ەححح... نە دەيمىز ەندى؟!ترامپ پەن بايدەنننىڭ دەباتى 2 ساعات بولدى. ەكى كانديدات 2 ساعات يدەيا مەن وي جارىستىردى. قىزىق ءوتتى. بىزدىكى 5 پارتيانىڭ وكىلى 1 ساعات سويلەدى. اتتەڭ-اي...
بايگەگە شاباتىن سايگۇلىكتى ەرتتەپ، جۇگەنىن سالىپ، قىزدىرىپ بىراق بايگە باستالماي جاتىپ توقتاپ قالعانداي كۇيدە وتىرمىن. ات تا اڭ تاڭ، جينالعان حالىق تا اڭ تاڭ. "بايگە قاشان باستالادى؟" دەگەن سۇراق قالدى. قانباي قالدىق قىسقاسى. تۇتاس ەل پروتسەسس باستالىپ، بىتپەي قالعانداي كۇيدە وتىرمىز. دەگەنمەن... بارىمەن بازار...
سونىمەن كانديداتتار نە دەدى؟..
"نۇر وتاندى" قولداڭىز، ۇرسىڭىز، سىناڭىز ءوز ەركىڭىز. بىراق ايدوس سارىمدا
دا ءبىلىم بار. كوكجيەك كەڭ. ماسشتاب بۇگىنگىدەن جوعارى ەكەنى سەزىلىپ تۇردى. ۋاقىت قىسقا، فورماتقا سىيماي تۇرعان ادام سەكىلدى اسەر بەردى وزىمە. ءتىپتى ايدوس اعامىزبەن دەباتقا ءتۇسىپ وي جارىستىرعىم كەلدى.
قازاقستاندا "مادەني مۇرا" سىندى جوبالار، ۇلتتىق قۇندىلىققا قاتىستى زاڭدار قابىلدانعانىن جاقسى ايتتى. "تۇك ىستەلىنگەن جوق" دەگەن قارسىلاستىڭ سۇراعىنا ادەمى جاۋاپ بەرە ءبىلدى.
الداعى ۋاقىتتا ايماقتاردى قولعا الامىز دەگەن پارتيانىڭ پوزيتسياسىن الىپ شىقتى. نەگىزى ەڭ اۋىر جۇك ايدوسقا ءتۇستى. 20 جىل بيلىكتە وتىرعان پارتيانى سىننىڭ استىنا الاتىنى بەلگىلى ەدى. بۇل پوزيتسيانى ءدال قازىر الىپ شىعۋ دا قيىن. بىراق سىن دا قاتتى ەستىلمەدى. سيپالاپ ءوتتى وپپونەنتتەر. ونى ايدوس سوققى دەپ قابىلدامادى. "بولعانى وسى ما؟ باسقا سالماقتى ەشتەڭە جوق پا؟" دەگەندى ەتيكەتتى ساقتاپ ايتپادى-اۋ...
ماقسات تولىقباي سوزگە شەشەن. وزگەرىستى "سەن ايت، مەن ايت دەپ وتىرماي ىسكە كىرىسەيىك" دەدى. دۇرىس پوزيتسيا. ساياساتتى فەيسبۋكپەن ولشەيتىن ساياسي سانادان كەتۋ كەرەكتىگىن ءبىراز ازاماتتار ءتۇسىندى عوي نەگىزى. ماقساتتىڭ دا ايتارى بار ەكەن. ۋاقىتتىڭ تارلىعىنان رامكادا قالىپ قويدى. بۇل فاكت.
داۋلەتكەرەي كاپۇلى ايتىس پەن ساياسي تارتىستىڭ ەكى دۇنيە ەكەنىن سەزدى-اۋ. بىراق سىر بەرمەدى. پوزيتسياسىن باعدارلاما شارتتارى اياسىندا ادەمى قورعادى. "قازاقستاندى اگرارلىق ەلگە اينالدىرماي كوركەيمەيمىز. جەر شەتەلدىكتەرگە ساتىلماسىن، جالعا بەرىلمەسىن" دەدى. قوعامدى تولعاندىرار سۇراققا ناقتى جاۋاپ.
"قازاقستان حالىقتىق پارتياسى" مەن "اق جول" دا ءبىراز جەرگە باردى. كوممۋنيزممەن كۇرەستە سەرىكتەسپىز دەدى. كەشەگى كوممۋنيستەر وزگەردىك دەسە، "اق جول" پارلامەنتتە وتىرعان جىلدارى كوپ نارسەنى تۇسىندىك، ەندى ىسكە كىرىسەمىز دەدى. دەيتىنىن دەدى-اۋ. بىراق پارلامەنتتە بولعان پارتيالار ءۇشىن تىم كەش ەمەس پە؟.. كورەرمەن ءوز باعاسىن بەرە جاتار.
جالپى دەبات بۇگىنگى دامۋ مەن شارتتاردىڭ اياسىندا ءوتتى. ماماندارعا بۇل بىردەن سەزىلدى. بىراق ءوتتى. سايلاۋعا دەيىن ءالى 20 كۇندەي بار. ايتىلعان ويلاردى ەسەپكە الىپ دەباتتىڭ فورماتىن كەڭەيتە جاتار. سوڭعىسى ەمەس قوي دەگەن ءۇمىت قالدى. لايىم سولاي بولسىن!
ءبىر ۇناعانى جۇرگىزۋشى دۇرىس تاڭدالىپتى. ءسوز سويلەۋ مانەرى، شەبەرلىگى، باعدارلامانى ۇستاپ تۇرۋى، قىسقاسىن ايتقاندا بارلىق فورماتى كەلىسىپ تۇر ەكەن دەباتتى جۇرگىزۋگە. وسى جۋرناليست ءوز ورنىن تاپقان دەگەن وي ءتۇيدىم.
باۋىرجان سەرىكباەۆ،
الەۋمەتتىك جەلىدەگى جازباسىنان.
