الماتى قالاسىنىڭ الاتاۋ اۋدانىندا وسى اپتادا جاپپاي سىرعاناۋ ماۋسىمى اشىلادى. ناقتى ايتساق، 6 قاراشادا AlmatyArena جاپپاي سىرعاناۋ ماۋسىمىن اشادى. كوركى كوز تارتار قازىرگى زامانعى مۇز سارايى الماتىنىڭ جاڭا دامىپ كەلە جاتقان الاتاۋ اۋدانىندا، ب. مومىشۇلى كوشەسىنىڭ باتىسى مەن رىسقۇلوۆ داڭعىلىنىڭ سولتۇستىك تۇسىندا ورنالاسقان. قالالىقتار مەن الماتى قالاسىنىڭ تۇرعىندارى ەندى جاڭا مۇز سارايىندا سىرعاناق تەبە الاتىن بولادى.
ايتا كەتەيىك، AlmatyArena حالىقارالىق نورمالار، ونىڭ ىشىندە، حالىقارالىق شايبالى حوككەي فەدەراتسياسى ء(ىىHF) مەن قۇرلىقتىق حوككەي ليگاسى (KHL) تالاپتارىنا ساي سالىنعان. سارايدى تۇرعىزۋ كەزىندە قازىرگى زامانعى قۇرىلىس ماتەريالدارى مەن تەحنولوگيالارى قولدانىلعان. مۇزدى ارەنا ادام كوپ جينالاتىن ورىن بولاتىندىقتان قاۋىپسىزدىك جۇيەسىنە، ونىڭ ىشىندە سەيسمولوگيالىق قاۋىپسىزدىككە ەرەكشە كوڭىل بولىنگەن.
– سىرتتاعى اۋا رايىنا بايلانىستى ءبىز مۇز ايدىنىنىڭ تەمپەراتۋراسىن پاۆيلونداعى قولايلى +18 گرادۋسقا دەيىن رەتتەپ وتىرا الامىز، – دەپ اتاپ ءوتتى ۋنيۆەرسيادا 2017-گە قارسى سالىنعان Almaty Arena, Halyk Arena جانە اتلەتتەر قالاشىعىنىڭ باسقارۋشى كومپانياسى الماتى قالاسىنىڭ سپورت قۇرىلىستارى ديرەكتسياسىنىڭ ديرەكتورى سەرگەي اپەنكو.
ەستەرىڭىزگە سالا كەتەيىك، جاپپاي سىرعاناۋ AlmatyArena, HalykArena ساحنالارى مەن الاڭدارىندا كونتسەرتتەردى نەمەسە سپورتتىڭ باسقا تۇرلەرىنەن جارىستار وتكىزىلۋىنە بوگەت بولمايدى. مۇز كەشەندەرىنىڭ ارقايسىسى ەكى ايدىننان قامتيدى – نەگىزگى (تيىسىنشە 12 000 جانە 3 000 كورەرمەندىك سپورتتىق-كونتسەرتتىك ءىس-شارالار ءۇشىن) جانە جالپى سىرعاناۋ (سپورتشىلاردىڭ جاتتىعۋى ءۇشىن جانە جاپاي سىرعاناۋ ءۇشىن).
الماتى قالاسىنىڭ سپورت قۇرىلىستارى ديرەكتسياسى حابارلاعانداي، Almaty Arena جالپى سىرعاناۋ ايدىنىنا جالعا العان حوككەيلىك نەمەسە مانەرلىك كونكيلەردى عانا ەمەس، وزدەرىڭىزدىكىمەن دە كەلۋگە بولادى. ءاربىر سەانس اياقتالعاننان كەيىن مۇز تازالانىپ وتىرادى. ەكى ساعاتتىق سىرعاناۋدىڭ قۇنى بالالار ءۇشىن 300-دەن 500 تەڭگەگە دەيىن قۇرايدى، ەرەسەكتەرگە – 500-دەن 1 000 تەڭگەگە دەيىن. تەگىن كىرۋ 7 جاسقا دەيىنگى بالالارعا، ءى-ءىى توپ مۇگەدەكتەرگە، كوپ بالالى وتباسىلارىنىڭ بالالارىنا جانە جەتىمدەر ءۇيىنىڭ تاربيەلەنۋشىلەرىنە قاراستىرىلعان. وقۋشىلار، ستۋدەنتتەر، زەينەتكەرلەر جانە ءىىى توپ مۇگەدەكتەرى جەڭىلدىكپەن سىرعاناق تەبە الادى. جاپپاي سىرعاناۋ سەنبى جانە جەكسەنبى كۇندەرى ساعات 11.00-دەن 23.00-گە دەيىن اشىق بولادى.
ەستەرىڭىزگە سالا كەتەيىك، الماتى قالاسىندا 28-قىسقى ستۋدەنتتىك ويىندار ۋنيۆەرسيادا-2017 قارساڭىندا ەكى زاماناۋي كوپفۋنكتسيونالدى Almaty Arena جانە Halyk Arena مۇز ايدىندارى سالىنىپ، پايدالانۋعا بەرىلگەن. ەڭ ءىرى سپورتتىق قۇرىلىس Almaty Arena, ونىڭ سىيىمدىلىعى – 12 000 كورەرمەن. الماتىلىقتار مەن قالا قوناقتارىنا Almaty Arena مۇز ايدىنى الماتى قالاسىنىڭ مىڭ جىلدىعىنا ارنالعان عالامات شوۋ، MuzZone تەلەارناسىنىڭ مۋزىكالىق سىياقى كونتسەرتىمەن جانە تاياۋدا عانا وتكەن ايتۋلى بوكس جەكپە-جەگى – قانات يسلام مەن پاتريك اللوپەي اراسىنداعى ۇرىس ارقىلى تانىلا باستادى.
حالىقارالىق جارىستاردان كەيىن AlmatyArena سپورت مەكتەپتەرىنىڭ، كاسىبي جانە اۋەسقوي كوماندالاردىڭ جاتتىعاتىن ورنىنا اينالادى. سونىمەن قاتار، ول ادامدار سىرعاناق تەبەتىن ايدىن رەتىندە دە پايدالانىلادى. ويتكەنى، كەشەن باستاپقىدا دەنەشىنىقتىرۋمەن اينالىسىپ، سالاماتتى ءومىر سالتىن ۇستانعىسى كەلەتىن ادامدار ءۇشىن سالىنعان.
سەرىك جۇماباەۆ،
"الماتى اقشامى"
