قازاقستان مۇعالىمدەرى سوڭعى ۋاقىتتا ءبىلىم ءمينيسترى اسحات ايماعامبەتوۆتەن كەرى بايلانىس جوعىن ايتىپ، رەنىش بىلدىرۋدە دەپ حابارلايدى «ادىرنا» ۇلتتىق پورتالى. الەۋمەتتىك جەلىدە تاراعان جازباعا ۇڭىلسەك، مينيستر بىرقاتار ماڭىزدى سۇراقتاردىڭ جاۋابىن بەرمەي وتىر.
كەشە عانا شىعىس قازاقستان وبلىسىنىڭ مۇعالىمى، ازاماتتىق ۇستانىمىمەن قوعامدا وتە تانىمال مۇعالىم مەيىرجان تەمىربەك: «جالپى ءبىلىم مينيسترلىگىنىڭ قوعاممەن قازىرگى بايلانىسى قانداي؟!بىرنەشە رەت تالقىلاۋدا بولدىق، قاتىستىق، كوردىك. ۇسىنىستاردىڭ كوبى ەسكەرۋسىز شاڭ باسقان ارحيۆتەردە قالدى. سوڭعى كەزدە وبلىستىق ءبىلىم باسقارمالارىنىڭ ءنومىرىن تاراتتى. ەش كەرى بايلانىس جوق. ولار جاۋاپ بەرۋگە مىندەتتى ەمەس شىعار. وندا نەسىن تاراتتى؟ قوش دەلىك. قازىر مۇعالىمدەر تاراپىنان كوپتەگەن سۇراقتار جاۋاپسىز قالىپ جاتىر. مينيسترلىك جاۋاپ بەرۋگە مىندەتتى ەمەس شىعار، بىراق سول سۇراقتى تۋىنداتىپ وتىرعان مينيسترلىكتىڭ شىعارىپ وتىرعان قاۋلىلارى مەن بۇيرىقتارى! نەگە ۋاقىتىندا جاۋاپ بەرىلمەيدى؟ نەگە وبلىستىق ءبىلىم باسقارمالارى زاڭ بۇزۋشىلىقتى اۋىزدىقتامايدى؟ شامالارى جەتپەي مە؟ وبلىسقا ءبىلىم باسقارمالارىنا بۇكىل اۋداندار اۋداندىق اكيماتتان ءبولىپ الىپ وبلىسقا قوسپاقشى؟ ودان نە وزگەرەدى؟!
كەڭەسشىلەرىڭىزدىڭ دە قولدارىنان ەشتەڭە كەلمەدى. الدە شاباداندارىڭىزدى دايىنداپ كەتكەلى وتىرسىزدار ما؟! ءبارىبىر جاۋاپكەرشىلىكتەن ار مەن ۇياتتارىڭىز بولسا قۇتىلا المايسىزدار. ءبىز ۇسىنىس بەرسەك ەشتەڭە وزگەرتۋگە شامالارىڭىز كەلمەي قالادى. جوعارىدان بۇيرىق تۇسسە قانداي قاۋلى بولسىن سەكۋندتا وزگەرەدى. جاۋاپ بەرۋگە ۋاقىتتارىڭىز بولماسا پاراقشالارىڭىزدى جاۋىپ، تەلەفوندارىڭىزدى ءوشىرىپ قويىڭىزدار، ەسىكتەرىڭىزدى قۇلىپتاپ قويىڭىزدار»، دەپ جازدى.
«مينيستر مىرزا بجعم قوعامدىق كەڭەسىنىڭ اتىنان ۇسىنىستاردى ەنگىزۋگە جەتىسۋ كەرەك. كەشە عانا بارلىعىن گرۋپپاعا جيناپ ماسەلەلەردى شەشىپ جاتىر ەدىك گاۋحار وماربەك حانىم مينيسترلىكتىڭ وكىلدەرىن، وبلىستىق ءبىلىم باسقارمالارىنىڭ باسشىلارىن توپتان قۋىپ جىبەردى. ولار دا ول جەردە ماردىمدى جاۋاپ بەرىپ وتىرعان جوق. قاراپايىم مۇعالىمنىڭ قاراپايىم سۇراقتارىنا جاۋاپ بەرە الماسا، قاراپايىم ماسەلەنى اۋىزدىقتاي الماسا نەسىنە ول جەردى قور قىلىپ وتىر؟! مۇعالىمدەرگە ء"بىلىم ساپالارىڭ تومەن، ناشارسىڭدار" دەگەندە سونداي عوي. جاقسى مۇعالىمدەردىڭ ىشىندەگى ەڭ ناشارى مەن بولايىن، ساۋاتسىزى دا مەن بولايىن. وزدەرىڭىزگە شاڭ جۋىتپايسىزدار. اكىم قارالارعا، پرەزيدەنتكە جاقساڭىزدار بولدى، باسقا ماسەلەگە پىسقىرىپ تا قارامايسىزدار. ەندى ءبىراز جىلدا ءبىلىم سالاسىنىڭ بولاشاعىن كوزگە ەلەستەتۋ قيىن، اسىرەسە اۋىلدى جەرلەردە. باعدارلامالارىڭ اسپانداعى ايدى سۇرايدى، بەرگەن كامپوتىرلارىڭ اي تۇگىل، بۇلت تۇگىل تاۋدىڭ باسىنا دا شىعا المايدى»،-دەپ كۇيىنىشىن بىلدىرۋدە ۇستازدار.
سونىمەن قاتار، سوڭعى ۋاقىتتا ءبىلىم ءمينيسترىنىڭ ءباسپاسوز حاتشىسى گاۋحار وماربەككە دەگەن مۇعالىمدەردىڭ وكپەسى ءورشىپ بارادى. مينيستر مەن مۇعالىمدەردىڭ اراسىندا التىن كوپىر بولادى دەپ كۇتكەن گاۋحار وماربەك كەرىسىنشە ارەكەت جاساپ جۇرگەندەي. ماسەلەن، ايمان ساعيدۋللا تاياۋدا عانا: «اشىق بولعاندارىڭىز وسى ما؟ گاۋحار ءبىزدىڭ مۇعالىمدەرگە كومەكتەسىپ وتىرعان توبىمىزداعى مايرا مەلدىبەكوۆانى ،وبلىستىق ءبىلىم باسقارمالارىنىڭ باستىقتارىن توپتان شىعارىپ تاستاپتى. بۇل نە سۇمدىق؟ ءبىزدىڭ ولارمەن بايلانىسۋىمىزعا تىيىم سالعىسى كەلە مە؟ الدە ءبىز كىممەن سويلەسەتىنىمىزدى گاۋحاردان سۇراۋىمىز كەرەك پە؟ ءبىز ول توپتا زاڭسىز جۇمىستان شىعارىلعان مۇعالىمدەردىڭ ماسەلەسىن فەيسبۋككە، سوتقا جەتكىزبەي شەشۋ ماقساتىندا وتىرعانبىز. ەگەر سىزدەرگە ۇنايتىن بولسا، ەندى ونداي ماسەلەلەردى فەيسبۋكتا جازامىز دا وتىرامىز. مينيستر كىم ءوزى؟ ءسىز بە الدە گاۋحار وماربەك پە؟ ءسىز ايتقان اشىقتىققا مەنسىنبەي قاراپ، ۆيتسە مينيسترلەردى توپتان شىعارىپ تاستاۋعا شاماسى كەلىپ وتىرعان گاۋحار دەگەن مىقتى كىم ءوزى؟وسى ىستەرىنەن-اق مينيسترلىكتىڭ قۇقىعى تاپتالعان مۇعالىمدەرگە كومەكتەسكىلەرى كەلمەيتىنىن بايقاۋعا بولادى. ويتكەنى ول توپ سول باعىتتاعى توپ ەدى. وكىنىشتى»،-دەپ جازعان بولاتىن.
وكىنىشكە قاراي، اسحات ايماعامبەتوۆتىڭ تاراپىنان ازىرگە رەسمي جاۋاپ بولماي وتىر. وسىعان دەيىن مۇعالىمنىڭ جانىن تۇسىنەتىن، ءبىلىم سالاسىن بيىككە شىعاراتىن مينيستر دەپ حالىق تقبەسىنە كوتەرگەن ءمينيستردىڭ سوڭعى ۋاقىتتا نەگە بۇلاي «وزگەرگەنىن» جۇرت تۇسىنبەي الەك. باستاپقىدا بىلەك سىبانىپ، بەلسەنە جۇمىس ىستەگەن ءمينيستردى بۇل كۇندە اينالاسى «بۇزا» باستادى ما دەگەن كۇدىكتەرىن دە مۇعالىمدەر جاسىرماي جازۋدا. ءبىلىم مينيسترلىگى مەن مۇعالىمدەر اراسىن جالعاي الماسا، شاماسى كەلمەسە، گاۋحار وماربەك وزگەمەن ورىن اۋىستىرعانى دۇرىس ەمەس پە؟ قازاقستان مۇعالىمدەرى بۇدان 10 جىل بۇرىنعى باس بۇعىپ، بارىنە كونىپ وتىرا بەرەتىن مۇعالىمدەر ەمەس قازىر. ءوز قۇقىقتارىن تالاپ ەتە الاتىن، ول ءۇشىن زاڭدى ساۋاتتارى جەتەتىن مۇعالىم قازىر ەلىمىزدە وتە كوپ. وسىلاردى ەسكەرسە، مينيستر دە، ءمينيستردىڭ ءباسپاسوز حاتشىسى دا مۇعالىمدەر سالعان سۇراۋعا جاۋاپ بەرەر دەپ ۇمىتتەنەمىز.
راۋانا ديماشقىزى،
«ادىرنا» ۇلتتىق پورتالى.
