شىمكەنت قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى قاسىمبەك سايلاۋوۆ «ەڭبەك» مەملەكەتتىك باعدارلاماسى، جۇمىسپەن قامتۋ جول كارتاسى جانە اتاۋلى الەۋمەتتىك كومەك بويىنشا اتقارىلعان جۇمىستار جونىندە ءباسپاسوز بريفينگىندە وسىلاي مالىمدەدى.
قاسىمبەك پەرنەبەكۇلىنىڭ ايتۋىنشا، بيىل «ەڭبەك» مەملەكەتتىك باعدارلاماسى نەگىزىندە 25 531 ادامدى جۇمىسپەن قامتۋ ءىس-شارالارىنا قاتىستىرۋ جوسپارلانعان بولاتىن. 2020 جىلدىڭ 1 قازانىنداعى جاعداي بويىنشا 24 366 ادام جۇمىسپەن قامتۋ ءىس-شارالارىنا قاتىسقان.
«ەڭبەك» مەملەكەتتىك باعدارلاماسى بويىنشا 3 196 ادام تەگىن كاسىبي ءبىلىم الىپ، 2 820 ادام «باستاۋ بيزنەس» جوباسى نەگىزىندە كاسىپكەرلىك نەگىزدەرگە وقىتىلدى.
جىل باسىنان بەرى جالپى تۇراقتى جۇمىسقا ورنالاسقان – 6 936 ادام. 1 606 ادام جاڭا جۇمىس ورىندارىنا، 338 ادام الەۋمەتتىك جۇمىس ورىندارىنا ورنالاسسا، 2 637 ادام جاستار پراكتيكاسى، 4 837 ادام اقىلى قوعامدىق جۇمىسقا جولدانعان.
بيىل 3 931 ادام مەملەكەتتىك گرانتقا يە بولعان. بۇل وتكەن جىلمەن سالىستىرعاندا ەداۋىر كوپ.
– مەملەكەتتىك گرانت الۋ بويىنشا جىلدىق جوسپار 80 پايىزعا ورىندالىپ وتىر. بىلتىر 3478 ادامعا گرانت بەرىلگەن بولاتىن. بيىل بۇل كورسەتكىش 30 پايىزعا ءوسىپ وتىر. بۇل جىلى شىمكەنت قالاسىنا 1500 گرانت بولىنگەن ەدى. كەيىننەن قالا اكىمىنىڭ تىكەلەي قولداۋىمەن جانە سۇرانىستىڭ ارتۋىنا بايلانىستى جالپى 5000-عا جۋىق گرانت بەرۋ جوسپارلاندى. گرانت بەرۋدەگى بىردەن-ءبىر ماقسات – از قامتىلعان وتباسىلاردى جاپپاي كاسىپكەرلىككە باۋلۋ جانە ولاردىڭ تابىستارىن ارتتىرۋ، – دەدى باسقارما باسشىسى.
سونداي-اق، «جۇمىسپەن قامتۋ جول كارتاسى» باعدارلاماسى بويىنشا 237 جوبا ناقتىلانىپ، بۇگىنگى كۇنگە 8 640 جۇمىس ورنى اشىلدى. ونىڭ ىشىندە جۇمىسپەن قامتۋ ورتالىعى ارقىلى 4 405 ادام جۇمىسقا ورنالاسقان.
شىمكەنت قالاسى اكىمىنىڭ ءباسپاسوز قىزمەتى
