تاۋەلسىزدىك كۇنى مەرەكەسىنە وراي العا، تەمىر، بايعانين اۋداندارىنىڭ ەلدىمەكەندەرىنە كوگىلدىر وتىن كىرگىزىلدى. وبلىس اكىمى وڭداسىن ورازالين گازبەن قامتىلعان سارىقوبدا، اقساي، جارلى اۋىلدارىندا بولىپ تۇرعىنداردىڭ قۋانىشىمەن ءبولىستى.
“مەن ۇنەمى اعا بۋىن وكىلدەرىمەن كەزدەسكەندە كەڭەس ءداۋىرىن ەسكە تۇسىرەمىن. دۇنيەدەگى ەڭ مىقتى مەملەكەت بولا تۇرا اۋىلدىق جەرلەرىمىزگە گاز، سۋ كىرگىزىلمەدى. بۇل جەتىستىكتەرگە قاسيەتتى تاۋەلسىزدىگىمىزگە قول جەتكىزگەننەن كەيىن عانا مۇمكىندىك بولىپ وتىر. مەملەكەت باسشىسىنىڭ تۇرعىنداردىڭ ءال-اۋقاتىن جاقسارتۋ قاجەتتىگى تۋرالى تاپسىرماسىنا سايكەس ءوڭىر حالقىنا بارىنشا قولايلى جاعداي جاساۋ مىندەتىمىز، قۋانىشتارىڭىز قۇتتى بولسىن”،-دەدى وڭداسىن ورازالين.
ءوڭىر باسشىسىنىڭ بۇل سوزدەرىن تولىقتاي قولداعان اۋىل اقساقالدارى كەلەر ۇرپاق ءۇشىن اتقارىلىپ جاتقان يگى ىستەرگە العىس ءبىلدىرىپ، قازاق ەلىندە اۋىزبىرشىلىك بولسىن دەپ باتا بەردى. ايماق باسشىسى گاز قۇبىرىن رەسمي تۇردە ىسكە قوسىپ، كوگىلدىر وتىننىڭ تۇتىنۋشىلارعا جەتكەندىگىن قاراۋ ماقساتىندا تۇرعىنداردىڭ شاڭىراعىندا بولدى.
قازىرگى تاڭدا وبلىس حالقىنىڭ 90,8% كوگىلدىر وتىنمەن قامتاماسىز ەتىلگەن.
2020 جىلى 3,4 ملرد.تەڭگە بولاتىن گازبەن جابدىقتاۋ جوبالارى ىسكە اسىرىلۋدا، ءوز كەزەگىندە اتالعان جوبالار 10 مىڭنان استام حالقى بار 13 ەلدى مەكەندى گازبەن قامتاماسىز ەتۋگە مۇمكىندىك بەرەدى. وسىلايشا، 2020 جىلدىڭ سوڭىنا دەيىن وبلىس حالقىنىڭ 91,4% گازبەن قامتاماسىز ەتىلەتىن بولادى. 2021 جىلى جالپى قۇنى 1,8 ملرد. تەڭگەگە گازبەن جابدىقتاۋ جوبالارى ىسكە اسىرىلاتىن بولادى، بۇل 6,4 مىڭ حالقى بار 10 ەلدى مەكەن. سونىمەن قاتار، 2021 جىلى 9,9 ملرد.تەڭگەگە 5 جوبانى ىسكە اسىرۋدى باستاۋ جوسپارلانۋدا.
وبلىس باسشىسى الەۋمەتتىك نىسانداردىڭ اشىلۋىنا قاتىستى. شۇبارقۇدىق كەنتىندە دەنە شىنىقتىرۋ - ساۋىقتىرۋ كەشەنى پايدالانۋعا بەرىلدى. ەكى قاباتتان تۇراتىن عيمارات “تەمىر بالالار- جاسوسپىرىمدەر سپورت مەكتەبىنىڭ مەنشىگىندە بولماق. مۇندا 600- دەن استام بالا بوكس، دزيۋدو، قازاقشا كۇرەس، فۋتبول ت.ب سپورت تۇرلەرىمەن اينالىسادى. ايماق باسشىسى سپورت نىسانىن ارالاپ، جابدىقتارمەن تانىستى. وڭداسىن ورازالين جاڭا عيماراتتىڭ اشىلۋ قۇرمەتىنە سپورتتىق جابدىقتار الۋعا سەرتيفيكات تابىستادى. قۇنى 450,7 ملن تگ سالىنعان كەشەندى سالۋ جۇمىستارى وتكەن جىلى باستالىپ 2020 جىلى اياقتالدى. تاعى ءبىر دەنە شىنىقتىرۋ-ساۋىقتىرۋ كەشەنى بايعانين اۋدانىندا دا ەل يگىلىگىنە بەرىلدى. ءبىر مەزگىلدە مىڭعا جۋىق ادامدى قابىلداۋعا قاۋقارلى سپورت نىسانىندا ويىن الاڭى، باسسەين، كۇرەس زالى، جاتتىعۋ زالدارىمەن قامتىلعان. ول ءۇشىن 299,5 ملن تەڭگە قارالعان. زاماناۋي ۇلگىدەگى سپورت كەشەننىڭ قۇرىلىسى 2019 جىلى باستالىپ، بيىل اياقتالدى.
ءوڭىر باسشىسى جاڭادان سالىنىپ جاتقان اۋدان اكىمدىگى عيماراتىنىڭ قۇرىلىسىمەن تانىستى.
قۇرىلىسى بيىل باستالعان نىسان جۇمىسىنا 268,1 ملن تەڭگە قارالعان. 2021 جىلدىڭ تامىز ايىندا اياقتالۋ جوسپاردا. ۋاقىتشا جۇمىس ورنى قۇرىلىپ، وندا 22 ازامات جۇمىسقا ورنالاستى.
وڭداسىن ورازالينگە بايعانين اۋدانىنىڭ اكىمى “اۋىل ەل بەسىگى”،” جقجك” مەملەكەتتىك باعدارلامالارى ارقىلى اتقارىلعان جۇمىستاردى تانىستىردى.
وبلىس اكىمى بايعانين اۋدانىنىڭ اكىمى قايرات وتاروۆقا، تەمىر اۋدانىنىڭ اكىمى جولداس باتىرحانعا، العا اۋدانىنىڭ اكىمى مامىرعالي اققاعازوۆقا بولاشاعى بار اۋىلدىق ەلدىمەكەندەردى كوگىلدىر وتىن، سۋ كوزدەرىمەن قامتۋدى بەلسەندى جۇرگىزۋدى، ينۆەستيتسيالىق جوبالاردى جۇزەگە اسىرىپ، جۇمىس ورىندارىن كوبەيتۋدى تاپسىردى.
