Nur-Sultanda birinshi toptaǵy múgedekke tiri kezinde memleketten berilgen baspanany qyzynan ákimdik tartyp almaqshy, dep habarlaıdy «Adyrna» tilshisi «Almaty TV» arnasyna silteme jasap.
Elorda turǵyny Jansaıa Kádenova 19 jasynda anasynan aıyrylǵan. Sodan beri ol marqum anasyna birinshi toptaǵy múgedek retinde berilgen páterde turyp kelgen. Alaıda jergilikti bılik baspanany bosatýdy talap etpepti. Kerisinshe aı saıyn jaldaý aqysyn tólep, ary qaraı tura berýge ruqsat bergen. Bıyl qalalyq turǵyn úı qory onymen kelisimshartty uzartýdan bas tartqan.
«Olar maǵan tura berińiz, oqýyńyzdy aıaqtap jumysqa ornalasqan soń, siz osy páterdi satyp alasyz dedi. Biz bul páterge kirgende, páterdiń jaǵdaıy nashar bolǵan. Terezelerinen, qabyrǵalarynan jel soǵyp turatyn. Otbasyly bolǵannan keıin aqyryndap jóndeý jumystaryn júrgize bastadyq», – qala turǵyny Jansaıa Kádenova.
Jansaıanyń aıtýynsha, anasy turǵyn úı kezeginde bolǵan jáne bul páter olarǵa ýaqytsha paıdalanýǵa berilgen. Biraq «ýaqytsha» ekeni esh qujatta jazylmaǵan. Osy jyldar ishinde ol aı saıyn 14-15 myń teńge kóleminde jaldaý aqysyn tólep otyrdym deıdi. Alaıda, ótken jyldyń sońynda ákimdik onymen kelisimshartty sozýdy toqtatyp, páterdi bosatýdy talap etken. Óıtkeni ol memlekettik qyzmetkerlerge arnalǵan baspana bolyp sanalady.
Qalalyq turǵyn úı qory mamandarynyń aıtýy boıynsha, birinshiden páter kezegi kelgenshe turýǵa berilgen. Alaıda anasy ómirden ozǵannan keıin Jansaıa kezekti saqtap qalý úshin ýákiletti organdarǵa ótinish jazýy tıis bolǵan.
«Qyzymen jáne otbasy múshelerimen kezekti saqtap qalý úshin eshqandaı amaldar jasaǵan joq. Ol kisi ýákiletti organǵa nemese HQO-ǵa ótinishpen barý kerek edi. Biraq ol kisi olaı jasaǵan joq. Qazirgi tańda ol kisi kezekte turǵan joq. Ekinshiden, bul páter 2018 jyly Nur-Sultan qalasy turǵyn úı qorynyń balansyna berilgen. Turǵyn úı qorynyń balansyndaǵy páterler tek qana bıýdjettik jáne memlekettik mekemelerdiń qyzmetkerlerine beriledi», – dedi qalalyq «Turǵyn úı qory» KMM zań bólimi basshysynyń mindetin atqarýshy Abylaı Mahatov.
Bul rette zańger Roza Baqtyǵalıevanyń aıtýynsha, anasy qaıtys bolǵannan keıin memlekettik qordaǵy jyljymaıtyn múlikke barlyq quqyq, sondaı-aq baspana kezegi de onyń qyzyna avtomatty túrde aýysýy tıis edi dep sanaıdy.
«Turǵyn úı qatynastary týraly» zań boıynsha birinshi jáne ekinshi toptaǵy múgedekter memlekettik turǵyn úı qorynan qaıtarymsyz negizde turǵyn úı alady. Tıisinshe, bul quqyqtar olardyń balalaryna ótedi»,– dedi zańger Roza Baqtyǵalıeva.
Ákimdiktegiler otbasyn búgin-erteń dalaǵa qýyp shyqpaımyz deıdi. Kámelet jasyna tolmaǵan balalary bolǵandyqtan jylytý maýsymy aıaqtalǵanǵa deıin páterdi panalaýǵa ruqsat bermek. Sonymen qatar, áli de sheshimniń kúshi enbegendikten, 1 aı ishinde shaǵymdanýǵa quqyǵy baryn aıtty.
«Adyrna» ulttyq portaly
