«Nur Otan»-nyŋ ügıt-nasihaty aiaq bastyrar emes

Taǧy da sailau turaly. «Nur Otan» keremet ädıs tauyp alypty. Praimeriz dep jürgenderınde gäp bar eken, sol arqyly el ışındegı osy qalai degen bırşama belsendı, nemese özındık pıkırı bar (bıraq pıkırı basşylardy, ükımettı, äkımdıkterdı, t.b. synamaityn, synasa da eşkımnıŋ familiia, aty-jönın aitpai jalpylama aitatyn) azamattardy tauyp, bırqataryn mäjılıske, qalǧandaryn mäslihatqa kandidat qylyp partiialyq tızımge qosyp jıberıptı. Qazır solar üi-üidı aralap, auyldan auyl qoimai, ügıt-nasihatty jappai jürgızıp jatyr. Qarasaŋ közıŋ qimaityndai-aq, kıleŋ tanys jıgıtter men qyz-kelınşekter, mekeme basşylary, mektep direktorlary degendei. Äiteuır baiaǧydai eŋbek adamy deitınder joq, eŋ az degenı – asabalar. Būlardyŋ majoritarlyq sistemadan nege qaşqandary da tüsınıktı boldy – osyndai ädıspen partiialyq tızımdı ötkızıp alady da, sosyn naqty familiiaǧa kelgende özderı kımdı qalasa sony ötkıze qoiady. Mysaly Dariǧa Nazarbaeva jeke dara dauysqa tüsse jäi ötpegenı bylai tūrsyn, naǧyz masqaralyqpen ūşyp keter edı, endı jalpy tızımnıŋ ışınde ol aldyŋǧy oryndardyŋ bırımen deputattyqqa ötetın bolar dep şamalaimyn. Būdan şyǧatyn qorytyndy – elge tanymal, közge tüsıp jür degen belsendı azamattardyŋ barlyǧy derlık «Nur Otan»-nyŋ tızımıne engen de, onşa tanymal emes tūlǧalar ǧana qalǧan partiialarǧa bölınıp berılgen. Iаǧni ol jerde de tamyr-tanystyq oryn alyp otyrǧany baiqalady. Järaidy, endı özımız dauys bergelı otyrǧan "Auyl" partiiasyna keleiık. Mūnda özımızge azdy-köptı tanymal adamdardan Däuletkerei Käpūly bar eken. Baǧdarlamasy būrynnan tanys Raqymbekov Töleutai Sataiūly bar, öitkenı ol byltyr prezidenttıkke dauysqa tüsken. Bızdıŋ oblystan partiianyŋ filial basşysy Maşyryqov Kenjeǧali Saǧidollaūly, fb-dan tanys Quat Däuren, Tasybekov Qanat bar. Basqalardyŋ öz ısterınıŋ mamany, nemese qazaq dese jüregınıŋ soǧysy bölek ekendıgıne kümänım joq, tek soŋǧy kandidat – Tasybekov turaly maqtabastarmen küresıp jürgen bır ataqty dosymyzdyŋ "ol da maqtabastardyŋ bırı" degenın oqyǧanym bar edı, sol kümän tuǧyzyp otyrǧany. Äitpese onyŋ qazaqtyŋ söz iırımderın orysşaǧa audaryp tüsındırıp jürgen belgılı ataqty qazaqtardyŋ bırı ekenın bılemız )). Bır qyzyǧy – partiia jetekşısı Äli Bektaevtyŋ tızımde joqtyǧy taŋ qaldyryp otyr. Mümkın auyl adamdaryna tän naǧyz qarapaiymdylyqtyŋ ülgısı osy bolar bälkım? Negızı "Auyldyŋ" baǧdarlamasy turaly aitqym kelgen, bıraq älı soǧan jete alar emespın - myna nūrotan degenıŋnıŋ nahal ügıt-nasihaty aiaq bastyrar emes, aldyŋnan şyǧady da tūrady. Onsyz da onyŋ saiasi arenadan ketkenın tıleuşıler köp-aq, sonda da 30 jyl boiy ötırıkpen äbden toidyrǧany sondai, tıptı körgım kelmei, ärbır qadamyn äşkerelegım kelıp tūratyn bolypty.