تاعى دا سايلاۋ تۋرالى. «Nur Otan» كەرەمەت ءادىس تاۋىپ الىپتى. پرايمەريز دەپ جۇرگەندەرىندە گاپ بار ەكەن، سول ارقىلى ەل ىشىندەگى وسى قالاي دەگەن ءبىرشاما بەلسەندى، نەمەسە وزىندىك پىكىرى بار (بىراق پىكىرى باسشىلاردى، ۇكىمەتتى، اكىمدىكتەردى، ت.ب. سىنامايتىن، سىناسا دا ەشكىمنىڭ فاميليا، اتى-ءجونىن ايتپاي جالپىلاما ايتاتىن) ازاماتتاردى تاۋىپ، بىرقاتارىن ماجىلىسكە، قالعاندارىن ماسليحاتقا كانديدات قىلىپ پارتيالىق تىزىمگە قوسىپ جىبەرىپتى. قازىر سولار ءۇي-ءۇيدى ارالاپ، اۋىلدان اۋىل قويماي، ۇگىت-ناسيحاتتى جاپپاي جۇرگىزىپ جاتىر. قاراساڭ كوزىڭ قيمايتىنداي-اق، كىلەڭ تانىس جىگىتتەر مەن قىز-كەلىنشەكتەر، مەكەمە باسشىلارى، مەكتەپ ديرەكتورلارى دەگەندەي. ايتەۋىر باياعىداي ەڭبەك ادامى دەيتىندەر جوق، ەڭ از دەگەنى – اسابالار.
بۇلاردىڭ ماجوريتارلىق سيستەمادان نەگە قاشقاندارى دا تۇسىنىكتى بولدى – وسىنداي ادىسپەن پارتيالىق ءتىزىمدى وتكىزىپ الادى دا، سوسىن ناقتى فاميلياعا كەلگەندە وزدەرى كىمدى قالاسا سونى وتكىزە قويادى. مىسالى داريعا نازارباەۆا جەكە دارا داۋىسقا تۇسسە ءجاي وتپەگەنى بىلاي تۇرسىن، ناعىز ماسقارالىقپەن ۇشىپ كەتەر ەدى، ەندى جالپى ءتىزىمنىڭ ىشىندە ول الدىڭعى ورىنداردىڭ بىرىمەن دەپۋتاتتىققا وتەتىن بولار دەپ شامالايمىن.
بۇدان شىعاتىن قورىتىندى – ەلگە تانىمال، كوزگە ءتۇسىپ ءجۇر دەگەن بەلسەندى ازاماتتاردىڭ بارلىعى دەرلىك «Nur Otan»-نىڭ تىزىمىنە ەنگەن دە، ونشا تانىمال ەمەس تۇلعالار عانا قالعان پارتيالارعا ءبولىنىپ بەرىلگەن. ياعني ول جەردە دە تامىر-تانىستىق ورىن الىپ وتىرعانى بايقالادى.
ءجارايدى، ەندى ءوزىمىز داۋىس بەرگەلى وتىرعان "اۋىل" پارتياسىنا كەلەيىك. مۇندا وزىمىزگە ازدى-كوپتى تانىمال ادامداردان داۋلەتكەرەي كاپۇلى بار ەكەن. باعدارلاماسى بۇرىننان تانىس راقىمبەكوۆ تولەۋتاي ساتايۇلى بار، ويتكەنى ول بىلتىر پرەزيدەنتتىككە داۋىسقا تۇسكەن. ءبىزدىڭ وبلىستان پارتيانىڭ فيليال باسشىسى ماشىرىقوۆ كەنجەعالي ساعيدوللاۇلى، فب-دان تانىس قۋات داۋرەن، تاسىبەكوۆ قانات بار. باسقالاردىڭ ءوز ىستەرىنىڭ مامانى، نەمەسە قازاق دەسە جۇرەگىنىڭ سوعىسى بولەك ەكەندىگىنە كۇمانىم جوق، تەك سوڭعى كانديدات – تاسىبەكوۆ تۋرالى ماقتاباستارمەن كۇرەسىپ جۇرگەن ءبىر اتاقتى دوسىمىزدىڭ "ول دا ماقتاباستاردىڭ ءبىرى" دەگەنىن وقىعانىم بار ەدى، سول كۇمان تۋعىزىپ وتىرعانى. ايتپەسە ونىڭ قازاقتىڭ ءسوز يىرىمدەرىن ورىسشاعا اۋدارىپ ءتۇسىندىرىپ جۇرگەن بەلگىلى اتاقتى قازاقتاردىڭ ءبىرى ەكەنىن بىلەمىز )).
ءبىر قىزىعى – پارتيا جەتەكشىسى ءالي بەكتاەۆتىڭ تىزىمدە جوقتىعى تاڭ قالدىرىپ وتىر. مۇمكىن اۋىل ادامدارىنا ءتان ناعىز قاراپايىمدىلىقتىڭ ۇلگىسى وسى بولار بالكىم؟
نەگىزى "اۋىلدىڭ" باعدارلاماسى تۋرالى ايتقىم كەلگەن، بىراق ءالى سوعان جەتە الار ەمەسپىن - مىنا نۇروتان دەگەنىڭنىڭ ناحال ۇگىت-ناسيحاتى اياق باستىرار ەمەس، الدىڭنان شىعادى دا تۇرادى. ونسىز دا ونىڭ ساياسي ارەنادان كەتكەنىن تىلەۋشىلەر كوپ-اق، سوندا دا 30 جىل بويى وتىرىكپەن ابدەن تويدىرعانى سونداي، ءتىپتى كورگىم كەلمەي، ءاربىر قادامىن اشكەرەلەگىم كەلىپ تۇراتىن بولىپتى.
