نيگەريادا كوروناۆيرۋستىڭ جاڭا شتامى انىقتالدى. افريكا اۋرۋلارىن باقىلاۋ جانە الدىن الۋ ورتالىعىنىڭ مالىمەتىنشە ۆيرۋستىڭ بۇل جاڭا ءتۇرى، بۇعان دەيىن وڭتۇستىك افريكا رەسپۋبليكاسى مەن ۇلىبريتانيادا تىركەلگەننەن وزگەشە. افريكا اۋرۋلارىن باقىلاۋ جانە الدىن الۋ ورتالىعىنىڭ ديرەكتورى (Africa CDC) دجون نكەنگاسونگتىڭ ايتۋىنشا: «بۇل ىندەت ۇلىبريتانيا مەن وڭتۇستىك افريكادان بولەك».
جەرگىلىكتى عالىمدار ينفەكتسيانىڭ ادامعا قانشالىقتى قاۋىپتى ەكەنىن انىقتاۋ ءۇشىن قوسىمشا زەرتتەۋ جۇمىستارىن جۇرگىزۋ كەرەك دەيدى. جالپى سوڭعى كەزدەرى نيگەريادا كوروناۆيرۋس ىندەتىنە شالدىققانداردىڭ سانى ەكى ەسە ارتتى. مامانداردىڭ بولجامىنشا بۇعان ۆيرۋستىڭ جاڭا ءتۇرى سەبەپ بولۋى مۇمكىن. نكەنگاسونگتىڭ مالىمەتىنشە، سوڭعى اپتادا ىندەت ەلدە 52%-عا، ال بارلىق وڭتۇستىك افريكادا 40%-عا ارتقان. ال ينفەكتسيانىڭ وسىلاي كوبەيۋىنە جاڭا شتامنىڭ ىقپال ەتكەنى جايلى ەشقانداي دالەل جوق.
ەستەرىڭىزگە سالساق، جەلتوقساننىڭ باسىندا ۇلىبريتانيا مەن وڭتۇستىك افريكادا كوروناۆيرۋستىڭ جاڭا شتامدارى تىركەلگەن بولاتىن. ۇلىبريتانيانىڭ دەنساۋلىق ساقتاۋ مينيسترلىگىنىڭ باسشىسى مەتت حەنكوك ەلدە جاڭا قوزدىرعىشتى جۇقتىرعانداردىڭ سانى 1000-عا جەتكەنىن ايتقان ەدى. سونداي-اق، «كەيبىر وڭىرلەردە اۋرۋ كۇرت وسكەنمەن، جاعداي باقىلاۋدا قالادى» دەپ جاريالاعان. ال انگليانىڭ باس سانيتارلىق دارىگەرى كريس ۋيتتي جاڭا شتام 70 %-عا جىلدام تارالاتىنى، دەگەنمەن ىندەتتىڭ كۇردەلەنىپ كەتپەيتىنىن مالىمدەگەن ەدى.
ال وڭتۇستىك افريكا بيلىگى كوروناۆيرۋستىڭ بۇل جاڭا ءتۇرىن 19 جەلتوقساندا جاريالاعان بولاتىن. عالىمدار بولسا، اۋرۋدىڭ وسى جاڭا ءتۇرىن 501.V2 دەپ اتاعان. ەلدىڭ دەنساۋلىق ساقتاۋ ءمينيسترى زۆەلي محيزەنىڭ ايتۋىنشا، گەنەتيكتەر ناۋرىز ايىنان باستاپ، ۆيرۋستىڭ ۇلگىلەرىن زەرتتەپ كەلەدى جانە ونىڭ جاڭا نۇسقاسى سوڭعى ەكى ايدا ەلدە باسىم بولۋدا. عالىمداردىڭ ايتۋىنشا، اۋرۋدىڭ وڭتۇستىك افريكاداعى ەكىنشى تولقىنى جاڭا مۋتاتسيامەن بايلانىستى. «قازىر ۆيرۋس تەز تارالۋدا جانە اۋرۋحانالارعا كوپتەگەن جاس پاتسيەنتتەر جاتقىزىلۋدا» دەيدى محيزە.
دۋمان ارعىنگەلدى،
«ادىرنا» ۇلتتىق پورتالى
