(حەتت اڭىزى)
بىردە، *اريننا شاھارىنداعى حرام قىزمەتشىسىنە الاباجاقتاۋ كيىنگەن ادام كەلەدى. موينىندا – اعاش بۇعاۋ، تاس توبەسىندە – سەبەت پەن جەبەلەر.
– ماعان نە بولدى؟ – دەدى الاڭعاسارلاۋ قوناق سۇراۋلى جۇزبەن. – نەگە جارما كيگىزىپ، باسىما سەبەت قويعان؟ ۇيدەن ەشتەمە ۇرلاماعام ەم عوي! سيىرعا دا، بۇقاعا دا، قويعا دا تيىسكەم جوق! ارتى جاقسىلىقپەن تىنسا جارار ەدى! ەلدەردى ويراندايمىن، وڭدىرمايمىن! جەبەلەردى دۇسپان جۇرەگىنە قادايمىن.
– ءبۇيتىپ قورقىتپا، ءبىزدى! – دەدى قۇدىرەت. – وزەندەردى دە، تاۋلاردى دا، مۇحيتتاردى دا اشسا – الاقانىندا، جۇمسا – جۇدىرىعىندا ۇستايتىن كىم ەكەنىن بىلمەۋشى مە ەڭ؟ ورنىنان ويىسپاس ءۇشىن تاۋلاردى شەگەلەپ قويعان مىنا – مەن. تەڭىزدەر دە تەڭسەلىپ، جاعاعا قاشىپ، ءتۇبى جالاڭاشتانباس ءۇشىن، ولاردى دا قاقتىم، قازىقشا.
قۇدىرەت اڭگىمە اسەرىنەن شىعا الماي تۇرعانىندا بەيتانىس باسىنا ءمۇيىز ءبىتىپ، تۇلا بويىن الا-قۇلا ءجۇن باسىپ، اياق-قولىن تۇياق الماستىرۋعا اينالدى. اڭىرايىپ، اۋزىن اشىپ، كوزىن جۇمعان ءارىسى قاتتى ۇرەيلەنگەن حرام قىزمەتشىسى وسى وزگەرىستىڭ كۋاسى بولدى. ەڭگەزەردەي بۇقا الگى جەردەن ەنتەلەي شىققاندا عانا قىزمەتشى ايعاي سالدى:
– قاراڭدار، قاراڭدار، ۋا، جاراندار، بۇل – قاۋىپتى وگىز! بىراق، ءمۇيىزى نەلىكتەن قايىرىلعان ەكەن، قالايىق؟
بۇقا بۇرىلا عاپ:
– ويتكەنى، جورىققا شىققام. الدىمدى بيىك تاۋ بوگەگەن-ءدى. ونى دا ورنىنان قوزعالتتىم. تەڭىزدى دە جەڭدىم. سودان، مىنە ءيىلىپ قالعانى، – دەپ وكىردى.
بۇل تۋرالى تاقتا تاپجىلماي وتىرعان ايەل بەينەسىندەگى **كۇن قۇدايى ءبىلىپ قويادى. ول سوندا سويلەيدى، سويلەگەندە ءبۇي دەيدى:
– ***حالپاعا تارتىڭدار. جاۋىنگەرلەر شايقاسقا ءازىر تۇرسىن دەپ ايتىڭدار.
*اريننا – حەتتەردىڭ قاسيەتتى قالاسى، سول تىلدەن تارجىمالاعاندا قاينار، باستاۋ دەگەن سوزبەن ماندەس.
**بۇل – حەتت ميفولوگياسىنداعى قۇدايلار پاتشاسى – تەشۋبتىڭ (تەسسوب، تەششۋب) جارى – اريننيتي.
***حالپا – حەتت پاتشالىعى كەزىندەگى ەڭ ەجەلگى كەنت.
اۋدارعان: قازاقستان جازۋشىلار وداعىنىڭ
مۇشەسى، جازۋشى-دراماتۋرگ،
ادەبيەتتانۋشى، سىنشى الىبەك بايبول.
ەرتەگى اۋدارماشىنىڭ رۇقساتىمەن جاريالاندى.
اۆتورلىق قۇقىق ساقتالعاندىقتان كوشىرىپ باسۋعا بولمايدى!
