Bilim jáne ǵylym mınıstri Ashat Aımaǵambetov mektepke deıingi, orta jáne tehnıkalyq, kásiptik bilim berý uıymdarynda memlekettik tildiń qoldanys aıasyn keńeıtý isine basymdyq berýdi tapsyrdy, dep habarlaıdy "Adyrna" ulttyq portaly QazAqparat tilshisine silteme jasap.
«Jalpy memlekettik tildiń aıasyn keńeıtý – bárimizdiń paryzymyz. Ol sózsiz, túsinikti másele dep oılaımyn. Elbasynyń memlekettik tildi damytý saıasatyna sáıkes, bilim salasynda biraz jaqsy ózgeristerge qol jetkizdik. Qazirgi ýaqytta Memleket basshysy memlekettik tildi bilim berý salasynda damytý boıynsha bizge tapsyrma bergen bolatyn. Árıne, bilim salasynda tıisti ózgerister bolmasa qazaq tilin ultaralyq tilge aınaldyrý qıynǵa aınalady. Sondyqtan kelesi jyly Til komıtetiniń Bilim jáne ǵylym mınıstrligine berilip jatqany bekerden beker emes. Munyń bári júıeli túrde osy saıasatty júzege asyrý úshin jasalyp otyrǵan qadamdar», - dedi Ashat Aımaǵambetov Bilim jáne ǵylym mınıstrliginiń apparat otyrysynda. Mınıstr qazaq tilin ultaralyq tilge aınaldyrý máselesi kelesi jyldyń basty sharýalarynyń biri bolatynyn atap ótti. «Qazaq tili men qazaq ádebıeti páni boıynsha baǵdarlamalardy jetildirý usynystaryn qoldaımyz. Ýnıversıtetterde qazaq tili pániniń muǵalimderin qalaı daıarlap jatyrmyz degen másele boıynsha da ózgertetin sharýalar bar. Rektorlar ony biledi. Biliktilikti arttyrý kýrstarynyń mazmunyn ózgertý máselesi de bar. Ádisteme, oqýlyqtar boıynsha bir sózben aıtqanda, júıeli ózgerister kerek. Biraq onyń bárine ǵalymdar, ádiskerler atsalysýy qajet», - dedi ol. A.Aımaǵambetov negizgi másele – mektepte, balabaqshada qazaq tiliniń qoldanys aıasyn keńeıtý ekenin jetkizdi. «Orys tilde oqıtyn balalar bar. Olar qazaq tilin 11 jyl oqyp shyqqanymen, qazaq tilin meńgerý deńgeıin kórip otyrmyz. Saǵat sany boıynsha qaraıtyn bolsaq, qazaq tilinde jáne orys tilinde qazaq tili pánin oqytý saǵattary teń. Biraq sapa boıynsha suraqtar bar. Ony jasyrýǵa bolmaıdy. Sondyqtan tıisti jumysty atqarmasaq bolmaıdy», - dedi ol.
