«شىمكەنت-تسيرك» مەكەمەسى باسشىلىعى ايگىلى چارلز ءچاپليننىڭ ۇلى يۋدجين چاپلينمەن ونلاين كەزدەسۋ ۇيىمداستىردى.
مەكەمە باسشىسى ارمان اليەۆتىڭ الەۋمەتتىك جەلىدەگى ەفيرىنە شۆەيتساريانىڭ جەنەۆا قالاسىنان ايگىلى ءارتىس يۋدجين چاپلين تىكەلەي بايلانىسقا قوسىلدى. ونلاين جۇزدەسۋدە يۋدجين ءچاپليننىڭ ءومىر جولى، قازاق تسيركىنىڭ وتكەنى، بۇگىنى، بولاشاعى جايلى ءسوز قوزعالدى.
سونداي-اق، تىكەلەي ەفير بارىسىندا يۋدجين ءچاپليننىڭ شىمكەنت تسيركىنىڭ دامۋى جونىندەگى ويلارى، بولاشاقتا بىرگە ىسكەرلىك بايلانىس ورناتۋ جايى دا كەڭىنەن تالقىلاندى. الەمدىك دەڭگەيدەگى تسيرك ونەرىنىڭ قازىرگى جاعدايداعى احۋالى، كينو يندۋسترياسى تۋرالى دا پىكىرلەر ورتاعا سالىندى.
تسيرك قىزمەتكەرلەرى ونلاين ەفيردى لەد ەكران ارقىلى تاماشالادى. يۋدجين مىرزا شىمكەنت تسيركىنىڭ جانكۇيەرلەرىنە، كورەرمەندەرىنە ءوز ريزاشىلىعىن ءبىلدىرىپ، بولاشاقتا قازاق ەلىندەگى تسيرك ونەرىن الەمدىك دەڭگەيدە كورگىسى كەلەتىنىن جاسىرمادى.
ونلاين ەفيردە قازاقستانداعى جانە شۆەيتسارياداعى كورەرمەندەر ءوز سۇراقتارىن قويىپ، جىلى لەبىزدەرىن جاۋدىرعانىن ايتا كەتكەن ءجون.
شىمكەنت قالاسى اكىمىنىڭ ءباسپاسوز قىزمەتى
