QR Ultyq kitaphanasynda Qazaqstannyń Halyq jazýshysy Ázilhan Nurshaıyqovtyń memorıaldyq kabıneti ashyldy.
19 jasynda Uly Otan soǵysyna qatysqan Ázilhan Nurshaıyqov elge kelgen soń qazirgi QazUÝ-ǵa oqýǵa túsedi. «Ulan», «Egemen Qazaqstan» gazetterinde tabysty eńbek etti. 1953 jyly Pavlodar oblysynyń «Qyzyl tý» gazetine redaktor bolyp aýysady. 1961 jyly «Qazaq ádebıeti» gazetine bas redaktor bolyp kelgennen bastap, Almatyǵa birjola turaqtaıdy. Qalamger Keńes Odaǵynyń 4 ordenimen jáne onnan asa jaýyngerlik medaldarmen, Qazaq KSR-niń Joǵarǵy Keńesi Prezıdıýmynyń Qurmet gramotalarymen marapattalǵan. Táýelsiz Qazaqstan Respýblıkasynyń «Eren eńbegi úshin» medalimen (1995) jáne «Parasat» ordenimen (2005) marapattalǵan. Qazaqstannyń Halyq jazýshysy ataǵyn aldy(1990).
«Qazaqstan kitaptary» zalyndaǵy memorııaldyq kabınettiń ashylýynan keıin, dóńgelek ústelge jınalǵan qalamgerler, jazýshy týraly estelikter aıtty.
Sonyń biri de biregeıi, Sábıt Muqanov pen Ǵabıt Músirepov atyndaǵy qos murajaıdyń dırektory, halyqaralyq «Alash» ádebı syılyǵynyń laýreaty, aqyn Ábdiǵalı Qaıyrbekov. «Búgingi Ulttyq kitaphanamyzdyń tórinde ashylǵan Ázilhan aǵamyzdyń memorııaldyq kabıneti qutty bolsyn. Men Ázaǵańa 85 jasynda óleń arnap jazyp oqyǵan edim, ózi bul óleńdi estip ketti. Sizderdiń aldaryńyzda sony oqyp bereıin» dep qysqa ári nusqa qaıyrdy.
Jany jaz aǵa, Áz aǵa!
Kemeldik taýyp keńdikte,
Eldikke úndep teńdikke,
Órdińiz sózben munara
Mahabbat penen erlikke.
Tynbastan sharlap dalany,
Tynyǵyp qana shamaly,
Sózbenen emdep jazdyńyz
Soǵystan qalǵan jarany.
Ótedi ýaqyt syrǵıdy
Ushady bastan qyrǵı kún.
Siz jazǵan árbir shyǵarma
Júrekke shýaq nur quıdy.
Asýdan-asý astyńyz
Jalǵandyq dese qashtyńyz
Baýyrjan batyr beınesin,
Ańyzǵa orap ashtyńyz.
Eńbek pen ekpin eselep,
Qajyǵan joqsyz dese de
Qalıma apam basyna
Qoıdyńyz áppaq kesene.
Jaıdary jany jaz aǵa,
Tunyqqa ińkár taza aǵa,
Mahabbat jyryn tolǵańyz
Azattyq jyryn tolǵańyz
Jetińiz júzge Áz aǵa!
Shara sońynda Á.Nurshaıyqov týraly derekti fılm kórsetildi.
Jasulan NAÝRYZÁLI
"ADYRNA"
