ەلىمىزدەگى باسقا دا مينيسترلىكتەر، مەملەكەتتىك اتقارۋشى ورگاندارعا قاراعاندا توتەنشە جاعدايلار مينيسترلىگى مەن اتالعان ورگانعا قاراستى مەكەمەلەردىڭ اتقاراتىن مىندەتتەرى مەن قوعام الدىنداعى جاۋاپكەرشىلىگى، ادام ءومىرى ءۇشىن ماڭىزدىلىعى الدە قايدا جوعارى.
باسىمىزعا ءىس ءتۇسىپ، قانداي دا ءبىر اپاتقا ۇشىراساق، كۇتپەگەن وقىس جاعدايعا تاپ بولساق، ءورت شىقسا دا، سۋ تاسقىنى بولسا دا، جەر سىلكىنىپ، سەل جۇرسە دە ەڭ الدىمەن توتەنشەلىكتەرگە قوڭىراۋ شالامىز.
قازاقستان رەسپۋبليكاسىنىڭ توتەنشە جاعدايلار مينيسترلىگىنىڭ ءباسپاسوز قىزمەتى مالىمدەگەندەي بيىل جىل باسىنان بەرى «112» بىرىڭعاي كەزەكشىلىك-ديسپەتچەرلىك قىزمەتى پۋلتىنا حالىقتان 5 146 831 قوڭىراۋ كەلىپ تۇسكەن.
جالپى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ بولىمشەلەرى جانە رەسپۋبليكالىق جەدەل-قۇتقارۋ جاساعى 9 767 ادامدى قۇتقارسا، 14 190 ادامدى قاۋىپتى اۋماقتاردان ەۆاكۋاتسيالاعان.
زارداپ شەككەن 178 ادامعا العاشقى مەديتسينالىق كومەك كورسەتىلسە، توتەنشە جاعداي ورىندارىنان 527 ادامنىڭ دەنەسى شىعارىلدى.
شۇعىل دابىل بويىنشا 56 088 رەت وقىس وقيعا ورنىنا بارۋ جۇمىستارى جۇرگىزىلگەن، سونىڭ ىشىندە 10 122-ءسى ورتكە تيەسىلى بولسا، 8 061 - اۆاريالىق-قۇتقارۋ جۇمىستارىنىڭ ەنشىسىندە، 33 741 - ءورت رەتىندە ەسەپكە الىنبايتىن جانۋ بولسا، 83 - كورىنەۋ جالعان شاقىرتۋ، 1 573 راستالماعان جانۋ فاكتىلەرى، 2 508 باسقا دا وقىس جاعدايلار.
جوعارىداعى مالىمەتتە قۇتقارۋشىلارعا 83 رەت جالعان شاقىرتۋلار تۇسكەندىگى ايتىلعان. وسى رەتتە، كورىنەۋ جالعان شاقىرتۋلار جاسايتىن تۇلعالارعا ايتارىمىز: «ءسىز مۇمكىن ەكى قولىڭىز الدىڭىزعا سىيماي ەرىگىپ وتىرعان بولارسىز؟ بالكىم وسىلايشا كوڭىلىڭىزدى كوتەرگىڭىز كەلگەن شىعار؟ الايدا، جالعان قوڭىراۋ شالماستان بۇرىن، ءسىزدىڭ وتىرىك ويىنىڭىز كەلەسى ءبىر جاننىڭ ءومىرىن جالماپ كەتۋى مۇمكىن ەكەندىگىن دە ەستەن شىعارماڭىز». راسىمەن دە توتەنشە جاعداي ورىن الاتىن بولسا ءار ءبىر ءساتتىڭ ماڭىزدى ەكەندىگىن، ءبىر مينۋتتىڭ ءوزى ادام ءومىرىن قۇتقارىپ قالۋعا بولاتىن مۇمكىندىك بەرەتىنىن ۇمىتپاۋىمىز كەرەك.
ادامنىڭ اعاتتىعىنان بولىپ بايقاۋسىزدا ورىن الىپ جاتقان، ارتى ورنى تولماس قايعىعا اكەلىپ سوعاتىن وقىس وقيعالار مەن توتەنشە جاعدايلاردان ساق بولايىق.
ەركە جومارت،
«ادىرنا» ۇلتتىق پورتالى
