شۆەيتساريا قازاقستاندا "جۇزدەگەن ميلليون دوللار جىمقىردى" دەپ ايىپتالىپ، سىرتتاي سوتتالعان الماتىنىڭ بۇرىنعى اكىمى ۆيكتور حراپۋنوۆ پەن ايەلى لەيلا حراپۋنوۆاعا ساياسي باسپانا بەردى دەپ حابارلايدى "ادىرنا" ۇلتتىق پورتالى ازاتتىققا سىلتەمە جاساپ. بۇل اقپاراتتى 7 قاڭتاردا شۆەيتساريا فەدەرالدىق اكىمشىلىك سوتى حابارلادى.
"سوت ەرلى-زايىپتىنىڭ ەلدەن كەتىپ، ساياسي وپپوزيتسيالىق قىزمەت جاساۋىن 2019 جىلى وتستاۆكاعا كەتكەنىنە قاراماستان ەلدىڭ قۇقىقتىق جۇيەسىنە ىقپالى بار قازاقستاننىڭ بۇرىنعى پرەزيدەنتى نۇرسۇلتان نازارباەۆقا ادالدىق تانىتپاۋى دەپ بىلەدى. ەگەر ەرلى-زايىپتىلار ەلىنە قايتارىلسا، ول جاقتا ادىلەتسىز سوتقا تارتىلۋى مۇمكىن" دەلىنگەن ءباسپاسوز حابارلاماسىندا.
سوت حابارلاماسىندا بۇعان قوسا، حراپۋنوۆتاردىڭ "قازاقستان مەن شۆەيتساريادا قازاق بيلىگى ۇيىمداستىرعان اقپاراتتىق كامپانيانىڭ" نىسانىنا اينالعانى جازىلعان.
"ولار [ەرلى-زايىپتى حراپۋنوۆتار] سونىمەن بىرگە شۆەيتساريادا كيبەرشابۋىل مەن قازاقستاندىق قۇپيا قىزمەتتىڭ اڭدۋىنا ۇشىرادى، ءوز ەلىندە جانە شەتەلدە قىلمىستىق ىستەر بويىنشا قۋدالاندى" دەلىنگەن حابارلامادا.
لەيلا حراپۋنوۆا Facebook-تاعى پاراقشاسىندا "قۋانىشتى حابارمەن" ءبولىسىپ، "شۆەيتساريا وسىنداي شەشىم ارقىلى حراپۋنوۆتاردىڭ ساياسي سەبەپپەن قۋدالانىپ جاتقانىن رەسمي تۇردە مويىندادى" دەپ جازدى.
قازاقستان بيلىگى ازىرگە اقپاراتقا رەاكتسيا بىلدىرمەدى.
الماتىنىڭ بۇرىنعى اكىمى، قازاقستاننىڭ بۇرىنعى ەنەرگەتيكا ءمينيسترى، 72 جاستاعى ۆيكتور حراپۋنوۆ قازىر شۆەيتساريادا تۇرىپ جاتىر. حراپۋنوۆقا جانە ونىڭ جاقىندارىنا قازاقستان بيلىگى سىبايلاس جەمقورلىق ايىپتارى بويىنشا ىزدەۋ جاريالاعان.
2018 جىلى قازاقستان سوتى ۆيكتور حراپۋنوۆتى - 17 جىلعا، ونىڭ ايەلى لەيلا حراپۋنوۆانى 14 جىلعا سىرتتاي سوتتاعان. ەرلى-زايىپتى حراپۋنوۆتارعا “قىلمىستىق توپ قۇرۋ", "الاياقتىق", "پارا الۋ" ايىپتارى تاعىلعان. سوت ماتەريالدارىنا سايكەس، ولاردىڭ "قىلمىستىق ارەكەتىنەن مەملەكەتكە 250 ميلليون دوللار كولەمىندە شىعىن كەلگەن". Facebook جەلىسىندە قازاقستاندىق قولدانۋشىلارمەن بەلسەندى ارالاسىپ وتىراتىن حراپۋنوۆتار بۇل ايىپتاردى جوققا شىعارىپ، قىلمىستىق ىستەردىڭ ساياسيلانعانىن مالىمدەگەن.
شۆەيتساريا فەدەرالدىق اكىمشىلىك سوتىنىڭ مالىمەتىنشە، حراپۋنوۆتار شۆەيتساريا بيلىگىنەن 2013 جانە 2016 جىلدارى ساياسي باسپانا سۇراعان. بىراق بوسقىندار ءىسى تۋرالى زاڭدا كورسەتىلگەن "بوسقىن مارتەبەسىنە ءتان سيپاتتارعا سايكەس كەلمەگەندىكتەن" وتىنىشتەرى قاناعاتتاندىرىلماعان.
