قازاقستاندا «بالا ءناسىبى» اتتى جاردەماقى ەنگىزۋ ۇسىنىلدى

1824
Adyrna.kz Telegram

«اۋىل» پارتياسىنىڭ مۇشەلەرى «بالا ءناسىبى» اتتى جاردەماقى تاعايىنداۋدى ۇسىندى، دەپ حابارلايدى قازاقپارات ءتىلشىسى. «اۋىل» حدپپ ورتالىق اپپاراتىنىڭ جەتەكشىسى قۋانىش سەيىتجانوۆتىڭ ايتۋىنشا، قازاقستاندا مۇقتاج نەمەسە مۇقتاج ەمەس دەپ بولمەي، بالالاردىڭ بارىنە بىردەي جاردەماقى تاعايىنداۋ كەرەك. «حالىقتىڭ امانات ەتكەن ساۋالدارىنىڭ ءبىرى («ەل اماناتى» ساۋالناماسى) – الەۋمەتتىك سالادا، ءار بالاعا جاردەماقى تاعايىنداۋ تۋرالى پارتيا ۇسىنىپ وتىرعان باستاما. دەمەك، قوعامدا بۇل پروبلەما بۇرىننان بار. پارتيانىڭ بۇعان دەيىنگى وتكىزگەن ءىس-شارالارىندا بۇل ماسەلە تالقىلانعان. ارينە، قازىرگى تاڭدا انا مەن بالانى قولداۋ سالاسىندا الەۋمەتتىك جاردەماقىنىڭ نەشە ءتۇرى جوق ەمەس – بار. بەلگىلى ءبىر دەڭگەيدە بۇل جاردەماقىنىڭ تۇرلەرى كەيدە ءبىر-بىرىنە قايشى كەلىپ تە جاتادى. ماسەلەن، ءبىر عانا انا مەن بالاعا ارنالعان جاردەماقى 14 ءتۇرلى زاڭمەن رەتتەلەدى ەكەن. بۇل بەلگىلى ءبىر دەڭگەيدە حالىقتى شاتاستىرىپ جاتىر»، - دەدى قۋانىش سەيىتجانوۆ ورتالىق كوممۋنيكاتسيالار قىزمەتىندە وتكەن «اۋىل» پارتياسىنىڭ ءباسپاسوز ءماسليحاتىندا. ونىڭ ايتۋىنشا، كەيىننەن تاعايىندالعان اتاۋلى الەۋمەتتىك كومەكتىڭ دە قايشىلىقتارى جوق ەمەس. «ماسەلەن، قازاقستاندا 776 مىڭ ادام اتاۋلى الەۋمەتتىك كومەكتى السا، سونىڭ 492 مىڭى بالالارعا ارنالعان اتاۋلى الەۋمەتتىك كومەك ەكەن. ءبىز نەگە بالانى جاس كۇنىنەن ءبىرى الەۋمەتتىك كومەككە مۇقتاج، ەكىنشىسى مۇقتاج ەمەس دەپ ءبولۋىمىز كەرەك؟ بۇل – يدەولوگيالىق مازمۇن تۇرعىسىنان دا وتە قاتە. ويتكەنى ءبىز بالانىڭ جانىن جاسىنان جارالايمىز. مۇنى دانا حالقىمىز «ءار بالانىڭ ءوز ءناسىبى بولادى» دەپ بىراق اۋىز سوزبەن ايتقان. ءبىزدىڭ ۇستانىپ وتىرعان پوزيتسيامىز – 18 جاسقا دەيىنگى بالالاردى الەۋمەتتىك كومەككە مۇقتاج نەمەسە مۇقتاج ەمەس دەپ بولمەي، تولەماقى تاعايىنداۋ. بۇعان ەلىمىزدىڭ ەكونوميكالىق مۇمكىندىكتەرى جەتكىلىكتى. بۇل ۇسىنىستى كوكتەن العان جوقپىز. ساراپتامانىڭ ناتيجەسىندە ۇسىنىلدى. الەۋمەتتىك تولەمگە كەلەر بولساق، اسان مەن ۇسەننىڭ ەرتەگىسى ەسكە تۇسەدى. بالا قاشان دا - بالا. ول - ءبىزدىڭ بولاشاعىمىز»، - دەدى ول. «اۋىل» پارتياسىنىڭ مۇشەلەرى بۇل جاردەماقىنى «بالا ءناسىبى» دەپ اتاۋدى ۇسىنىپ وتىر. ايتا كەتسەك بۇگىنگى ءباسپاسوز ءماسليحاتىندا «اۋىل» حدپپ توراعاسىنىڭ ءبىرىنشى ورىنباسارى تولەۋتاي راقىمبەكوۆ «ەل اماناتى» جالپىۇلتتىق ساۋالناماسىنىڭ ناتيجەسىن جاريالاعان بولاتىن.

پىكىرلەر