سايلاۋدىڭ بولعاننان بولادىسى قىزىق، الداعى ساياسي دودا تاعى دا التەرناتيۆاسىز وتپەك، ناتيجەسىن دە ىشتەي سەزىپ وتىرمىز. سول باياعى پارتيالار، بۇل ەندى تاڭعالدىرمايتىن بولدى. بىراق بۇل جولى قيسىنسىز كورىنەتىن ءبىر جايت - كوممۋنيستەردىڭ پارلامەنتكە قايتا ءوتىپ كەتۋ قاۋپى. ارينە، بۇگىن ولاردىڭ قوعامدا ەشقانداي بەدەلى جوق. دەسە دە، بۇلاردىڭ قازاق پارلامەنتىندە وتىرۋى كوممۋنيستىك رەجيمنىڭ قىسپاعىنان وتكەن ءبىز ءۇشىن، ءبىزدىڭ ەلدىگىمىز ءۇشىن سىن ەكەنى انىق.
وسىعان دەيىن ءبىر-ەكى ۇلتشىل اعالارىمىز بۇل ماسەلەنى قوزعاپ، «كوممۋنيستەر پارلامەنتتە بولمايدى» دەگەن سىڭايلى پىكىرلەرىن ايتقان. مۇنى باسىندا اقوردانىڭ بەلگىسى رەتىندە قابىلدادىم: كوممۋنيستەرگە جول جابىلىپ، الدىن الا حالىقتى قۇلاعدار ەتكەنى شىعار دەدىم. بىراق، قانىشەرلەر ءىزباسارلارىنىڭ سوڭعى كەزدەگى بەلسەندىلىگىنە قاراعاندا، ولار قايتا سايلانۋعا ءۇمىتتى.
پارلامەنتكە جول كوممۋنيستەر ءۇشىن ءبىرجولا جابىلۋى كەرەك. نەگە ەكەنىن تۇسىندىرەيىن.
• ورىستاردا «سكولكو حرەن مەدوم نە نازىۆاي، سلاششە نە ستانەت» دەگەن ءسوز بار. ولار اتاۋلارىن وزگەرتىپ، كوممۋنيستەر اتاۋىنان باس تارتىپ، حالىق پارتياسى بولىپ شىعا كەلدى. ءوز اتاۋىنان باس تارتقان پارتياعا قالاي سەنۋگە بولادى؟
• تاۋەلسىزدىك الىپ، الاشورداشىلاردى اقتاپ، باعاسىن بەردىك. ولاردى ولىمگە قيعان كوممۋنيستەردىڭ ءىزباسارلارىن تورىمىزدە تايراڭداتىپ قويۋ - ارداقتىلارىمىزدىڭ ارۋاعىن قورلاۋ، نامىسسىزدىعىمدىڭ ايعاعى.
• ولار قيتۇرقىلىققا بارىپ وتىر. ەلەكتوراتتىڭ ساياسي ساۋاتىنىڭ ءالى دە تومەن ەكەنىن پايدالانىپ، «حالىق» دەگەن ادەمى ءسوزدى قوسىپ، ۇپاي جيناماق. قوي تەرىسىن جامىلعان قاسقىر دەۋگە بولادى. ساياسي ساۋاتى ءالى دە تومەندەۋ ەلەكتورات مۇنى اجىراتا الماي قالۋى مۇمكىن.
• وركەنيەتتى ەلدەردىڭ بارلىعى ليۋستراتسيا جاساپ، كوممۋنيزمدى فاشيزمگە تەڭەپ، بۇرىنعى كوممۋنيستەردىڭ قانداي دا ءبىر مەملەكەتتىك قىزمەتكە كەلۋىنە باياعىدا-اق تىيىم سالىپ تاستاعان. بىزگە دە وركەنيەتتىك تاڭداۋ جاساۋ كەرەك.
ءيا، قازىرگى سايلاۋعا تۇسكەن پارتيالاردى ناعىز باسەكەلەستەر، كوممۋنيستەردەن ارتىق ءىس تىندىرادى دەۋگە كەلمەس. بارلىعى بىلەتىن باياعى ويىنشىلار، سايلاۋدىڭ يميتاتسياسى. «بىرلىك» «ادال» بولىپ وزگەرىپ شىعا كەلدى، بۇعان دەيىن كومادا جاتتى، سايلاۋدان كەيىن تاعى ۇيقىعا كەتۋى عاجاپ ەمەس. «نۇر وتاننىڭ» جايى تۇسىنىكتى.
