تاعدىردى جاساۋ

825
ءبىر ادامعا شەگەنى دۇرىس قاقپاي جاتسىڭ دەپ مەيىرلەنىپ، كۇلىپ ايتساڭ، ول بالعاسىن تەرىس ۇستاپ العانىن ءتۇسىنىپ، شەگەنى دۇرىس جاعىمەن قاعا باستايدى. نەمەسە، سورپا جاساپ جاتقان ادامعا كوكونىستى سۋىق سۋعا ەمەس، قايناعان سۋعا قوس، الدىمەن ارشىپ، جۋىپ، تۋراپ ال دەسەڭ، ول تىڭدايدى. ەسى دۇرىس ادام پايدالى ءسوزدى تىڭدايدى. ماسەلەن، ەگەر سەن «قيىس كەتىپسىز، كەرى قايتىپ، وڭعا بۇرىلساڭىز، باراتىن جەرىڭىزگە تۋرا جەتەسىز» دەسەڭ، ول ادام دا العىسىن ايتىپ كەتە بارادى. مۇنداي ءسوزدىڭ ءبارى سۇرانىسىنا قاراي ايتىلادى. ەگەر ءبىر ادام سۇراسا، كومەككە مۇقتاج بولسا، ول سۇرايدى، سەن جاۋاپ بەرەسىڭ.
ال، كەي جاعدايدا ادام: «وسى مەن نە ىستەپ ءجۇرمىن؟» دە سۇرايدى. سەن كوزگە كورىنىپ تۇرعان انىق زاتتاردى تىزەسىڭ. بىراق بالاعا ايعايلاۋعا بولمايدى. ياكي، ايەلىڭدى بوقتاۋدىڭ قاجەتى شامالى. ۇنەمى ءبىر زاتتى قايتالاي بەرۋدىڭ دە قاجەتى جوق. بەيتانىستارعا ءتۇن ىشىندە حات جازبا، قوڭىراۋ شالىپ، مازاسىن الما. كۇندىز دە ابايلاپ حابارلاسقان ابزال. كۇيەۋىڭە ءبىر كۇندە ءجۇز رەت حات جازىپ، مازاسىن كەتىرمە. جۇما سايىن ءىشىپ، ماس بولۋدىڭ دا كەرەگى جوق. مۇنداي جاعدايدا سەنى تىڭداپ، اقىلىڭدى الا قويار دەيمىسىڭ؟ جوق. بولماسا، باسىن يزەپ، ماقۇل دەي سالادى. بىراق ءوزىن باسقاشا اقتاپ الادى. بالعانى تەرىس ۇستاعان كۇيى شەگەسىن قاعا بەرەدى. ال، ەگەر قاتتى جاقتىرماسا – سەنى بوقتاپ، ۇرسىپ، ءوزىنىڭ باسقاشا ويلايتىنىن ايتار، ال سەن سەبەپ تاۋىپ، سوقتىعىپ تۇرسىڭ دەيدى. مەن تەمەكى تارتقان سوڭ جوتەلمەيمىن، تەك جۇيكەم توزعان سوڭ جوتەلەم دەر. ءوز بالامدى ءوزىم تاربيەلەپ الامىن دەيدى. بارىنە جۇمىس كىنالى دەيدى.
نەگە بۇلاي؟ نەگە ادام باقىتسىزدىعىنا جارماسا بەرەدى؟ بۇل مەڭگەرتەتىن داعدى ەمەس. بۇل ونىڭ ءوزى، تۇلعاسى، مىنەزى. مىنەز – تاعدىرعا اينالادى. فيلوسوفتار ىلعي سولاي ايتادى. پسيحياترلارعا دا بۇل نارسە تانىس. مىنەز – ادامنىڭ تاعدىرىنا اينالادى. جاڭا تۋعان نارەستەنىڭ دە وزىندىك مىنەزى بولادى، سودان سوڭ تاربيەلەنگەن الەۋمەتتىك-قوعامدىق ورتانىڭ اسەرى زور. بۇل ونىڭ ومىرلىك مىنەز-قۇلقىنا اينالادى. سوندىقتان ءتۇن ىشىندە جولدى قىزىلعا كەسىپ وتەتىن ادامنىڭ تاعدىرىن تاپ باسىپ ايتۋ قيىن ەمەس. تاعدىردىڭ سيۋجەتتەرى سونشالىقتى كوپ ەمەس، راس ايتام.
قالىپتاسىپ كەتكەن مىنەز-قۇلىق پەن تۇلعالىق قاسيەتتەردى وزگەرتۋ وڭاي ەمەس. پروبلەما بار دەپ مويىنداۋدىڭ ءوزى – وتە قيىن. ەگەر ادام قايتالاي بەرەتىن قاۋىپتى داعدىسىن وزگەرتۋگە قۇلىقتى بولماسا، ول تاعدىردىڭ لەيتموتيۆىنە ءسىڭىسىپ كەتەدى. ويۋدىڭ بولشەگىنە اينالادى. سوندا ماڭدايعا جازىلعان دۇنيە ورىن الادى. تاعدىر تالكەگىنەن دۇرىس كەڭەسكە قۇلاق تۇرگەن، تىڭداعان ادام عانا قۇتىلادى. ىستەمە دەگەندى ىستەمەي قويا سالعاندار امان قالادى. ولار تاعدىرىن وزگەرتۋگە بەل بايلاعاندار. بىراق مۇندايلار وتە از.
اۆتور: اننا كيريانوۆا
اۋدارعان شىنار ءابىلدا
پىكىرلەر
رەداكتسيا تاڭداۋى