نۇر-سۇلتاندا ءبىرىنشى توپتاعى مۇگەدەككە ءتىرى كەزىندە مەملەكەتتەن بەرىلگەن باسپانانى قىزىنان اكىمدىك تارتىپ الماقشى، دەپ حابارلايدى «ادىرنا» ءتىلشىسى «Almaty TV» ارناسىنا سىلتەمە جاساپ.
ەلوردا تۇرعىنى جانسايا كادەنوۆا 19 جاسىندا اناسىنان ايىرىلعان. سودان بەرى ول مارقۇم اناسىنا ءبىرىنشى توپتاعى مۇگەدەك رەتىندە بەرىلگەن پاتەردە تۇرىپ كەلگەن. الايدا جەرگىلىكتى بيلىك باسپانانى بوساتۋدى تالاپ ەتپەپتى. كەرىسىنشە اي سايىن جالداۋ اقىسىن تولەپ، ارى قاراي تۇرا بەرۋگە رۇقسات بەرگەن. بيىل قالالىق تۇرعىن ءۇي قورى ونىمەن كەلىسىمشارتتى ۇزارتۋدان باس تارتقان.
«ولار ماعان تۇرا بەرىڭىز، وقۋىڭىزدى اياقتاپ جۇمىسقا ورنالاسقان سوڭ، ءسىز وسى پاتەردى ساتىپ الاسىز دەدى. ءبىز بۇل پاتەرگە كىرگەندە، پاتەردىڭ جاعدايى ناشار بولعان. تەرەزەلەرىنەن، قابىرعالارىنان جەل سوعىپ تۇراتىن. وتباسىلى بولعاننان كەيىن اقىرىنداپ جوندەۋ جۇمىستارىن جۇرگىزە باستادىق»، – قالا تۇرعىنى جانسايا كادەنوۆا.
جانسايانىڭ ايتۋىنشا، اناسى تۇرعىن ءۇي كەزەگىندە بولعان جانە بۇل پاتەر ولارعا ۋاقىتشا پايدالانۋعا بەرىلگەن. بىراق «ۋاقىتشا» ەكەنى ەش قۇجاتتا جازىلماعان. وسى جىلدار ىشىندە ول اي سايىن 14-15 مىڭ تەڭگە كولەمىندە جالداۋ اقىسىن تولەپ وتىردىم دەيدى. الايدا، وتكەن جىلدىڭ سوڭىندا اكىمدىك ونىمەن كەلىسىمشارتتى سوزۋدى توقتاتىپ، پاتەردى بوساتۋدى تالاپ ەتكەن. ويتكەنى ول مەملەكەتتىك قىزمەتكەرلەرگە ارنالعان باسپانا بولىپ سانالادى.
قالالىق تۇرعىن ءۇي قورى ماماندارىنىڭ ايتۋى بويىنشا، بىرىنشىدەن پاتەر كەزەگى كەلگەنشە تۇرۋعا بەرىلگەن. الايدا اناسى ومىردەن وزعاننان كەيىن جانسايا كەزەكتى ساقتاپ قالۋ ءۇشىن ۋاكىلەتتى ورگاندارعا ءوتىنىش جازۋى ءتيىس بولعان.
«قىزىمەن جانە وتباسى مۇشەلەرىمەن كەزەكتى ساقتاپ قالۋ ءۇشىن ەشقانداي امالدار جاساعان جوق. ول كىسى ۋاكىلەتتى ورگانعا نەمەسە حقو-عا وتىنىشپەن بارۋ كەرەك ەدى. بىراق ول كىسى ولاي جاساعان جوق. قازىرگى تاڭدا ول كىسى كەزەكتە تۇرعان جوق. ەكىنشىدەن، بۇل پاتەر 2018 جىلى نۇر-سۇلتان قالاسى تۇرعىن ءۇي قورىنىڭ بالانسىنا بەرىلگەن. تۇرعىن ءۇي قورىنىڭ بالانسىنداعى پاتەرلەر تەك قانا بيۋدجەتتىك جانە مەملەكەتتىك مەكەمەلەردىڭ قىزمەتكەرلەرىنە بەرىلەدى»، – دەدى قالالىق «تۇرعىن ءۇي قورى» كمم زاڭ ءبولىمى باسشىسىنىڭ مىندەتىن اتقارۋشى ابىلاي ماحاتوۆ.
بۇل رەتتە زاڭگەر روزا باقتىعاليەۆانىڭ ايتۋىنشا، اناسى قايتىس بولعاننان كەيىن مەملەكەتتىك قورداعى جىلجىمايتىن مۇلىككە بارلىق قۇقىق، سونداي-اق باسپانا كەزەگى دە ونىڭ قىزىنا اۆتوماتتى تۇردە اۋىسۋى ءتيىس ەدى دەپ سانايدى.
«تۇرعىن ءۇي قاتىناستارى تۋرالى» زاڭ بويىنشا ءبىرىنشى جانە ەكىنشى توپتاعى مۇگەدەكتەر مەملەكەتتىك تۇرعىن ءۇي قورىنان قايتارىمسىز نەگىزدە تۇرعىن ءۇي الادى. تيىسىنشە، بۇل قۇقىقتار ولاردىڭ بالالارىنا وتەدى»،– دەدى زاڭگەر روزا باقتىعاليەۆا.
اكىمدىكتەگىلەر وتباسىن بۇگىن-ەرتەڭ دالاعا قۋىپ شىقپايمىز دەيدى. كامەلەت جاسىنا تولماعان بالالارى بولعاندىقتان جىلىتۋ ماۋسىمى اياقتالعانعا دەيىن پاتەردى پانالاۋعا رۇقسات بەرمەك. سونىمەن قاتار، ءالى دە شەشىمنىڭ كۇشى ەنبەگەندىكتەن، 1 اي ىشىندە شاعىمدانۋعا قۇقىعى بارىن ايتتى.
«ادىرنا» ۇلتتىق پورتالى
