سولتۇستىك وڭىردە قازان ايىنان باستاپ ساۋىرگە دەيىن وت جاعادى. جالپى بىزدە قىزىق. اۋا-رايى جىلى وڭتۇستىكتە گاز بار. ەڭ سۋىق سولتۇستىكتە گاز جوق. قاراعاندى، اقمولا وبلىسى اۋداندارىندا جۇمىس ىستەگەندە ءار ءۇيدىڭ جىلدا 18-20 توننا كومىر تۇسىرەتىنىن، كومىردىڭ باعاسى تونناسىنا 15-20 مىڭ تەڭگە ارالىعىندا ەكەنىن كورىپ تاڭ قالعانمىن. ءار وتباسىنا جىل سايىنعى شىعىن عوي قىپ-قىزىل. جىلدىڭ 7 ايىندا توقتاماي وت جاعۋ، كوكتەمدە ونىڭ كۇلىن شىعارۋدى ايتسايشى. قىسى دا قاتتى.
جالپى سولتۇستىككە گاز تارتۋ ءبىزدىڭ مەملەكەت شەشۋى ءتيىس ماسەلەگە جاتادى.
بۇگىن استانادا اسپان كوك ءتۇتىن بولدى. سەبەبى جەر ءۇيدىڭ بارلىعى كومىر جاعادى. كەش تە بولسا بۇل ماسەلەنى ءوز كۇشىمىزبەن شەشۋگە كىرىستىك. تاۋەلسىزدىكتىڭ ارقاسىندا "سارىارقا" ماگيسترالدى گاز قۇبىرىن سالۋ جوباسى ىسكە قوسىلىپ، بيىل العاش رەت استاناعا گاز قۇبىرى كەلدى. كەلەسى جىلدان باستاپ جەر ۇيلەرگە تارتىلاتىن شىعار.
مەنىڭشە بۇنىمەن توقتاپ قالماي سولتۇستىك وڭىرلەردى گازداندىرۋعا كۇش سالۋ كەرەك. اقش-تىڭ دا قىسى مەن ايازى قاتتى شتاتتارى بار. بىراق كومىر جاعىپ وتىرعانىن كورمەدىم. كەڭەس داۋىرىندە شەشىلمەگەن بۇل پروبلەمانى تاۋەلسىز قازاقستان ءوزىمىز شەشۋگە ءتيىسپىز. وڭتۇستىك قازاعىنىڭ سولتۇستىككە كوشپەيتىنىنىڭ ءبىر سەبەبى دە وسى. كىم مىنا زاماندا سۋىقتا 7 اي وت جاققىسى كەلەدى؟ شىمكەنتتە گازبەن وتىرعان حالىققا قىستىڭ قاقاعان ايازىندا جىلدا 7 اي كومىر جاعىپ ءومىر سۇرۋگە بەيىمدەلۋ قيىن. سوندىقتان سولتۇستىكتى ءومىر سۇرۋگە قولايلى، بارلىق جاعدايى جاسالعان وڭىرگە اينالدىرۋ قاجەت. مەملەكەتتىك مۇددە تۇرعىسىنان بۇل شەشىلۋى ءتيىس ستراتەگيالىق قادام.
