شىمكەنتتەگى مۇعالىمدەردەن اقشا جيناۋدى ەلگە جاريالاۋ -امالسىزدىڭ كۇنى. بۇل بۇرىننان كەلە جاتقان ءۇردىس. ماعان دا قانشاما مۇعالىم جازدى وسى جايلى. بىراق تىكەلەي دالەل بولماعاندىقتان جانە مۇعالىمنىڭ تاعدىرى ءۇشىن الاڭداۋىمنان جەلىگە سالمادىم.
اقشا جيناۋدى «زاڭداستىراتىن» بىرنەشە سىلتاۋ بار. ەڭ كوپ قولدانىلاتىنى سەس-ءتىڭ ايىپۇلى. ايىپپۇلدى اكىمشىلىككە سالادى. تولەيتىن مۇعالىمدەر. سوندا دەيمىن-اۋ، اجەتحانا، اسحانا، ءدالىز تازالىعىنا مۇعالىمنىڭ نە قاتىسى بار؟ جۇمىستى ۇيىمداستىرا الماعان زاۆحوز بەن ديرەكتور ەمەس پە؟ جۇمىسقا كەلمەيتىن تۋىستارىن راسىمدەپ، بەكەر اقشا الۋعا ۇمتىلماۋ كەرەك. ءار مەكتەپتە ديرەكتوردىڭ قۇرىعاندا (قۇرىعاندا دەپ تۇرمىن) ءبىر-ەكى جاقىنى جۇمىس ىستەيتىنى بەلگىلى. ديپلومى بولسا مۇعالىم، بولماسا وت جاعۋشى، ەلەكتريك، ۆاحتەر، سانتەحنيك، اۋلا سىپىرۋشى ت.ب.
اقشا جيناۋدىڭ تاعى ءبىر سىلتاۋى- ديرەكتوردىڭ تۋعان كۇنى. مىندەتتى تۇردە ءبىر-ەكى ءتالپىش ايەلدەر شىعادى. «ويباي، نە دەيسىڭ، كۇننىڭ شىعىپ، كەشتىڭ باتقانى وسى ديرەكتوردىڭ ارقاسى» -دەپ. مۇنداي ادام ءۇشىن قولقاڭدى سۋىرىپ بەرسەڭ دە، جالكو ەمەس. ال قۇدالىق شاقىرۋ، بالاسىن ۇيلەندىرۋ، قىزىن ۇزاتۋعا اقشا جيناۋ، ءۇي سالعاندا كومەكتەسۋ سياقتى ەكزوتيكالىق سالىقتار ءجيى بولماسا دا، كەزدەسىپ تۇرادى ەكەن. بۇل ەندى ەشتەڭەدەن قورىقپايتىن باسشىلاردىڭ ارەكەتى.
مينيستر قانشاما كەرەگى جوق قاعازداردى قىسقارتتى. ءتۇرلى جوسپارلار، ەسەپتەر، سۋرەتتەر، جوسپاردى قۇرۋ ءۇشىن جوسپارلار، جينالىسقا بارساڭ العان اسەرىڭ، ناشار وقيتىن، ورتاشا وقيتىن، جاقسى وقيتىن بالالارمەن جۇمىس جوسپارى، ءۇي ارالاۋدىڭ جوسپارى، اتا-انامەن جۇمىس جوسپارى.... وسىلاي كەتە بەرەدى. كوپ مەكتەپتە سولاردى ءالى دە تالاپ ەتەدى. مەن ويلايتىنمىن، وسىلار نەگە ءمينيستردىڭ ايتقانىن تىڭدامايدى ەكەن دەپ. سويتسەم، سول باياعى قۋ اقشا. ول قاعازدى سەن تەرلەپ-تەپشىپ وتىرىپ تولتىراسىڭ. قابىلداۋشى زاۆۋچ ونى ۆاجنىي بولىپ ساناپ الادى. سوسىن شكافتا جاتادى ءبىر جىل. بولدى. توننالاپ كوكتەمدە ماكۋلاتۋراعا وتكىزەدى. ال تەرلەپ-تەپشىگىڭ كەلمەسە، ءار قاعازدىڭ ءوز ستاۆكاسى بار ەكەن. سونى تولەسەڭ، بولدى. سپيسوكتا ءبىرىنشى تۇراسىڭ. وتكىزدى دەگەن بەلگىمەن. 50 پروتسەنت مۇعالىم وڭاي جولدى تاڭداعاننىڭ وزىندە قانشاما اقشا جينالادى. باياعىدا وقۋعا تۇسىرەمىز دەپ 10-بالادان اقشا الىپ، تۇك ىستەمەيتىن افەريستەر بولاتىن. سول وننىڭ بەسەۋى ءوز كۇشىمەن تۇسسە دە پايدا. تۇسپەگەندەرىنە اقشاسىن قايتارىپ بەرە سالادى. مىناۋ دا سول كارۋسەل سياقتى الاياقتىق. ەشكىمگە كەرەگى جوق قاعازدى تالاپ ەتسەڭ، سەنى ەشكىم ۇرسا قويمايدى. ال وتكىزگىسى كەلمەگەندەر ءوز ستاۆكاسىن تولەسە بولدى.
كوپ ادام ويلايدى، مۇعالىم كارانتيندە ۇيدە وتىرىپ بەكەر جالاقى الىپ وتىر دەپ. تۇبىرىمەن قاتە. ءبىلىم ساپاسىنا الاڭداۋمەن قاتار تولتىراتىن قانشاما قاعاز بار، ساباققا قاتىستى. ساباق تا ەسەپتى تالاپ ەتەدى. ينتەرنەت ناشارلىعى، كوز، بەل، يىق، ارقا، سەگىزكوز ت.ب اۋىرعانى ءبىر توبە. وسى جارتى جىلدا قانشاما ارىپتەستىڭ كوزاينەگى قالىڭداعانىن ءبىر قۇداي بىلەدى. مودەراتسيا تەك داۋ تۋعاندا عانا جاسالىنۋ كەرەك دەپ ارنايى بۇيرىق تا شىعاردى. ءبارىبىر. تالاپ ەتىپ جاتىر. سول مودەراتسياعا جەتكىزبەيتىن تاجىريبەلى مۇعالىمدەر نەگە سونى ءالى دە تولتىرادى؟ نەمەسە ساباق جوسپارىن قاعازبەن شىعارۋ مىندەتتى ەمەس دەگەن نورما بار. ءبارىبىر ونى دا تالاپ ەتىپ جاتىر ەكەن. ەلەكتروندى فورما جەتەدى. ستاۆكانى بەرسەڭ، ديرەكتور ەلەكتروندى فورمانى قاناعات تۇتادى. ال بەرمەسەڭ، قاعاز تالاپ ەتەدى. مەنىڭشە ارتىق قاعازدى تالاپ ەتكەندەردى اكىمشىلىك جازاعا تارتاتىن ۋاقىت كەلگەن سياقتى. سابوتاجدىق باپ بولسا. بولماسا ول باپ قىلمىستىق كودەكستە كەزدەسەدى. مەملەكەتتىڭ ۇستانعان باعىتىنا بوگەت بولعان دەپ. جالپى وسى.
شىمكەنتتەن باستاپ ەدىم. شىمكەنتپەن اياقتايىن. وتكەندە قالا اكىمىنىڭ ورىنباسارى پەداگوگتاردى جۇمىسقا ورنالاستىرۋدىڭ كۇشتى ءتاسىلى تۋرالى ايتىپ ەدى. مىنا شۋ ول جاڭالىققا كىر كەلتىرە قويماس دەپ ويلايمىن. باستىسى ول پروتسەسس باستالدى جانە ءوز جەمىسىن بەرەدى دەپ ۇمىتتەنەيىك.
مۇعالىم سۇلتان سۇلەەۆتىڭ الەۋمەتتىك جەلىدەگى جازباسى.
فوتو اشىق دەرەككوزدەن الىندى.
