وكق بريفينگىندە دەنساۋلىق ساقتاۋ ۆيتسە-ءمينيسترى، قازاقستاننىڭ باس سانيتارلىق دارىگەرى ەرلان قياسوۆ دەپۋتات ازات پەرۋاشەۆتىڭ تالابىنا تۇسىنىكتەمە بەردى، دەپ حابارلايدى «ادىرنا» ۇلتتىق پورتالى zakon.kz. تىلشىسىنە سىلتەمە جاساپ.
ازات پەرۋاشەۆ بۇعان دەيىن كوروناۆيرۋسپەن اۋىرعان دارىگەرلەرگە بەرىلۋگە ءتيىس، بىراق الىنىپ تاستالعان وتەماقىنى كەرى قايتارۋدى سۇراعان بولاتىن. وسىعان بايلانىستى بەرگەن جاۋابىندا باس سانيتار قياسوۆ: «قازىرگى كەزدە بۇل وتەماقىلاردى تولەۋدى جالعاستىرۋ دارىگەرلەردىڭ ءوزىن دە، مەديتسينالىق مەكەمە باسشىلارىن دا بوساڭسىتىپ، ەپيدەميالىق شاراعا قارسى كۇرەس جۇمىستارىنىڭ السىرەۋىنە سوقتىرادى. بارلىعى دەي المايمىن، جەكەلەگەن فاكتىلەر بولۋى مۇمكىن»، -دەدى.
سونىمەن قاتار ول ۆەدومستۆو ۇكىمەت پەن دەنساۋلىق ساقتاۋ مينيسترلىگى قابىلداعان مەديتسينا قىزمەتكەرلەرىنىڭ دەنساۋلىعى مەن قاۋىپسىزدىگىن قورعاۋ شارالارى ءتيىمدى دەپ سانايدى. ال ەڭ باستىسى، قياسوۆ كوروناۆيرۋسپەن اۋىرعان دارىگەرگە وتەماقى تولەۋدى ارتىق دەپ سانايتىنىن مالىمدەدى.
ەستەرىڭىزگە سالىپ وتەيىك، بۇعان دەيىن دەنساۋلىق ساقتاۋ مينيسترلىگى پاندەميا كەزىندە ءوزى دە كوروناۆيرۋسپەن اۋىرعان دارىگەرلەرگە جانە وسى ۆيرۋستان كوز جۇمعان دارىگەرلەردىڭ وتباسىنا ارنايى وتەماقى تولەنەتىنىن ايتقان بولاتىن.
فوتو اشىق دەرەككوزدەن الىندى.
