ءسىز دە «ەر ادام» جانە «جۇكتىلىك» ۇعىمدارىن بىرىكتىرۋ مۇمكىن ەمەس دەپ ويلايسىز با؟ قاتەلەسەسىز! پسيحولوگيادا «كۋۆاد سيندرومى» دەپ اتالاتىن ەرەكشە تەرمين بار.
بۇل تەرمين «ەركەكتەردىڭ الدامشى جۇكتىلىگى» ماعىناسىن بىلدىرەدى. باسقاشا ايتقاندا، «كۋۆاد» – ەر ادام جۇكتىلىكتىڭ ءتۇرلى بەلگىلەرىن باسىنان وتكىزەتىن جاعدايدىڭ جالپى اتاۋى.
ول پسيحولوگيالىق اۋرۋلاردىڭ قاتارىنا جاتادى. ادەتتە «الدامشى جۇكتىلىك» تۇڭعىش بالاسىن كۇتكەن 30 جاسقا دەيىنگى بولاشاق اكەلەردە ءجيى كەزدەسەدى. ال كەيبىر زەرتتەۋشىلەردىڭ پىكىرىنشە، بۇل سيندروممەن كىشكەنتايىنان اكەسىنەن الىس بولعان ەر ادامدار اۋىرادى ەكەن.
ەر ادامدار جۇكتىلىكتىڭ قانداي بەلگىلەرىن سەزىنەدى؟
بولاشاق اكەلەر الدامشى جۇكتىلىكتىڭ تومەندەگىدەي فيزيولوگيالىق بەلگىلەرىن سەزىنەدى:
- جۇرەك اينۋ جانە قۇسۋ;
- بەل اۋرۋى;
- تابەتتىڭ تومەندەۋى;
- توكسيكوز;
- اياق-قولدىڭ تىرىسۋى;
- ءتىس اۋرۋى.
كەۋدە مەن ءىشتىڭ ءوسۋى سەرەك كەزدەسەدى.
پسيحيكالىق بەلگىلەرگە مىنالار جاتادى:
- ۇيقىسىزدىق;
- نەگىزسىز قورقىنىش;
- كوڭىل-كۇيدىڭ ءجيى وزگەرۋى;
- اپاتيا;
- مازاسىزدىق جانە ت.ب.
كۋۆاد سيندرومىنىڭ بەلگىلەرى كوپ جاعدايدا ايەل جۇكتىلىگىنىڭ 3-4 ايلارىندا پايدا بولادى. ادەتتە، ەر ازامات كەنەتتەن سيمپاتيكالىق جۇكتىلىككە شالدىققان كەزدە، ايەل ادام جۇكتىلىكتىڭ ەشقانداي بەلگىلەرىن سەزبەيدى. قورىقپاڭىز، بالا دۇنيەگە كەلە سالاسىمەن بۇل بەلگىلەر وزدىگىنەن جوعالادى.
سيندروم قاي ەلدەردە ءجيى كەزدەسەدى؟
H. Trethowan مەن M. A. Conlon كەلتىرگەن دەرەكتەرگە سۇيەنەتىن بولساق، بۇل سيمپتومدار جيىنتىعىن ەركەكتەردىڭ 11%-ى باستان وتكەرەدى. ال سيندرومعا تايلاند ەلىنىڭ ازاماتتارى ءجيى شالدىعادى ەكەن (60%). اقش-تا ەركەكتەردىڭ شامامەن 40%-ى، شۆەتسيادا 20%-ى ەر ادامدار ءۇشىن تاڭقالارلىق بەلگىلەردى بايقايدى. قۋانىشقا وراي، مۇنداي سيندروممەن اۋىراتىندار ءبىزدىڭ ەلىمىزدە ءالى كەزدەسكەن جوق.
ەمدەلۋ جولدارى قانداي؟
ەشقانداي ءدارى-دارمەك ناۋقاستى الدامشى جۇكتىلىكتەن قۇتقارا المايدى. ەر ادام «كۋۆاد» سيندرومىمەن اۋىرعان جاعدايدا، دەرەۋ پسيحوتەراپيالىق ەم قابىلداۋى قاجەت. پسيحولوگتار سيندرومنىڭ جاسىرىن سەبەبىن انىقتاپ، ونىمەن كۇرەسۋگە كومەكتەسەدى.
«الدامشى جۇكتىلىكتى» باقىلاۋ ءۇشىن ەر ادام كەلەسى ارەكەتتەردى ورىنداۋى كەرەك:
- بولاشاق اتا-انالارعا ارنالعان كۋرستارعا جازىلۋ;
- وتباسىنا جانە دوستارىنا پروبلەمالارى تۋرالى مۇمكىندىگىنشە ءجيى ايتۋ;
- جۇكتى ايەلىمەن سىرلاسىپ، مازالايتىن ماسەلەلەردى تالقىلاۋ;
- ارنايى ادەبيەتتەردى وقۋ.
كۋۆاد سيندرومى - وتە قىزىقتى جانە ەرەكشە قۇبىلىس. ەڭ باستىسى - ەر ادام جۇكتى ايەلىن مازالاماي، سابىرلى بولۋعا تىرىسۋى كەرەك. بىر وكىنىشتىسى، عالىمدار كۇنى بۇگىنگە دەيىن «الدامشى جۇكتىلىكتىڭ» پايدا بولۋىنىڭ ناقتى سەبەپتەرىن انىقتاي الماي كەلەدى.
ديانا اسان،
«ادىرنا» ۇلتتىق پورتالى
