ءبىلىم جانە عىلىم ءمينيسترى اسحات ايماعامبەتوۆ مەكتەپكە دەيىنگى، ورتا جانە تەحنيكالىق، كاسىپتىك ءبىلىم بەرۋ ۇيىمدارىندا مەملەكەتتىك ءتىلدىڭ قولدانىس اياسىن كەڭەيتۋ ىسىنە باسىمدىق بەرۋدى تاپسىردى، دەپ حابارلايدى "ادىرنا" ۇلتتىق پورتالى قازاقپارات تىلشىسىنە سىلتەمە جاساپ.
«جالپى مەملەكەتتىك ءتىلدىڭ اياسىن كەڭەيتۋ – ءبارىمىزدىڭ پارىزىمىز. ول ءسوزسىز، تۇسىنىكتى ماسەلە دەپ ويلايمىن. ەلباسىنىڭ مەملەكەتتىك ءتىلدى دامىتۋ ساياساتىنا سايكەس، ءبىلىم سالاسىندا ءبىراز جاقسى وزگەرىستەرگە قول جەتكىزدىك. قازىرگى ۋاقىتتا مەملەكەت باسشىسى مەملەكەتتىك ءتىلدى ءبىلىم بەرۋ سالاسىندا دامىتۋ بويىنشا بىزگە تاپسىرما بەرگەن بولاتىن. ارينە، ءبىلىم سالاسىندا ءتيىستى وزگەرىستەر بولماسا قازاق ءتىلىن ۇلتارالىق تىلگە اينالدىرۋ قيىنعا اينالادى. سوندىقتان كەلەسى جىلى ءتىل كوميتەتىنىڭ ءبىلىم جانە عىلىم مينيسترلىگىنە بەرىلىپ جاتقانى بەكەردەن بەكەر ەمەس. مۇنىڭ ءبارى جۇيەلى تۇردە وسى ساياساتتى جۇزەگە اسىرۋ ءۇشىن جاسالىپ وتىرعان قادامدار»، - دەدى اسحات ايماعامبەتوۆ ءبىلىم جانە عىلىم مينيسترلىگىنىڭ اپپارات وتىرىسىندا. مينيستر قازاق ءتىلىن ۇلتارالىق تىلگە اينالدىرۋ ماسەلەسى كەلەسى جىلدىڭ باستى شارۋالارىنىڭ ءبىرى بولاتىنىن اتاپ ءوتتى. «قازاق ءتىلى مەن قازاق ادەبيەتى ءپانى بويىنشا باعدارلامالاردى جەتىلدىرۋ ۇسىنىستارىن قولدايمىز. ۋنيۆەرسيتەتتەردە قازاق ءتىلى ءپانىنىڭ مۇعالىمدەرىن قالاي دايارلاپ جاتىرمىز دەگەن ماسەلە بويىنشا دا وزگەرتەتىن شارۋالار بار. رەكتورلار ونى بىلەدى. بىلىكتىلىكتى ارتتىرۋ كۋرستارىنىڭ مازمۇنىن وزگەرتۋ ماسەلەسى دە بار. ادىستەمە، وقۋلىقتار بويىنشا ءبىر سوزبەن ايتقاندا، جۇيەلى وزگەرىستەر كەرەك. بىراق ونىڭ بارىنە عالىمدار، ادىسكەرلەر اتسالىسۋى قاجەت»، - دەدى ول. ا.ايماعامبەتوۆ نەگىزگى ماسەلە – مەكتەپتە، بالاباقشادا قازاق ءتىلىنىڭ قولدانىس اياسىن كەڭەيتۋ ەكەنىن جەتكىزدى. «ورىس تىلدە وقيتىن بالالار بار. ولار قازاق ءتىلىن 11 جىل وقىپ شىققانىمەن، قازاق ءتىلىن مەڭگەرۋ دەڭگەيىن كورىپ وتىرمىز. ساعات سانى بويىنشا قارايتىن بولساق، قازاق تىلىندە جانە ورىس تىلىندە قازاق ءتىلى ءپانىن وقىتۋ ساعاتتارى تەڭ. بىراق ساپا بويىنشا سۇراقتار بار. ونى جاسىرۋعا بولمايدى. سوندىقتان ءتيىستى جۇمىستى اتقارماساق بولمايدى»، - دەدى ول.
