Jurt koronavırýstan saqtanýdyń joldaryn tappaı, bas qatyryp júrgende, astanalyq bir mektepte helloýındi dúrkiretip toılatyp jatyr eken. Bul týraly tanymal jýrnalıst Rıshat ASQARBEKULY óz paraqshasynda jazdy dep habarlaıdy «Adyrna» ulttyq portaly.
«Balany mektepke jibere almaı qınalyp júrmiz. Elimizdiń qaq tórindegi mektepterdiń birinde Helloýındi dúrkiretip toılapty. Bilim oshaǵyndaǵy mundaı jyn-oınaqty toqtatý kerek. Pandemııada qazaq toı jasasa, ókirtip turyp aıyppul salynady. Menińshe bul da nazar aýdaratyn jaǵdaı» dep dabyl qaqty R.Asqarbekuly.
«Oda turǵan ne bar deıtin shyǵar keıbireýler. Biraq balabaqshalarda, mektepterde Hellloýın nemese basqa da bizdiń ultymyzǵa, elimizge, salt-dástúrimizge qaıshy, bóten merekelerdi toılaýdy doǵarý kerek dep sanaımyn. Bul merekeden balalarymyzdyń bolashaǵyna nur bolatyn eshqandaı bir jaryq sáýle kórmedim. 1-2 aı shydasańyzdar orystardyń Jańa jyl merekesi keledi. Ol jerde de qııalǵa erik berip neshe túrli obrazdarǵa oranýǵa bolady... Al, taǵy sál shydasańyzdar ózimizdiń ulttyq merekemiz Naýryz keledi. Vot, sol merekemizdi jaqsylap atap ótsek bolar edi. Al, ananyń da, mynanyń da qańsyǵyn tańsyq kórý... Keıde biz áli ózimizdi taba almaı, adasyp júrgen ult sııaqty bop ketemiz. Álde sondaımyz... bilmeımin» dep jazdy osy máselege qatysty belgili jýrnalıst Ashat SADYRBAI.
Keshe keshkisin Shymkentte júrgen túrkııalyq azamat Mehmet Iylmaz dosymyz habarlasyp: «Nege adamdar kóshede birtúrli maskalar kıip, túsiniksiz jaǵdaıda júr?» -dep surap, tańyrqaǵan edi. Onyń tańdanysyn bizdiń jaýabymyz tipti kúsheıtti. «Amerıka jaqta jyl saıyn toılanatyn helloýın degen mereke bar eken. Bizdikiler de sol merekege ózinshe «úles qosýda» -degen jaýabymyzǵa ishegin tartqan túrik baýyrymyz: «Qazaq baýyrlarymyz óz merekelerin osylaı nege toılamaıdy? Jyl saıyn qarasha aıynan aqpan aıyna deıin Qazaqstanda jumys babymen júremin. Ókinishke qaraı, qarasha aıynan bastap, shyrshalar bezendirilip, ǵımarattar sándele bastaıdy. Al qazaqtyń eń mańyzdy, erekshe merekesi sanalýǵa tıis Táýelsizdik kúninde álgindeı dýmandatyp, kóshede merekelik kóńilde júrgen pendeni tappaısyz. Óziniń tól merekesi joq halyq sııaqty áldekimniń túkke turǵysyz, mánsiz merekesin toılaý ne úshin kerek sizderge?» dedi. Bul suraqqa berer mardymdy jaýapty tappaı, kózben jer shuqyp qala berdik. Iá, orystyń jańa jylyn da dýmandatyp qarsy alatyn bizdiń halyq óz merekesinde nege ekeni belgisiz, inine kirgen sýyrdyń kebin kıetini jasyryn emes.
Bylaı qarasańyz, alyp bara jatqan problema emes sııaqty. Alaıda elimizdiń qaq tórinde, pandemııa kezinde jyn, periniń kıimin kıip dýmandatatyn ýaqyt pa qazir? Al bárinen de bul «merekeni» balalarǵa toılatý qııanat emes pe? Bala úlkenniń aıtqanyn oryndaýshy ǵana. Olaı bolsa, balany shaıtannyń kıimin kıgizip, mereke toılattyrǵan úlken adam jaýapqa tartylýy kerek sııaqty. Búgin helloýın dep dalaqtap shyqsaq, erteń onda ultymyzdy umytyp, jalańash kóshede de bılermiz?!
Bilim salasyna qarasty mekemeler karantın kezinde mynadaı soraqylyqqa jol bergen mektep pen dýmandy uıymdastyrǵan múǵalimdi de suraqqa alyp, tezge salady dep senemiz.
Merýert HÝSAINOVA,
«Adyrna» ulttyq portaly.
Foto ashyq derekkózden alyndy.
