Ánshi Dımash Qudaıbergen «Rossııa» telearnasynda kórsetilgen «Prıvet, Andreı» baǵdarlamasyna qatysty otandastarynyń synyna jaýap berdi. Bul týraly ol áleýmettik jelidegi paraqshasynda jazdy, dep habarlaıdy «Adyrna» tilshisi aikyn.kz-ke silteme jasap.
Qymbatty dostar! Keshe «Rossııa» arnasynan kórsetilgen «Prıvet, Andreı» baǵdarlamasyn kórgen bolarsyzdar. Az ǵana, biraq men úshin mańyzdy epızod bolǵan edi, ol efırge shyqpaı qaldy. Men óz Otanymdy jaqsy kóretinimdi, jerlesterimdi jaqsy kóretinimdi aıtqan bolatynmyn. 2013 jyly bolǵan «Saz álemi» jobasyndaǵy jaǵdaı tutas qazaq halqynyń maǵan degen qarym-qatynasynyń kórsetkishi emes. Men osy baǵdarlamaǵa deıin dál osylaı án shyrqadym jáne halyqaralyq baıqaýlarda jeńiske jettim, óz qalaýym boıynsha án aıta beremin jáne óz jumysymdy ózim qalaǵandaı isteımin. Meniń ata-anam, týystarym, dostarym bar, olar maǵan bárine kómektesedi. Biraq meniń osy dárejege jetkenim Qazaqstannyń arqasynda. Men Qazaqstanda óstim, qazaq taǵamdaryn jedim, qazaq vokal muǵaliminen oqydym, qazaq otbasynda óstim. Meni alǵa jeteleıtin – meniń ultym jáne meniń elim! Amerıka nemese Qytaı bolsyn, halyqaralyq jarystarǵa men bir ǵana nıetpen bardym, elimizdiń abyroıyn asqaqtatý úshin. Mundaı talap-tilegim bolmasa, múmkin men shetelde óner kórsetpes edim. 2013 jylǵy vıdeo týraly aıtar bolsam, dostar, shynymdy aıtsam, men bul vıdeony qaıtadan kóremin dep oılaǵan joqpyn, óıtkeni ony umytyp ta ketken edim. «Reseılik áriptesterimniń aldynda óz ánshilerimizdi qorǵaı almady, áli kúnge deıin bireýge ókpeli» dep oılap qalmańyzdar. Qajetsiz estelikterdi umyta alamyn. Otandastyrymdy qorǵap sóılegen sózimdi efırden kórsetpegen eken. Qurmetti dostar, burynǵy vıdeony jiberýdi doǵarsańyzdar. Qansha jyl ótse de, adamdar ol vıdeony talqylaýdy doǵarar emes. Bala kezimnen men synǵa daıyn boldym, obektıvti bolsyn, obektıvti emes bolsyn, meniń ar-namysyma tııý óte qıyn. Sol vıdeodaǵy adamdarǵa kóp jaman sózder aıtylyp jatyr. Árkimniń óz pikiri bar, olardyń pikiri ózgersin, ózgermesin bári artta qaldy. Árkimniń óz otbasy, balalary bar. Árbir elde osy vıdeo týraly aıtqandy ózim de unatpaımyn. Bolǵan nárse, boldy. Óz basym muny burynda umytqanmyn. Qazirgi qıyn jaǵdaıda biz-birimizdi qoldaýymyz kerek. Eshkimdi renjitpeıik», – dedi Dımash Qudaıbergen.
«Adyrna» ulttyq portaly
