15 جاسار بالا اناسىن ءولتىردى دەگەن كۇدىكپەن قاماۋعا الىندى

3273
Adyrna.kz Telegram

الماتىدا اناسىن ءولتىردى دەگەن كۇدىكپەن 15 جاسار بالا قاماۋعا الىندى، دەپ حابارلايدى «ادىرنا» ءتىلشىسى «كتك» تەلەارناسىنا سىلتەمە جاساپ.

ءجاسوسپىرىم جانجال كەزىندە اناسىن پىشاقتاپ، كوشەگە جالاڭاياق شىعىپ كەتكەن. جانتۇرشىگەرلىك قىلمىس بولعان ءۇيدىڭ تۇرعىندارى قاتتى شوشىپ قالعان.

«بالانى ءبىر-ەكى رەت قانا كورگەم. قايتىس بولعان كەلىنشەكتى جاقسى تانيمىن. وتە اقجارقىن ادام بولاتىن. ءبىزدىڭ پودەزدىڭ بەلسەندىسى ەدى. مەن ەشتەڭە ەستىگەن جوقپىن. تاڭەرتەڭ تىنىش بولدى. پوليتسيا كەلگەن سوڭ عانا قىلمىس جاسالعانىن بىلدىك. تۇرعىنداردىڭ ءبارى قورقىپ قالعان»،-دەدى كورشىسى ەۆگەني ۆاسيلەۆ.

قاندى قىلمىس تاڭعى ساعات بەس شاماسىندا كوپقاباتتى ۇيدە بولعان. كورشىلەرى بۇل وتباسىنىڭ بۇرىن-سوڭدى ۇرىسقانىن ەستىمەدىك دەپ وتىر. ولاردىڭ ايتۋىنشا، اۋرۋحاناعا جەتپەي جان تاپسىرعان جالعىزباستى ايەل زاڭبۇزۋشىلىققا قارسى شىعىپ، بەلسەندىلىگىمەن ءجيى كوزگە تۇسكەن. ال اناسىنا بىرنەشە جەردەن پىشاق سۇققان سوڭ كامەلەتكە تولماعان بالا دالادا جالاڭاياق ارلى-بەرلى ءجۇرىپتى. قىستىڭ كوزى قىراۋدا قار ۇستىمەن اياق كيىمسىز جۇرگەن ءجاسوسپىرىمنىڭ وعاش قىلىعىن كورگەن تۇرعىندار بىردەن ءتارتىپ ساقشىلارىن شاقىرتقان. پوليتسيا وقيعا ورنىنا جەتىپ، بوزبالانىڭ قىلمىس جاساعانى بەلگىلى بولعان. كۇدىكتى بىردەن قۇرىقتالىپ، قايعىلى وقيعاعا قاتىستى قىلمىستىق ءىس قوزعالدى.

«قازىر قك-ءتىڭ 99-بابى، 1-تارماعىمەن قىلمىستىق ءىس قوزعالىپ، ءتيىستى تەرگەۋ جۇرگىزىلۋدە. بۇل تەرگەۋ ارەكەتتەرىنە مىندەتتى تۇردە پسيحولوگ ماماندار قاتىسۋدا. الدىن الا بولجام بويىنشا، بۇل بالادا جۇيكە اۋىتقۋى بولۋى مۇمكىن. بىراق ونى ناقتى سوت-پسيحياتريالىق ساراپتاما انىقتايدى»،-دەپ مالىمدەدى الماتى قالالىق پد رەسمي وكىلى سالتانات ازىربەك.

«ادىرنا» ۇلتتىق پورتالى

پىكىرلەر