(hett ańyzy)
Birde, *Arınna shaharyndaǵy hram qyzmetshisine alabajaqtaý kıingen adam keledi. Moınynda – aǵash buǵaý, tas tóbesinde – sebet pen jebeler.
– Maǵan ne boldy? – dedi alańǵasarlaý qonaq suraýly júzben. – Nege jarma kıgizip, basyma sebet qoıǵan? Úıden eshteme urlamaǵam em ǵoı! Sıyrǵa da, buqaǵa da, qoıǵa da tıiskem joq! Arty jaqsylyqpen tynsa jarar edi! Elderdi oırandaımyn, ońdyrmaımyn! Jebelerdi duspan júregine qadaımyn.
– Búıtip qorqytpa, bizdi! – dedi qudiret. – Ózenderdi de, taýlardy da, muhıttardy da ashsa – alaqanynda, jumsa – judyryǵynda ustaıtyn kim ekenin bilmeýshi me eń? Ornynan oıyspas úshin taýlardy shegelep qoıǵan myna – men. Teńizder de teńselip, jaǵaǵa qashyp, túbi jalańashtanbas úshin, olardy da qaqtym, qazyqsha.
Qudiret áńgime áserinen shyǵa almaı turǵanynda beıtanys basyna múıiz bitip, tula boıyn ala-qula jún basyp, aıaq-qolyn tuıaq almastyrýǵa aınaldy. Ańyraıyp, aýzyn ashyp, kózin jumǵan árisi qatty úreılengen hram qyzmetshisi osy ózgeristiń kýási boldy. Eńgezerdeı buqa álgi jerden enteleı shyqqanda ǵana qyzmetshi aıǵaı saldy:
– Qarańdar, qarańdar, ýa, jarandar, bul – qaýipti ógiz! Biraq, múıizi nelikten qaıyrylǵan eken, qalaıyq?
Buqa buryla ǵap:
– Óıtkeni, joryqqa shyqqam. Aldymdy bıik taý bógegen-di. Ony da ornynan qozǵalttym. Teńizdi de jeńdim. Sodan, mine ıilip qalǵany, – dep ókirdi.
Bul týraly taqta tapjylmaı otyrǵan áıel beınesindegi **Kún qudaıy bilip qoıady. Ol sonda sóıleıdi, sóılegende búı deıdi:
– ***Halpaǵa tartyńdar. Jaýyngerler shaıqasqa ázir tursyn dep aıtyńdar.
*Arınna – hetterdiń qasıetti qalasy, sol tilden tárjimalaǵanda qaınar, bastaý degen sózben mándes.
**Bul – hett mıfologııasyndaǵy qudaılar patshasy – Teshýbtyń (Tessob, Teshshýb) jary – Arınnıtı.
***Halpa – Hett patshalyǵy kezindegi eń ejelgi kent.
Aýdarǵan: Qazaqstan Jazýshylar odaǵynyń
múshesi, jazýshy-dramatýrg,
ádebıettanýshy, synshy Álibek BAIBOL.
Ertegi aýdarmashynyń ruqsatymen jarııalandy.
Avtorlyq quqyq saqtalǵandyqtan kóshirip basýǵa bolmaıdy!
