پرەزيدەنت ماقالاسى مەملەكەتىمىزدىڭ بولاشاق سۇلباسىن قالىپتاستىرۋدا قۋاتتى يدەولوگيالىق نەگىز بولادى – ەرلان كارين

1711
Adyrna.kz Telegram

مەملەكەت باسشىسى قاسىم-جومارت توقاەۆتىڭ ماقالاسى مەملەكەتىمىزدىڭ بولاشاق سۇلباسىن قالىپتاستىرۋدا قۋاتتى يدەولوگيالىق نەگىز بولادى. مۇنداي پىكىردى قر پرەزيدەنتىنىڭ كومەكشىسى ەرلان كارين ءبىلدىردى، دەپ حابارلايدى قازاقپارات ءتىلشىسى.

«بۇگىن قر پرەزيدەنتى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى باعدارلامالىق ماقالاسى جارىق كوردى. ءىس جۇزىندە بۇل ماقالا تاۋەلسىزدىكتىڭ 30 جىلدىعى جىلىن اشىپ، وسىناۋ مەجەلى جىلعا باعىت بەرۋمەن قاتار، باستى جۇمىستارعا ەكپىن بەرەدى.

پرەزيدەنت قازاقستاننىڭ ەگەمەن دامۋىنىڭ وتكەن وتىز جىلدىعىنداعى نەگىزگى قورىتىندىسىن شىعارىپ، جاڭا كەزەڭدەگى دامۋ باسىمدىقتارىن ايقىندايدى. ول ءتورتىنشى ونجىلدىقتىڭ باستى ماقساتى رەتىندە ءادىل قوعام مەن ءتيىمدى مەملەكەت قۇرۋدى ايقىنداپ بەردى. بۇل رەتتە ەلدىڭ كەز كەلگەن جەتىستىگى بارشا ازاماتتىڭ شىنايى يگىلىگىمەن ولشەنۋى تيىستىگىنە تاعى ءبىر مارتە باسا ءمان بەرۋ قاسىم-جومارت توقاەۆىڭ ماقالاسىنا ءتان. بۇل پرەزيدەنتتىڭ مەملەكەت باسشىسى لاۋازىمىنداعى بارلىق شەشىمدەرىنە نەگىزدەلگەن تۇبەگەيلى سەنىمدەرىنىڭ ءبىرى»، - دەدى ول.

ونىڭ اتاپ وتۋىنشە، پرەزيدەنت ماقالاسىندا كوپتەگەن جاڭا يدەيا مەن ۇسىنىستار بار. ولار گۋمانيتارلىق عىلىمدى دامىتۋ، تاريحي سانانى قالىپتاستىرۋ، مەملەكەتتىك ءتىلدىڭ ءرولى، ەتنوسارالىق كەلىسىمدى ساقتاۋ جانە جاستاردى قولداۋ سىندى سالالاردى قامتيدى. وسى رەتتە ەرلان كارين مەملەكەت باسشىسىنىڭ ساياسي جاڭعىرۋ جونىندە ايتقان سوزدەرىنە ەرەكشە نازار اۋدارادى. «پرەزيدەنت رەفورمالاردى اقىلعا قونىمدى ءارى جۇيەلى جۇزەگە اسىرۋ قاجەتتىگىن ەرەكشە اتاپ ءوتتى.

دەگەنمەن، ونى سوزا بەرۋگە بولمايتىندىعىن دا ەكسەرتتى. قاسىم-جومارت توقاەۆ بيلىك حالىق الدىنداعى جاۋاپكەرشىلىگىن بارلىق ۋاقىتتا سەزىنۋى تيىستىگىنە نازار اۋدارتتى. وسىعان وراي مەملەكەت باسشىسى العاشقى رەت اۋىل اكىمدەرىن سايلاۋدان كەيىن، اۋدان اكىمدەرىن سايلاۋ وتەتىندىگىن ايتتى. بۇل تەتىك ءىس جۇزىندە ءوزىنىڭ تيىمدىلىگىن كورسەتەتىن بولسا، وندا كەلەسى دەڭگەيدەگى اكىمدەردى سايلاۋعا كوشۋ تۋرالى شەشىم قابىلداناتىن بولادى.

شىن مانىندە بۇل بۇگىنگى ماقالاداعى ەڭ نەگىزگى تەزيستەردىڭ ءبىرى»، - دەدى پرەزيدەنت كومەكشىسى. سونىمەن قاتار ول مەملەكەتتىگىمىزدىڭ جاڭا تاريحي كەزەڭىندەگى قازاقستان پرەزيدەنتىنىڭ ماقالاسى بولاشاقتىڭ سۇلباسىن قالىپتاستىراتىن قۋاتتى يدەولوگيالىق نەگىز بولاتىندىعىن باسا ايتادى.

پىكىرلەر