Soltústik óńirde qazan aıynan bastap sáýirge deıin ot jaǵady. Jalpy bizde qyzyq. Aýa-raıy jyly ońtústikte gaz bar. Eń sýyq soltústikte gaz joq. Qaraǵandy, Aqmola oblysy aýdandarynda jumys istegende ár úıdiń jylda 18-20 tonna kómir túsiretinin, kómirdiń baǵasy tonnasyna 15-20 myń teńge aralyǵynda ekenin kórip tań qalǵanmyn. Ár otbasyna jyl saıynǵy shyǵyn ǵoı qyp-qyzyl. Jyldyń 7 aıynda toqtamaı ot jaǵý, kóktemde onyń kúlin shyǵarýdy aıtsaıshy. Qysy da qatty.
Jalpy soltústikke gaz tartý bizdiń memleket sheshýi tıis máselege jatady.
Búgin Astanada aspan kók tútin boldy. Sebebi jer úıdiń barlyǵy kómir jaǵady. Kesh te bolsa bul máseleni óz kúshimizben sheshýge kiristik. Táýelsizdiktiń arqasynda "Saryarqa" magıstraldy gaz qubyryn salý jobasy iske qosylyp, bıyl alǵash ret Astanaǵa gaz qubyry keldi. Kelesi jyldan bastap jer úılerge tartylatyn shyǵar.
Menińshe bunymen toqtap qalmaı soltústik óńirlerdi gazdandyrýǵa kúsh salý kerek. AQSh-tyń da qysy men aıazy qatty shtattary bar. Biraq kómir jaǵyp otyrǵanyn kórmedim. Keńes dáýirinde sheshilmegen bul problemany táýelsiz Qazaqstan ózimiz sheshýge tıispiz. Ońtústik qazaǵynyń soltústikke kóshpeıtininiń bir sebebi de osy. Kim myna zamanda sýyqta 7 aı ot jaqqysy keledi? Shymkentte gazben otyrǵan halyqqa qystyń qaqaǵan aıazynda jylda 7 aı kómir jaǵyp ómir súrýge beıimdelý qıyn. Sondyqtan soltústikti ómir súrýge qolaıly, barlyq jaǵdaıy jasalǵan óńirge aınaldyrý qajet. Memlekettik múdde turǵysynan bul sheshilýi tıis strategııalyq qadam.
