الماتى پوليتسياسى ەسىرتكى زەرتحاناسىن جويۋ بويىنشا ارنايى ءىس-شارا جۇرگىزدى. بۇل تۋرالى ادماتى پد-ءنىڭ ءباسپاسوز قىزمەتى حابارلادى.
1994, 1996 جانە 1997 جىلى تۋعان ءۇش جىگىت پوليتسيا نازارىندا بولعان. ولاردىڭ قىلمىستىق ءىس-ارەكەتىن قر ءىىم ەقكد جانە الماتى قالاسى پد ەقكب قىزمەتكەرلەرى بىرنەشە ارنايى ءىس-شارالارمەن كۋالاندىردى.
كەشكى جەتى شاماسىندا اباي داڭعىلىندا كولىك ىشىندە ەكى ادامى بار Hyundai اۆتوكولىگى ۇستالدى. كۇدىكتىلەردىڭ بىرەۋى – ا.ازاماتتى سانكتسيالانعان ءتىنتۋ كەزىندە «مەفەدرون» سينتەتيكالىق ەسىرتكى سالىنعان بۋما تابىلدى. كۇدىكتىلەردىڭ جەتىسۋ ىقشام اۋدانىنداعى قاراپايىم پاتەردىڭ قابىرعاسىندا ەسىرتكى ءشوبىن جاساعانى انىقتالدى. ەسىرتكى جاساۋعا ارنالعان حيميالىق كومپونەنتتەردى ولار توڭازىتقىشتا ساقتاعان. زال بولمەسىندە اق ءتۇستى ۇنتاقتى زات، پوليەتيلەن پاكەتتەر (وراۋعا ارنالعان), وسىمدىك تەكتەس جاسىل ءتۇستى ۇنتاق، قاباتتارى بار شىنى كولبالار، اق ءتۇستى ۇنتاقتى زات جانە باسقا جابدىقتار تابىلدى. جاتىن بولمەدە حيميالىق رەاگەنتتەردى، سينتەتيكالىق ەسىرتكىلەردى شىعارۋعا ارنالعان ءتۇرلى كومپونەنتتەر، ەكى ماگنيتتى ارالاستىرعىش، ءارتۇرلى كولبالار، جەلدەتكىش جانە ەكى ماي رادياتورلارىن ساقتاعان. ءبىز ءۇشىنشى كۇدىكتىنى جالدامالى پاتەردەن ۇستادىق، – دەدى الماتى قالاسى پد ەسىرتكى قىلمىستارىنا قارسى كۇرەس باسقارماسىنىڭ باستىعى ەرلان الماعامبەتوۆ.
سوت-حيميالىق ساراپتامانىڭ قورىتىندىسىنا سايكەس تاركىلەنگەن زاتتار پسيحوتروپتىق زات «مەتكاتينون» (مەفەدرون) ەكەنىن انىقتالعان. تاركىلەنگەن زات پەن دايىن ءونىمنىڭ جالپى سالماعى 10 كيلوگراممدى قۇرادى.
ۇستالعاندار قاماۋعا الىندى. قىلمىستىق ءىس قر قك-ءنىڭ 297 بابى قىلمىس بەلگىلەرى بويىنشا تەرگەلۋدە. سونىمەن قاتار، جالپى جەدەل ءىس-شارالارمەن قاتار، ەسىرتكى قىلمىسىنا قارسى ءىس-قيمىل سالاسىنداعى الەۋمەتتىك ۇگىت ماتەريالدارى ارقىلى حالىقتىڭ ەسىرتكىگە قارسى يممۋنيتەتتىڭ الدىن الۋ جانە قالىپتاستىرۋ بويىنشا جۇمىس تۇراقتى نەگىزدە جۇرگىزىلىپ جاتقانىن اتاپ وتكەن ءجون. بۇگىندە قالا اۋماعىندا 56 سىرتقى جارنامالىق تابلويدتار – بيلبوردتار بار. سونداي-اق، 79 LED-ەكراندار ناشاقورلىقتىڭ الدىن-الۋعا باعىتتالعان اقپاراتتى تاراتادى، – دەپ قورىتىندىلادى الماعامبەتوۆ.
فوتو اشىق دەرەككوزدەن الىندى
