كينورەجيسسەر، جازۋشى، ستسەناريست ەرمەك تۇرسىنوۆتىڭ وسى جىلى قازاقتىڭ سالت-داستۇرلەرىنىڭ ءمانىن اشاتىن، تامىرىن تانىتىپ، مادەني ەرەكشەلىكتەرىن ايقىندايتىن قازاق جانە ورىس تىلىندە «قاراشاڭىراق» اتتى كىتابى جارىق كورگەن بولاتىن. اۆتوردىڭ ءوزى بۇل تۋىندىسى تۋرالى «Qazaqstan» ۇلتتىق ارناسىندا نۇرتىلەۋ يمانعاليۇلىنا بەرگەن سۇحباتىندا ايتىپ بەردى.
جازۋشى ەرمەك تۇرسىنوۆ كىتاپتى جازۋعا بەلگىلى عالىم، ءتىل مامانى تەلقوجا جانۇزاقوۆتىڭ تۇرتكى بولعانىن ايتادى: «ادام دۇنيەگە كەلگەندە، تاربيەسى، دۇنيەگە كوزقاراسى وسى شاڭىراقتان باستالادى. مەنىڭ انامنىڭ ءىنىسى، ناعاشى كوكەم بار، تەلقوجا جانۇزاقوۆ دەگەن. ۇلكەن عۇلاما. مەنى شاقىرىپ الىپ: «وسى سەن جازىپ جۇرەسىڭ عوي. سوڭعى كەزدەرى بايقايمىن، قازاقىلىققا بۇرىلىپ كەلە جاتىرمىز. سەن وسى كىتاپتى باستاپ جازساڭشى. نەگىزى بۇنىڭ باس مازمۇنى، باس تاقىرىبى – قازاقتىڭ كونە زاماننان كەلە جاتقان ءداستۇرى، ىرىمدارى. ءبىز ونىڭ بەر جاعىن عانا بىلەمىز دە، ونىڭ ار جاعىندا نە جاتىر، ماعىناسى، استارى قانداي، نەگە ءبىز ونى ومىرىمىزدە ساقتاپ كەلە جاتىرمىز؟ نەگە ول ساقتالىپ قالدى؟ سەن وسىنى زەرتتەپ كور»، - دەگەن. وزىنىڭ قاسىندا جۇرگەن دوستارى بار، سولارمەن تانىستىرىپ، ولار مەنىڭ كەڭەسشىلەرىم بولدى. وسى كىتاپتىڭ جازىلۋىنا كومەكتەستى. سالت-ءداستۇردىڭ مازمۇنىندا نە جاتىر؟ ونىڭ نەگىزى قانداي؟ تەرەڭدىگى تۋرالى تەك قانا ورىستانىپ كەتكەن قازاقتار عانا ەمەس، ءتىپتى، كەيبىر قازاقتاردىڭ وزدەرى بىلە بەرمەيدى ەكەن. سونىمەن مەن تاڭقالىپ ەكى جىلداي جازىپ ءجۇردىم. وسى جاقىندا بىتىرگەن سوڭ دوسىم ساتپاەۆ ەكەۋمىز بىرىگىپ شىعاردىق. ءار وتباسىعا وسى كىتاپ كەرەك شىعار دەپ ەندى ءوزىم ۇمىتتەنىپ ءجۇرمىن»، - دەپ كىتاپتىڭ ماڭىزىنا توقتالادى.
ىندەتكە بايلانىستى كىتاپتىڭ تۇساۋكەسەرى وتپەگەنمەن، وقىرمان قاۋىمنىڭ قولىنا ءتيىپ ۇلگەردى.
فوتو اشىق دەرەككوزدەن الىندى
«ادىرنا» ۇلتتىق پورتالى
