بۇگىن اقتوبەدەگى ەڭ ءىرى جولداردىڭ ءبىرى ساڭكىباي باتىر داڭعىلى پايدالانۋعا بەرىلىپ، تۇرعىنداردىڭ قۋانىشى ارتتى. ۇزىندىعى 3,3 شاقىرىم بولاتىن جولدىڭ اشىلۋىنا وبلىس اكىمى وڭداسىن ورازالين ارنايى قاتىسىپ، باق وكىلدەرىنىڭ ساۋالدارىنا جاۋاپ بەردى.
“مەردىگەر مەكەمەمەن جاسالعان كەلىسىم بويىنشا قۇرىلىسى مامىر ايىندا باستالعان جوبا جەلتوقسان ايىندا تولىق اياقتالۋى ءتيىس ەدى. جۇرگىزۋشىلەردىڭ قولايلىلىعى ءۇشىن، كەلىسىمدە كورسەتىلگەن كۇننەن ەرتەرەك اياقتاۋدى تاپسىردىم. تەحنيكالىق تالاپتاردىڭ ساقتالۋى قاتاڭ باقىلاۋدا بولدى”،- دەپ اتاپ ءوتتى وڭداسىن ورازالين.
ءوڭىر باسشىسى سونداي-اق، جول جوندەۋ كەزىندە تۋىنداعان ۋاقىتشا كەدەرگىلەردىڭ بولعانىن جاسىرمادى، جانە تۇرعىنداردىڭ تۇسىنىستىك بىلدىرگەنى ءۇشىن العىس ءبىلدىردى. ايماق باسشىسى تاعى ءبىر قۋانىشتى اقپاراتپەن ءبولىستى. اقتوبە - قاندىاعاش كۇرە جولىنىڭ جوندەۋىنە قاتىستى جوبا ماقۇلدانىپ، قارجىلاندىرۋ ماسەلەسى شەشىلگەن. وبلىس اكىمى مەردىگەر مەكەمەگە جوندەۋ جۇمىستارىنا دايىندىقتى بيىلدان قالدىرماي باستاۋ كەرەكتىگى تۋرالى تالاپ قويعان.
ايتىپ وتەيىك، ساڭكىباي باتىر داڭعىلى 4-6 جولاقتى، ەنى 15-22 مەتردى قۇرايدى. جول قۇرىلىسى “جقجك” باعدارلاماسى اياسىندا 1,5 ملرد تگ قارجىعا جاسالدى. وبلىس اكىمى قالا باسشىسىنا تروتۋار، جارىقتاندىرۋ سىندى قالعان جۇمىستاردى 25- قاراشاعا دەيىن اياقتاۋدى تاپسىردى.
