بەيسەنبى، 5 قاراشا كۇنى اقتوبە وبلىسىنىڭ اكىمى وڭداسىن ءورازاليننىڭ قاتىسۋىمەن «Aqtóbe» تەلەارناسىنىڭ 60 جىلدىق مەرەيتويىنا ارنالعان شارا ءوتتى.
مەرەيتويلىق جيىنعا وبلىس اكىمىنىڭ ورىنباسارى م.شەرماعانبەت، «اقتوبە مەديا» جشس ديرەكتورى ر.وتىنشين، تەلارنا ۇجىمى مەن ارداگەرلەرى، جامبىل جانە ماڭعىستاۋ وبلىستارىنان ارنايى كەلگەن وبلىستىق تەلەارنا باسشىلارى ب. ءجۇسىپ، م.الىبەكۇلى قاتىستى.
ايماق باسشىسى الپىس جىلدىق اسۋدى ەڭسەرگەن تەلەارنا ۇجىمىن قۇتتىقتاپ، وسى سالادا كوپ جىلدار بويى ەڭبەك ەتكەن جۋرناليستەرگە العىس حاتتار، مەرەيتويلىق سەرتيفيكاتتار مەن گۇلشوقتارىن تابىستادى.
«وسىدان 60 جىل بۇرىن «Aqtóbe» تەلەارناسىنىڭ نەگىزى قالانىپ، العاشقى ايماقتىق حابارلار ەفيرگە شىعا باستادى. وسى جىلدار ىشىندە قالىڭ جۇرتشىلىقتىڭ قۇرمەتىنە بولەنگەن «Aqtóbe» تەلەارناسىنىڭ وبلىسىمىزدىڭ رۋحاني-مادەني، الەۋمەتتىك، ساياسي-قوعامدىق قۇندىلىقتارىنىڭ دامۋىنا، ۇلتتىق سانا-سەزىمنىڭ قالىپتاسۋىنا قوسقان ۇلەسى ولشەۋسىز. زامان تالابىنا ساي وڭ مەن سولىڭدى، اق پەن قارانى اجىراتاتىن ۇلتجاندى حابارلاردىڭ كورسەتىلۋى ۇرپاق ساناسىنا وي سالارى انىق. 60 جىل ىشىندە ءار قازاقتىڭ تورىنەن ورىن العان كوگىلدىر ەكراننان سان ءتۇرلى قۇندى دۇنيەلەر جارىق كورىپ، قالىڭ كورەرمەنگە جول تارتىپ كەلەدى. وسى جىلدار ىشىندە «Aqtóbe» تەلەارناسى زيالى قاۋىمنىڭ رۋحاني، مادەني وشاعىنا اينالدى. قارا شاڭىراقتا ءار جىلدارى ەڭبەك ەتكەن اعا بۋىن وكىلدەرى كوپتەگەن جاس مامانداردى تاربيەلەپ، بولاشاققا باعىت-باعدار بەرىپ، جول سىلتەدى. وتكىر وي، باتىل پىكىر، تىڭ باستامالار كوتەرىپ، ايماقتىڭ ءتۇرلى جاڭالىقتارى مەن الەۋمەتتىڭ مۇڭ-مۇقتاجىن ايقىن كورسەتەتىن تەلەۆيزيا مەكتەبىنىڭ قالىپتاسۋىنا اتسالىستى»، - دەدى وبلىس باسشىسى.
ايتا كەتەيىك، بۇگىنگى كۇنى «Aqtóbe» تەلەارناسىنىڭ حابارلارى وبلىستىڭ 112 ەلدى مەكەنىنە تارايدى. ءوڭىر حالقىنىڭ 98 پايىزى وسى تەلەارنا ارقىلى كۇن سايىن بەرىلەتىن رەسپۋبليكا، قالا جانە وبلىس كولەمىندەگى جاڭالىقتار مەن ءتۇرلى تاقىرىپتارداعى تەلەباعدارلامالارىن كورىپ كەلەدى. ەلىمىزدىڭ باتىس ايماعى بويىنشا شوقتىعى بيىك تەلەارنانىڭ ءبىرى سانالاتىن «Aqtóbe» تەلەارناسىندا قازىرگى زامانعا لايىق سوڭعى ۇلگىدەگى تەحنيكالارمەن جابدىقتالعان 5 ستۋدياسى بار.
سوڭعى جىلدارى تەلەارنانىڭ شىعارماشىلىق ۇجىمىنىڭ بىرلەسكەن ەڭبەگىنىڭ ناتيجەسىنەن شىققان رۋحاني-مادەني، الەۋمەتتىك، ساياسي-قوعامدىق ماسەلەلەردى كوتەرگەن وزەكتى باعدارلامالارى، سۇحباتتارى، اۆتورلىق حابارلارى مەن دەرەكتى فيلمدەرى حالىقتىڭ جۇرەگىنەن جول تاۋىپ، قوعام تاربيەسىنە وزىندىك ۇلەسىن قوسۋدا.
