بۇگىن شىمكەنت قالاسىنىڭ اكىمى مۇرات ايتەنوۆ مۇعالىمدەر مەن ءبىلىم سالاسىنىڭ ارداگەرلەرىن كاسىبي مەرەكەسىمەن قۇتتىقتادى. جاس ۇرپاقتى ءبىلىم نارىمەن سۋسىنداتىپ جۇرگەن ۇستازداردىڭ قوعامداعى ورنى ەرەكشە ەكەنىن اتاپ وتكەن قالا باسشىسى قازىرگى پاندەمياعا قاراماستان بالالارعا ۇزدىكسىز ءبىلىم بەرىپ جاتقاندىقتارى ءۇشىن العىسىن ءبىلدىردى.
«بۇگىندە مەملەكەت ءبىلىم بەرۋ جۇيەسىنىڭ حالىقارالىق ستاندارتتارعا ساي بولۋ ماسەلەسىنە باسا نازار اۋدارىپ وتىر. ماسەلەن، قازاقستاندا جاڭارتىلعان ءبىلىم بەرۋ باعدارلاماسى ەنگىزىلۋدە. پرەزيدەنت تاپسىرماسىنا سايكەس، قاڭتار ايىنان باستاپ مۇعالىمدەردىڭ جالاقىسى 25 پايىزعا وسەدى. سونىمەن قوسا «پەداگوگ مارتەبەسى تۋرالى» ارنايى زاڭ قابىلداندى. بۇل سىزدەردەن تۇراقتى تۇردە ىزدەنۋدى، بىلىكتىلىكتى جەتىلدىرە ءتۇسۋدى تالاپ ەتەدى. بۇعان كاسىبي مىندەت دەپ قانا ەمەس، ازاماتتىق بورىش دەپ قاراۋدى سۇرايمىن»،-دەدى قالا اكىمى.
سونىمەن قاتار، مۇرات ايتەنوۆ قالادا الداعى ءۇش جىلدا 47 مەكتەپ سالىناتىنىن ءمالىم ەتتى.
بۇگىنگى تاڭدا شىمكەنت قالاسىندا 26 مىڭنان استام مۇعالىم بار. قىركۇيەك ايىنىڭ قورىتىندىسى بويىنشا شىمكەنت قالاسى رەسپۋبليكاداعى مەكتەپتەر اراسىندا «Bilim Iand جانە Onlinemektep.org» ينتەرنەت - پلاتفورماسىندا قاشىقتان وقىتۋدا ەكىنشى ورىندا تۇر. ال قر بعم تاراپىنان ەندىرىلگەن «كۇندەلىك.كز» ەلەكتروندى جۋرنالدار اقپاراتتىق جۇيەسىندە ۇزدىك ۇشتىكتىڭ قاتارىندا.
شىمكەنت قالاسى اكىمىنىڭ ءباسپاسوز قىزمەتى
