اقش بەلورۋسسيادا وتكەن پرەزيدەنت سايلاۋىن لەگيتيمدى دەپ مويىندامايدى. بەلورۋسسيادا وتكەن پرەزيدەنت سايلاۋى وبسە تالاپتارىنا مۇلدەم ساي كەلمەيدى. اقش-تىڭ وكىلدەر پالاتاسى بەلورۋسسياداعى جاعدايعا بايلانىستى ارنايى زاڭداردى قاراپ، سانكتسيالار پاكەتتەرىن دايىنداپ جاتقانىن حابارلادى. بۇل زاڭ جوبالارى رەسپۋبليكاشىلدار باستاعان كريستوفەر ءسميتتىڭ باستاماسىمەن قارالۋدا.
اقش-تىڭ وكىلدەر پالاتاسى بەلورۋسسياداعى پرەزيدەنت سايلاۋىنداعى فالسيفيكاتسيا جاساعان ورتالىق سايلاۋ كوميسسياسىنىڭ توراعالارىنىڭ، باق باسشىلارىنىڭ، جاپپاي قۋعىنداۋعا كىرىسكەن ورگاندار باسشىلارىنىڭ، ادام قۇقى مەن بوستاندىعىن شەكتەگەن بارلىق پروتسەدۋرالاردىڭ ءبارىن ەسكەرىپ، زاڭدى ماقۇلداپ جاقىندا تاققا وتىراتىن پرەزيدەنتكە جولدايدى. زاڭ پروەكتىلەرىنىڭ دايىندالۋى دا پرەزيدەنتتىڭ تاققا كەلۋىمەن تۇسپا-تۇس كەلىپ جاتىر. زاڭنىڭ ىشىندە بەلورۋسسيادا بولىپ جاتقان تسەنزۋراعا قارسى كومەك، ينتەرنەت جەلىسىنىڭ شەكتەلگەنىنە كومەك كورسەتۋ، ساياسي قۋعىنعا ۇشىراعاندارعا قول ۇشىن بەرۋ قاراستىرىلعان.
لۋكاشەنكو اقش-تىڭ دەگەنىن ورىنداۋعا ءماجبۇر
2021 جىلدىڭ 11-12 اقپانىندا لۋكاشەنكو ەلدىڭ كونستيتۋتسياسىنا تۇبەگەيلى وزگەرىستەر ەنگىزۋ شارالارىن وتكىزبەك. بۇل شاراعا ەلدەگى تۇتاس قوعامدىق ۇيىمدار، ازاماتتىق اليانستار، وپپوزيتسيالىق كۇشتەردىڭ بارلىعىنا قاتىسۋعا مۇمكىندىك تۋىپ تۇر. سەبەبى، لۋكاشەنكو ءوزى تۇتاس بەلورۋس حالقىن وسى شاراعا شاقىرىپ جاتىر. لۋكاشەنكو اقش-تىڭ سانكتسياسى مەن قىسىمىنان قورقىپ وتىر. ەلدەگى 4-5 اي بويىنا سوزىلعان دۇمپۋلەر ەلدىڭ ەكونوميكاسىن تىعىرىققا تىرەپ، كوپتەگەن ءوندىرىس ورىندارى مەن كاسىپورىندار جۇمىسىن توقتاتقان. مەملەكەتتىڭ بيۋدجەتىنە تۇسكەن سالماق وتە اۋىر. ەكىنشى جاعىنان اقش پەن ەۋرووداقتىڭ سانكتسياسى قىسپاققا العالى تۇر. سوندىقتان لۋكاشەنكو الدىن الا وسىنداي قادامعا بارعالى وتىر. سولاي جاساۋعا ءماجبۇر.
فوتو اشىق دەرەككوزدەن الىندى.
