ءوز باسىم ءبىزدىڭ قوعام ادامزاتتىق دەڭگەيدەگى ماسەلەلەردى شەشۋگە، الەمدىك دامۋعا ات سالىساتىن ماسشتابتاعى دۇنيەلەردى جاساۋعا دايىن ەمەس دەپ ويلايمىن. ءبىز ءوز ىشىمىزدەگى ۇساق-تۇيەك اڭگىمەلەرمەن باسى دا، ۋاقىتى دا بوس ەمەس ەلمىز. اناۋ ساتقىن، مىناۋ جاۋ، ول كەزىندە ءۇيتىپ قويعان، بۇل ءسۇيتىپ قويعان دەگەن تاقىرىپتار بىزگە جاقىنداۋ. ءدال قازىر سولاي...
بىزگە وسىنىڭ بارىنەن تاۋەلسىزدىك الۋ كەرەك. سانا تاۋەلسىزدىگى. وي-پىكىر ادامزاتتىڭ دامۋ تاريحىن جازاتىنداي ماسشتابقا كوتەرىلگەنى دۇرىس. اينالامىزداعى ەلدەردە نە بولىپ جاتىر، ولار قالاي ءوستى، ءوندى، دامىدى دەگەن سۇراقتاردى وزىمىزگە دە قويۋ قاجەت.
قىتاي 2030 جىلى جاساندى ينتەللەكت بويىنشا الەمدە ءبىرىنشى ورىنعا شىقپاقشى. وسى سالاداعى تابىستىڭ 60% قىتايدىڭ ۇلەسىنە تيەدى دەپ بولجانۋدا. ول دەگەن ءسوز ەكونوميكا، اسكەري كۇش، تەحنولوگيا بويىنشا الەمدى بيلەيدى. ونىڭ ىرگەسىندەگى ءبىز كىم بولامىز؟..
كەشە رەسەي پرەزيدەنتى ۇلتتىق قورىنىڭ 580 ملرد دوللارعا دەيىن ارتقانىن اتاپ ءوتتى. زاماناۋي قارۋلاردىڭ جاڭا تۇرلەرىن جاساپ جاتقانىن دا جەتكىزدى. رەسەيدىڭ دە ءوز دامۋ جولى بار. اسكەر مەن فلوت، سوعىس مەملەكەتتىڭ ىرگەسىن ۇستاپ تۇر. وزدەرى دە مويىندايدى. تەحنولوگياسى الەمدە ءبىرىنشى بولماۋى مۇمكىن، بىراق بىزدەن جوعارى.
تۇركى الەمىندە تۇركيا كوش ىلگەرى كەتتى. بايراكتار، اكسۋنگۋر اتتى بەسپيلوتنيكتەرىن تولىق ءوزى شىعارۋدى كوزدەپ وتىر. 2023 جىلى ەلەكتر كولىكتەرىن، كەيىن ۇشقىشسىز باسقارىلاتىن ۇشاق، تىكۇشاق شىعارۋدى ىسكە اسىرماقشى.
يزرايل ەكى قۇلاقتىڭ ورتاسىنداعى اقىلدىڭ كۇشىمەن دامىعان مەملەكەت. كاراباحتاعى سوعىستا "حاروب" دروندارىنىڭ ەففەكتيۆتىلىگىن كوردىك. مەديتسيناسى الدا.
ءتىزىمدى جالعاستىرا بەرۋگە بولادى عوي...
ءبىزدىڭ ۇكىمەت تە تەحنوكراتتىق ساناعا ەلدى بۇرۋى ءتيىس. جوعارىدا اتالعان ەلدەردىڭ بارلىعىندا مەملەكەتتىك قولداۋدىڭ ارقاسىندا عانا جاستارى، عالىمدارى تەحنوكراتتىق توڭكەرىس جاساۋدا. مەملەكەتتىك، قازاقستاندىق مۇددە تۇرعىسىنان بۇل بىزگە دە قاجەت. ۋاقىتى ءوتىپ بارادى. كەش قيمىلداۋدامىز. حالىقتىڭ ويىن، جاستاردىڭ مۇمكىندىگىن، ۇلتتىڭ پاسسيونارلىق كۇشىن وسى سالاعا بۇرۋعا ءتيىسپىز. ينۆەستيتسيا، قارجى وسى سالاعا قۇيىلۋى كەرەك.
قازىرگى رەسەيدىڭ دەپۋتاتتارى ايتقان ءبىر سوزدەن شۋلاپ وتىرعانىمىز ءبىزدىڭ دەڭگەي ەمەس. بۇلاي جالعاسا بەرۋى دە ۇلكەن سىن! "كەلسەڭ كەل. قازاققا تيسەڭ وزىڭە دە وڭاي بولمايدى" دەگەن تەحنولوگيالىق كۇش، ەكونوميكالىق ءوسىم، مەملەكەتتىك مۇددە جولىندا تولىسقان قوعامدىق سانا بولۋى كەرەك بىزدە. قازاق ۇساق-تۇيەك داۋدان باس كوتەرە الماي قالعان. بۇل جاقسى ەمەس. بۇل جولدان كەتۋ كەرەك. كەرىسىنشە ۇلتتىڭ كۇشىن مەملەكەتتىك مۇددە ءۇشىن ءتيىمدى تەحنوكارتتىق باعىتقا بۇرۋ قاجەت. ەففەكتيۆتى جول وسى. ءبىزدىڭ زامانىمىز، ادامزاتتىڭ دامۋى وسى باعىتتا وزگەرىپ جاتىر. مۇنى ىستەۋ كەرەك. ىستەي الماسا ىستەيتىندەرگە جولدى بەرۋ قاجەت. كوپ قوي قازاقتا تالانتتى جاستار. قازىرگىمىز بولمايدى.
