بۇگىن اقتوبە وبلىسىنىڭ اكىمى وڭداسىن ورازالين «پارىز» كونكۋرسىنىڭ ۇزدىكتەرىن ماراپاتتادى. حالىقتىڭ ءال-اۋقاتىن ودان ءارى جاقسارتۋ ماقساتىندا جەكە كاسىپكەرلىك سۋبەكتىلەرىنىڭ قوعام الدىنداعى كورپوراتيۆتىك الەۋمەتتىك جاۋاپكەرشىلىگىن قالىپتاستىرۋشى كاسىپورىنداردى انىقتاۋعا باعىتتالعان كونكۋرس 2008 جىلدان باستاپ رەسپۋبليكانىڭ بارلىق وڭىرلەرىندە ءداستۇرلى تۇردە وتكىزىلىپ كەلەدى. بيىل سايىسقا وبلىستاعى 28 كاسىپورىن ءوتىنىم بىلدىرگەن. قاتىسۋشىلاردى وبلىس اكىمىنىڭ ورىنباسارى رۋسلان حامباروۆ توراعاسى بولىپ تابىلاتىن كوميسسيا قۇرامى انىقتاعان. ناتيجەسىندە «ۇزدىك الەۋمەتتىك جاۋاپتى كاسىپورىن»، «ەڭبەكتى قورعاۋ سالاسىنداعى ۇزدىك كاسىپورىن» ، «ۇزدىك ۇجىمدىق شارت» نوميناتسيالارى بويىنشا «قازحروم تۇك» اق فيليالى اكتوبە فەرروقورىتپا زاۋىتى، «قازترانسويل» اق اقتوبە مۇناي قۇبىرى باسقارماسى، «ساگيز پەترولەۋم كومپاني» جشس، «پو گلوبال-سپەتسودەجدا» جشس، «قوبدا جەر» ، «سماعۇل» «راسسۆەت» «قۋان» جشس-گى شارۋا قوجالىقتارى جەڭىمپاز دەپ تانىلدى. وڭداسىن ورازالين ءوڭىردىڭ الەۋمەتىن ارتتىرۋعا، تۇرعىنداردى تۇراقتى جۇمىسپەن قامتاماسىز ەتۋگە ات سالىسقان كاسىپورىن باسشىلارىنا ريزاشىلىعىن ءبىلدىرىپ، العىس حات پەن قاراجىلاي سىيلىق تابىستادى.
