جۇرت كوروناۆيرۋستان ساقتانۋدىڭ جولدارىن تاپپاي، باس قاتىرىپ جۇرگەندە، استانالىق ءبىر مەكتەپتە حەللوۋيندى دۇركىرەتىپ تويلاتىپ جاتىر ەكەن. بۇل تۋرالى تانىمال جۋرناليست ريشات اسقاربەكۇلى ءوز پاراقشاسىندا جازدى دەپ حابارلايدى «ادىرنا» ۇلتتىق پورتالى.
«بالانى مەكتەپكە جىبەرە الماي قينالىپ ءجۇرمىز. ەلىمىزدىڭ قاق تورىندەگى مەكتەپتەردىڭ بىرىندە حەللوۋيندى دۇركىرەتىپ تويلاپتى. ءبىلىم وشاعىنداعى مۇنداي جىن-ويناقتى توقتاتۋ كەرەك. پاندەميادا قازاق توي جاساسا، وكىرتىپ تۇرىپ ايىپپۇل سالىنادى. مەنىڭشە بۇل دا نازار اۋداراتىن جاعداي» دەپ دابىل قاقتى ر.اسقاربەكۇلى.
«ودا تۇرعان نە بار دەيتىن شىعار كەيبىرەۋلەر. بىراق بالاباقشالاردا، مەكتەپتەردە حەلللوۋين نەمەسە باسقا دا ءبىزدىڭ ۇلتىمىزعا، ەلىمىزگە، سالت-داستۇرىمىزگە قايشى، بوتەن مەرەكەلەردى تويلاۋدى دوعارۋ كەرەك دەپ سانايمىن. بۇل مەرەكەدەن بالالارىمىزدىڭ بولاشاعىنا نۇر بولاتىن ەشقانداي ءبىر جارىق ساۋلە كورمەدىم. 1-2 اي شىداساڭىزدار ورىستاردىڭ جاڭا جىل مەرەكەسى كەلەدى. ول جەردە دە قيالعا ەرىك بەرىپ نەشە ءتۇرلى وبرازدارعا ورانۋعا بولادى... ال، تاعى ءسال شىداساڭىزدار ءوزىمىزدىڭ ۇلتتىق مەرەكەمىز ناۋرىز كەلەدى. ۆوت، سول مەرەكەمىزدى جاقسىلاپ اتاپ وتسەك بولار ەدى. ال، انانىڭ دا، مىنانىڭ دا قاڭسىعىن تاڭسىق كورۋ... كەيدە ءبىز ءالى ءوزىمىزدى تابا الماي، اداسىپ جۇرگەن ۇلت سياقتى بوپ كەتەمىز. الدە سوندايمىز... بىلمەيمىن» دەپ جازدى وسى ماسەلەگە قاتىستى بەلگىلى جۋرناليست اسحات سادىرباي.
كەشە كەشكىسىن شىمكەنتتە جۇرگەن تۇركيالىق ازامات مەحمەت يىلماز دوسىمىز حابارلاسىپ: «نەگە ادامدار كوشەدە ءبىرتۇرلى ماسكالار كيىپ، تۇسىنىكسىز جاعدايدا ءجۇر؟» -دەپ سۇراپ، تاڭىرقاعان ەدى. ونىڭ تاڭدانىسىن ءبىزدىڭ جاۋابىمىز ءتىپتى كۇشەيتتى. «امەريكا جاقتا جىل سايىن تويلاناتىن حەللوۋين دەگەن مەرەكە بار ەكەن. بىزدىكىلەر دە سول مەرەكەگە وزىنشە «ۇلەس قوسۋدا» -دەگەن جاۋابىمىزعا ىشەگىن تارتقان تۇرىك باۋىرىمىز: «قازاق باۋىرلارىمىز ءوز مەرەكەلەرىن وسىلاي نەگە تويلامايدى؟ جىل سايىن قاراشا ايىنان اقپان ايىنا دەيىن قازاقستاندا جۇمىس بابىمەن جۇرەمىن. وكىنىشكە قاراي، قاراشا ايىنان باستاپ، شىرشالار بەزەندىرىلىپ، عيماراتتار ساندەلە باستايدى. ال قازاقتىڭ ەڭ ماڭىزدى، ەرەكشە مەرەكەسى سانالۋعا ءتيىس تاۋەلسىزدىك كۇنىندە الگىندەي دۋمانداتىپ، كوشەدە مەرەكەلىك كوڭىلدە جۇرگەن پەندەنى تاپپايسىز. ءوزىنىڭ ءتول مەرەكەسى جوق حالىق سياقتى الدەكىمنىڭ تۇككە تۇرعىسىز، ءمانسىز مەرەكەسىن تويلاۋ نە ءۇشىن كەرەك سىزدەرگە؟» دەدى. بۇل سۇراققا بەرەر ماردىمدى جاۋاپتى تاپپاي، كوزبەن جەر شۇقىپ قالا بەردىك. ءيا، ورىستىڭ جاڭا جىلىن دا دۋمانداتىپ قارسى الاتىن ءبىزدىڭ حالىق ءوز مەرەكەسىندە نەگە ەكەنى بەلگىسىز، ىنىنە كىرگەن سۋىردىڭ كەبىن كيەتىنى جاسىرىن ەمەس.
بىلاي قاراساڭىز، الىپ بارا جاتقان پروبلەما ەمەس سياقتى. الايدا ەلىمىزدىڭ قاق تورىندە، پاندەميا كەزىندە جىن، پەرىنىڭ كيىمىن كيىپ دۋمانداتاتىن ۋاقىت پا قازىر؟ ال بارىنەن دە بۇل «مەرەكەنى» بالالارعا تويلاتۋ قيانات ەمەس پە؟ بالا ۇلكەننىڭ ايتقانىن ورىنداۋشى عانا. ولاي بولسا، بالانى شايتاننىڭ كيىمىن كيگىزىپ، مەرەكە تويلاتتىرعان ۇلكەن ادام جاۋاپقا تارتىلۋى كەرەك سياقتى. بۇگىن حەللوۋين دەپ دالاقتاپ شىقساق، ەرتەڭ وندا ۇلتىمىزدى ۇمىتىپ، جالاڭاش كوشەدە دە بيلەرمىز؟!
ءبىلىم سالاسىنا قاراستى مەكەمەلەر كارانتين كەزىندە مىناداي سوراقىلىققا جول بەرگەن مەكتەپ پەن دۋماندى ۇيىمداستىرعان مۇعالىمدى دە سۇراققا الىپ، تەزگە سالادى دەپ سەنەمىز.
مەرۋەرت حۋساينوۆا،
«ادىرنا» ۇلتتىق پورتالى.
فوتو اشىق دەرەككوزدەن الىندى.
