بۇگىن ۇلتتىق اكادەميالىق كىتاپحانادا اقتوبە وبلىسى اكىمدىگىنىڭ ۇيىمداستىرۋىمەن كەرەمەت ەڭبەكتىڭ - “Er Edige” جىرىنىڭ مۋزىكالىق سد البومىنىڭ تۇساۋكەسەرى ءوتتى.
“ەدىگە” ەپوسى - تۇگەل تۇركىگە ورتاق قۇندى مۇرا. ول - تۇتاس ءداۋىردىڭ ەپيكالىق ەنتسيكلوپەدياسى، ۇلىق ۇلىستان جەتكەن شەرلى شەجىرەمىز. بىلتىر وسى تاريحي قاھارماندىق جىردىڭ تۋعانىنا 600 جىل، ال ۇلىق ۇلىستىڭ قۇرىلعانىنا دا 750 جىل تولدى.
اقتوبە وبلىسى ازىرلەگەن البوم كىتاپقا اتاقتى مۇرىن جىراۋدان جەتكەن “قىرىمنىڭ قىرىق باتىرى” تسيكلدىك جىرى ەنىپتى. ونى قازاقتىڭ ماڭدايالدى مىقتى جىرشىلارى جىرلاپ، العاش رەت اۋديو جازبا تۇرىندە كوپشىلىككە ۇسىندى. جوبانىڭ اۆتورى - اتاقتى جىرشى الماس الماتوۆ اعامىز! ۇلتتىق ونەرىمىزدى ۇلىقتاپ، قۇندى ەڭبەكتى كوپشىلىككە ۇسىنعان، جوباعا ەڭبەگى سىڭگەن بارشا قاۋىمعا العىس ءھام قۇتتى بولسىن ايتامىز!
وسى ورايدا ويماقتاي وي: جىر - ءبىزدىڭ ۇلى قازىنامىز! ءبىزدىڭ تالايلى تاريحىمىز، شۇرايلى ءتىلىمىز، باي ادەبيەتىمىز بەن مايەكتى مەدەنيەتىمىز، ۇرانىمىز بەن رۋحىمىز، ۇلتتىق كودىمىز جىرلار ارقىلى جەتكەن. الماس الماتوۆ اعامىزدىڭ ايتۋىنشا، قازىر 560-تان اسا تاريحي جىرىمىز بار ەكەن. سولاردى ۇرپاق جادىندا قايتا جاڭعىرتۋ ءۇشىن جىرشىلارعا جاعداي جاساۋ قاجەت!
ماسەلەن، ءجۇز مىڭداعان جىر جولدارىن جاتقا بىلەتىن الماس اعامىزدىڭ ءوزى فەنومەن-قۇبىلىس ەمەس پە؟ سوندىقتان وسىنداي قۇندى قازىنالارىمىزدىڭ قادىرىن بىلۋگە ءتيىسپىز!
دارحان قىدىرالى، حالىقارالىق تۇركى اكادەمياسىنىڭ پرەزيدەنتى
