭ ديرەكتورى، حالىقارالىق «الاش» ادەبي سىيلىعىنىڭ لاۋرەاتى، اقىن ابدىعالي قايىربەكوۆ. «بۇگىنگى ۇلتتىق كىتاپحانامىزدىڭ تورىندە اشىلعان ءازىلحان اعامىزدىڭ مەموريالدىق كابينەتى قۇتتى بولسىن. مەن ازاعاڭا 85 جاسىندا ولەڭ ارناپ جازىپ وقىعان ەدىم، ءوزى بۇل ولەڭدى ەستىپ كەتتى. سىزدەردىڭ الدارىڭىزدا سونى وقىپ بەرەيىن» دەپ قىسقا ءارى نۇسقا قايىردى.
جانى جاز اعا، ءاز اعا!
كەمەلدىك تاۋىپ كەڭدىكتە،
ەلدىككە ۇندەپ تەڭدىككە،
ءوردىڭىز سوزبەن مۇنارا
ماحاببات پەنەن ەرلىككە.
تىنباستان شارلاپ دالانى،
تىنىعىپ قانا شامالى،
سوزبەنەن ەمدەپ جازدىڭىز
سوعىستان قالعان جارانى.
وتەدى ۋاقىت سىرعيدى
ۇشادى باستان قىرعي كۇن.
ءسىز جازعان ءاربىر شىعارما
جۇرەككە شۋاق نۇر قۇيدى.
اسۋدان-اسۋ استىڭىز
جالعاندىق دەسە قاشتىڭىز
باۋىرجان باتىر بەينەسىن،
اڭىزعا وراپ اشتىڭىز.
ەڭبەك پەن ەكپىن ەسەلەپ،
قاجىعان جوقسىز دەسە دە
قاليما اپام باسىنا
قويدىڭىز اپپاق كەسەنە.
جايدارى جانى جاز اعا،
تۇنىققا ىڭكار تازا اعا،
ماحاببات جىرىن تولعاڭىز
ازاتتىق جىرىن تولعاڭىز
جەتىڭىز جۇزگە ءاز اعا!
شارا سوڭىندا ءا.نۇرشايىقوۆ تۋرالى دەرەكتى فيلم كورسەتىلدى.
جاسۇلان ناۋرىءزالى
"ادىرنا"
