اقش-تاعى قازىرگى قىزۋ تالقىلانىپ جاتقان تاقىرىپ - قورعانىس مينيسترلىگىنەن باستاپ بارلىق مينيسترلىكتەرگە جاسالعان كيبەرشابۋىل. ونى ءبىر جەكە مەكەمە كەزدەيسوق بايقاپ قالعان دا تەكسەرىپ باستاعان، سويتسە... حاكەرلەر ۇكىمەتتىڭ بارلىق جەلىلەرىنە ەركىن كىرىپ سايران سالىپ جۇرگەنىنىڭ ۇستىنەن تۇسكەن.
وسى كەزگە شەيىن حاكەرلەردىڭ قاشان كىرگەنى، قانشاما ينفورماتسيانى كوشىرىپ العانى، قانشالىقتى شىعىن كەلتىرگەنى بەلگىسىز، بىراق ايتەۋىر وراسان زور زيان كەلگەنى ايتىلۋدا. نەگىزگى كۇدىك - رف حاكەرلەرىنىڭ ءىسى دەپ باعالانۋدا. ونىڭ زارداپتارىن جويۋ بىرنەشە ايلارعا، ءتىپتى جىلدارعا سوزىلۋى مۇمكىن.
ادەتتەگىدەي ترامپ رەسەيگە شاڭ جۋىتاتىن ەمەس: ونى قايدان بىلەسىڭدەر، مۇمكىن قىتاي شىعار دەپ تۋيتتەردە جازبانى بۇرقىراتىپ جاتقان كورىنەدى.
بايدەننىڭ رەاكتسياسى مۇلدەم كەرىسىنشە - ول رەسمي مالىمدەمە جاساپ، مەن كيبەرقاۋىپسىزدىكتى ۇكىمەت جۇمىسىنىڭ باستى پريوريتەتتەرىنىڭ ءبىرى ەتەمىن. كيبەرشابۋىل جاساعانداردى كىم بولسا دا ورنىنا قويامىن، ءبىزدىڭ قارسىلاستارىمىز مۇنى ءبىلىپ قويسىن دەدى.
سەناتور دەموكرات ديك دۋربين: "بۇل كيبەرشابۋىل - رەسەيدىڭ ءىس جۇزىندە بىزگە سوعىس جاريالاۋى" - دەپ مالىمدەدى. ترامپ جاعىنان تەك مەم.حاتشى مايك پومپەو عانا، بارلىق باق-تاردا جازىلعاننان كەيىن بەس كۇن وتكەندە: "بۇل وتە ۇلكەن كولەمدەگى كيبەرشابۋىل. ءبىز ەندى بۇل رەسەيدىڭ ءىسى دەپ ناقتى ايتا الامىز. كوپ مالىمەتتەر قۇپيا بولعاندىقتان بۇدان ءارى ەشتەڭە ايتا المايمىن" - دەدى. رەسپۋبليكاشىل سەناتور، ترامپتى العاشقى سايلانعان كۇننەن باستاپ قولداپ كەلە جاتقان ماركو رۋبيو دا: "بۇل رف-نىڭ ەڭ ءىرى شابۋىلى. ءبىزدىڭ جاۋابىمىز پروپورتسيونالدى جانە ودان اسىپ ءتۇسۋى كەرەك" - دەپ مالىمدەدى. تەك ترامپتىڭ ءوزى عانا تۋيتتەردە: "قيت ەتسە رەسەيدى كىنالاي جونەلۋدى قويۋ كەرەك. ءبىزدىڭ داۋىس بەرۋ كومپيۋتەرلەرىمىز كۇلكىلى جاعدايدا، ولار بايدەنگە داۋىس بەرۋگە پروگراممالانعان. مەنىڭ ءىرى ەسەپپەن ۇتقانىم بەلگىلى، بىراق كوررۋپتسيالىق بىلىققا باتقان اقش ونى مويىنداعىسى كەلمەيدى" - دەپ جازدى كەشە.
