Elimizdegi basqa da mınıstrlikter, memlekettik atqarýshy organdarǵa qaraǵanda Tótenshe jaǵdaılar mınıstrligi men atalǵan organǵa qarasty mekemelerdiń atqaratyn mindetteri men qoǵam aldyndaǵy jaýapkershiligi, adam ómiri úshin mańyzdylyǵy álde qaıda joǵary.
Basymyzǵa is túsip, qandaı da bir apatqa ushyrasaq, kútpegen oqys jaǵdaıǵa tap bolsaq, órt shyqsa da, sý tasqyny bolsa da, jer silkinip, sel júrse de eń aldymen tótenshelikterge qońyraý shalamyz.
Qazaqstan Respýblıkasynyń Tótenshe jaǵdaılar mınıstrliginiń baspasóz qyzmeti málimdegendeı bıyl jyl basynan beri «112» biryńǵaı kezekshilik-dıspetcherlik qyzmeti pýltyna halyqtan 5 146 831 qońyraý kelip túsken.
Jalpy órt sóndirý jáne avarııalyq-qutqarý jumystary qyzmetiniń bólimsheleri jáne Respýblıkalyq jedel-qutqarý jasaǵy 9 767 adamdy qutqarsa, 14 190 adamdy qaýipti aýmaqtardan evakýaııalaǵan.
Zardap shekken 178 adamǵa alǵashqy medıınalyq kómek kórsetilse, tótenshe jaǵdaı oryndarynan 527 adamnyń denesi shyǵaryldy.
Shuǵyl dabyl boıynsha 56 088 ret oqys oqıǵa ornyna barý jumystary júrgizilgen, sonyń ishinde 10 122-si órtke tıesili bolsa, 8 061 - avarııalyq-qutqarý jumystarynyń enshisinde, 33 741 - órt retinde esepke alynbaıtyn janý bolsa, 83 - kórineý jalǵan shaqyrtý, 1 573 rastalmaǵan janý faktileri, 2 508 basqa da oqys jaǵdaılar.
Joǵarydaǵy málimette qutqarýshylarǵa 83 ret jalǵan shaqyrtýlar túskendigi aıtylǵan. Osy rette, kórineý jalǵan shaqyrtýlar jasaıtyn tulǵalarǵa aıtarymyz: «Siz múmkin eki qolyńyz aldyńyzǵa syımaı erigip otyrǵan bolarsyz? Bálkim osylaısha kóńilińizdi kótergińiz kelgen shyǵar? Alaıda, jalǵan qońyraý shalmastan buryn, sizdiń ótirik oıynyńyz kelesi bir jannyń ómirin jalmap ketýi múmkin ekendigin de esten shyǵarmańyz». Rasymen de tótenshe jaǵdaı oryn alatyn bolsa ár bir sáttiń mańyzdy ekendigin, bir mınýttyń ózi adam ómirin qutqaryp qalýǵa bolatyn múmkindik beretinin umytpaýymyz kerek.
Adamnyń aǵattyǵynan bolyp baıqaýsyzda oryn alyp jatqan, arty orny tolmas qaıǵyǵa ákelip soǵatyn oqys oqıǵalar men tótenshe jaǵdaılardan saq bolaıyq.
Erke Jomart,
«Adyrna» ulttyq portaly
