«JAC Ѕunray» ماركالى سوڭعى ۇلگىدە جابدىقتالعان 15 بىرلىك رەانيموبيل اۆتوكولىكتەرى اقتوبە وبلىسىنا قاراستى بارلىق اۋداندىق اۋرۋحانا مەكەمەلەرىنە بەرىلدى. بۇگىن وبلىس اكىمى وڭداسىن ورازالين اۋداندىق اۋرۋحانالاردىڭ باس دارىگەرلەرىمەن كەزدەسىپ، سانيتارلىق اۆتوترانسپورتتىڭ كىلتتەرىن تابىستادى.
“مەملەكەت باسشىسىنىڭ تاپسىرماسىنا ساي، ۇكىمەت باسشىلىعى، جەرگىلىكتى اتقارۋشى ورگان ازاماتتارىمىزدى قاۋىپتى ىندەتتەن امان الىپ قالۋ ءۇشىن ءتيىستى شارالاردى قابىلداپ، قاراجات ءبولدى. ەشقاشان بولىپ كورمەگەن مۇنداي دەرتتىڭ اۋىرتپالىعى بارلىعىنا وڭاي سوقپادى، دەگەنمەن تاجىريبەلى دارىگەرلەرىمىزدىڭ ارقاسىندا ناۋقاستاردىڭ دەنساۋلىعىن قالىپقا كەلتىردىك. ەڭبەگىنە ادال اق حالاتتى جاندارعا العىس بىلدىرەمىن”،-دەدى وڭداسىن ورازالين.
اقتوبە وبلىسىندا 341 سانيتارلىق اۆتوكولىك بار. 2020 جىلى جەرگىلىكتى بيۋدجەتتەن 239,4 ملن. تەڭگەگە ۋاز سانيتارلىق اۆتوكولىگىنىڭ 24 بىرلىگى جانە FORD ماركالى 1 نەوناتالدى رەانيموبيل ساتىپ الىندى.
بۇدان باسقا، قارجى ليزينگى ارقىلى 41 رەانيموبيل، ونىڭ ىشىندە 19 بىرلىك Hyundai H-350 ماركالى رەانيموبيل، 20 «JAC Ѕunray» رەانيموبيل جانە 2 ۋاز پروفي رەانيموبيل الىندى
بۇگىنگى ءىس-شارادا اۋدانداردىڭ مەديتسينالىق كاسىپورىندارىنا 15 بىرلىك سانيتارلىق اۆتوكولىك بەرىلدى. 2021 جىلى جەرگىلىكتى بيۋدجەت ارقىلى وبلىستىڭ مەديتسينالىق كاسىپورىندارى ءۇشىن 21 سانيتارلىق اۆتوكولىك ساتىپ الۋ جوسپارلانعان.
وبلىس اكىمى شارادان سوڭ، اقتوبە مەديتسينالىق ورتالىعىندا اشىلعان كارديورەانيماتسيا- كارديولوگيا ءبولىمىنىڭ جۇمىسىمەن تانىستى. پاندەميانىڭ ءورشۋى مۇمكىن قاۋىپتىلىگىنە بايلانىستى اشىلعان بولىمدە covid-19 ينفەكتسياسىن جۇقتىرعان قوسىمشا جۇرەك تالماسىمەن اۋىراتىن ناۋقاسقا شۇعىل كومەك كورسەتىلەتىن بولادى.36 ورىنعا ارنالعان مەديتسينالىق بولىمدە گەرمانيا، جاپونيادان جەتكىزىلگەن قاجەتتى قۇرىلعىلارمەن جابدىقتالعان.
