ءانشى ديماش قۇدايبەرگەن «روسسيا» تەلەارناسىندا كورسەتىلگەن «پريۆەت، اندرەي» باعدارلاماسىنا قاتىستى وتانداستارىنىڭ سىنىنا جاۋاپ بەردى. بۇل تۋرالى ول الەۋمەتتىك جەلىدەگى پاراقشاسىندا جازدى، دەپ حابارلايدى «ادىرنا» ءتىلشىسى aikyn.kz-كە سىلتەمە جاساپ.
قىمباتتى دوستار! كەشە «روسسيا» ارناسىنان كورسەتىلگەن «پريۆەت، اندرەي» باعدارلاماسىن كورگەن بولارسىزدار. از عانا، بىراق مەن ءۇشىن ماڭىزدى ەپيزود بولعان ەدى، ول ەفيرگە شىقپاي قالدى. مەن ءوز وتانىمدى جاقسى كورەتىنىمدى، جەرلەستەرىمدى جاقسى كورەتىنىمدى ايتقان بولاتىنمىن. 2013 جىلى بولعان «ساز الەمى» جوباسىنداعى جاعداي تۇتاس قازاق حالقىنىڭ ماعان دەگەن قارىم-قاتىناسىنىڭ كورسەتكىشى ەمەس. مەن وسى باعدارلاماعا دەيىن ءدال وسىلاي ءان شىرقادىم جانە حالىقارالىق بايقاۋلاردا جەڭىسكە جەتتىم، ءوز قالاۋىم بويىنشا ءان ايتا بەرەمىن جانە ءوز جۇمىسىمدى ءوزىم قالاعانداي ىستەيمىن. مەنىڭ اتا-انام، تۋىستارىم، دوستارىم بار، ولار ماعان بارىنە كومەكتەسەدى. بىراق مەنىڭ وسى دارەجەگە جەتكەنىم قازاقستاننىڭ ارقاسىندا. مەن قازاقستاندا ءوستىم، قازاق تاعامدارىن جەدىم، قازاق ۆوكال مۇعالىمىنەن وقىدىم، قازاق وتباسىندا ءوستىم. مەنى العا جەتەلەيتىن – مەنىڭ ۇلتىم جانە مەنىڭ ەلىم! امەريكا نەمەسە قىتاي بولسىن، حالىقارالىق جارىستارعا مەن ءبىر عانا نيەتپەن باردىم، ەلىمىزدىڭ ابىرويىن اسقاقتاتۋ ءۇشىن. مۇنداي تالاپ-تىلەگىم بولماسا، مۇمكىن مەن شەتەلدە ونەر كورسەتپەس ەدىم. 2013 جىلعى ۆيدەو تۋرالى ايتار بولسام، دوستار، شىنىمدى ايتسام، مەن بۇل ۆيدەونى قايتادان كورەمىن دەپ ويلاعان جوقپىن، ويتكەنى ونى ۇمىتىپ تا كەتكەن ەدىم. «رەسەيلىك ارىپتەستەرىمنىڭ الدىندا ءوز انشىلەرىمىزدى قورعاي المادى، ءالى كۇنگە دەيىن بىرەۋگە وكپەلى» دەپ ويلاپ قالماڭىزدار. قاجەتسىز ەستەلىكتەردى ۇمىتا الامىن. وتانداستىرىمدى قورعاپ سويلەگەن ءسوزىمدى ەفيردەن كورسەتپەگەن ەكەن. قۇرمەتتى دوستار، بۇرىنعى ۆيدەونى جىبەرۋدى دوعارساڭىزدار. قانشا جىل وتسە دە، ادامدار ول ۆيدەونى تالقىلاۋدى دوعارار ەمەس. بالا كەزىمنەن مەن سىنعا دايىن بولدىم، وبەكتيۆتى بولسىن، وبەكتيۆتى ەمەس بولسىن، مەنىڭ ار-نامىسىما تيۋ وتە قيىن. سول ۆيدەوداعى ادامدارعا كوپ جامان سوزدەر ايتىلىپ جاتىر. اركىمنىڭ ءوز پىكىرى بار، ولاردىڭ پىكىرى وزگەرسىن، وزگەرمەسىن ءبارى ارتتا قالدى. اركىمنىڭ ءوز وتباسى، بالالارى بار. ءاربىر ەلدە وسى ۆيدەو تۋرالى ايتقاندى ءوزىم دە ۇناتپايمىن. بولعان نارسە، بولدى. ءوز باسىم مۇنى بۇرىندا ۇمىتقانمىن. قازىرگى قيىن جاعدايدا ءبىز-ءبىرىمىزدى قولداۋىمىز كەرەك. ەشكىمدى رەنجىتپەيىك»، – دەدى ديماش قۇدايبەرگەن.
«ادىرنا» ۇلتتىق پورتالى
