15 جاسار ءجاسوسپىرىم ەكى ايەلدى توناعان، دەپ حابارلايدى «ادىرنا» ءتىلشىسى نۇر-سۇلتان قالاسىنىڭ پوليتسيا دەپارتامەنتىنە سىلتەمە جاساپ.
«20 جاسار قىز پوليتسياعا توناۋ فاكتىسى بويىنشا جۇگىنگەن. جابىرلەنۋشىنىڭ ايتۋى بويىنشا ول تەلەفون ارقىلى كوشەدە سويلەسىپ كەلە جاتقاندا كەنەتتەن ءوزىن بىرەۋدىڭ يتەرىپ جىبەرگەنىن سەزگەن، ارتىنشا تانىس ەمەس ەر ادام ونىڭ قولىنان ۇيالى تەلەفونىن جۇلىپ الىپ، بەلگىسىز باعىتقا قاراي قاشىپ كەتىپ جاسىرىنعان»،-دەلىنگەن حابارلامادا.
نۇر-سۇلتان قالاسى پد «سارىارقا» اۋدانى پب قىزمەتكەرلەرى جەكە باس بەلگىلەرى بويىنشا جەدەل-ىزدەستىرۋ ءىس-شارالارىن جۇرگىزۋ بارىسىندا كۇدىكتى ادامدى انىقتاعان.
توناۋشى ەلوردا مەكتەپتەرىنىڭ بىرىندە وقيتىن 15 جاسار ءجاسوسپىرىم بولىپ شىققان. كامەلەتتىك جاسقا تولماعان بالانىڭ بۇعان دەيىن زاڭمەن پروبلەمالارى بولماعان جانە تولىق قولايلى وتباسىندا تاربيەلەنۋدە.
تەرگەۋ بارىسىندا بۇل مەكتەپ وقۋشىسى جاساعان العاشقى توناۋ ەمەس ەكەنى انىقتالدى. اعىمداعى جىلدىڭ قاراشا ايىندا تاۋلىكتىڭ تۇنگى ۋاقىتىندا ول بالاسىمەن ۇيىنە قاراي كەلە جاتقان ايەل ادامنىڭ سومكەسىن قولىنان جۇلىپ العان. پوليتسياعا جۇگىنگەن جابىرلەنۋشىنىڭ ايتۋىنشا ول ەر ادامعا قاراپ ۇلگەرمەگەن، قىزى ءۇشىن قاتتى قورقىپ كەتكەن. ۇرلانعان سومكەسىندە جەكە باس كۋالىگى، بانك كارتاسى، ىشىندە شامالى اقشاسى بار ءاميان بولعان.
كامەلەتتىك جاسقا تولماعان بالا ەكى توناۋ فاكتىسى بويىنشا مويىنداۋ ايعاعىن بەردى، سونداي-اق ۇرلانعان ايەل سومكەسىن بەلگىسىز جەرگە لاقتىرىپ جىبەرگەنىن، تەلەفوندى قولدان وتكىزگەنىن ايتتى.
اتالعان فاكتى بويىنشا سوتقا دەيىنگى تەرگەپ-تەكسەرۋ جۇرگىزىلۋدە. ونىڭ بۇعان دەيىن ەلوردا اۋماعىندا جاسالعان قىلمىستارعا قاتىستىلىعى تەكسەرىلۋدە.
«ادىرنا» ۇلتتىق پورتالى
