2 قاراشادا نۇر-سۇلتانداعى قىلمىستىق ىستەر بويىنشا اۋدانارالىق مامانداندىرىلعان سوتى "زاڭسىز اعزا اۋىستىردى" دەپ ايىپتالعان دارىگەر-ترانسپلانتولوگ عاني قۇتتىمۇراتوۆ پەن شىمكەنت قالالىق №1 كلينيكالىق اۋرۋحانانىڭ باس دارىگەرى ابىلاي دونبايدى اقتادى. ءىس جەتى اي بويى جابىق رەجيمدە قارالدى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
"ترانسپلانتاتسيا جاساعان دارىگەرلەر قۇجاتتاردىڭ جالعان ەكەنىن بىلمەگەن. بارلىق وپەراتسيا رەسمي تۇردە راسىمدەلگەن قۇجاتتارمەن جاسالعان" دەپ حابارلادى سوت.
قازاقستان ءىىم ءبىر جىل بۇرىن دونباي ءوزى باسقارعان اۋرۋحانادا وزبەكستان، قىرعىزستان جانە ۋكراينا ازاماتتارىنىڭ بۇيرەگىن الىپ، يزرايل ازاماتتارىنا زاڭسىز سالعان دەگەن كۇدىكپەن ۇستالعانىن حابارلاعان.
2 قاراشاداعى سوتتا سۋديا قۇتتىمۇراتوۆتى "كاسىبي مىندەتىن دۇرىس اتقارمادى" دەپ ايىپتاپ، ەكى جارىم جىلعا تۇرمەگە قامادى. سوتتىڭ حابارلاۋىنشا، قۇتتىمۇراتوۆ اعزا اۋىستىرعاندا ناۋقاستاردىڭ بىرىنە "ۆيچ جۇققان".
وسى ءىس بويىنشا تاعى ءبىر كۇدىكتى قىرعىزستان ازاماتى بەرمەت تايسالوۆا التى جىلعا باس بوستاندىعىنان ايىرىلدى. ول "ادام اعزاسىن زاڭسىز الۋعا يتەرمەلەدى" جانە "جالعان قۇجات جاسادى" دەپ ايىپتالدى.
تەرگەۋدىڭ دەرەگىنشە، تايسالوۆا 2017 جاگە 2018 جىلى حالىقارالىق ىزدەۋدە جۇرگەن ادامدارعا قازاقستاندا ورگان الماستىرۋ بويىنشا زاڭسىز كەلىسىمدەر جاساۋعا كومەكتەسكەن.
